7 ಖಂಡ 7 ಪಂದ್ಯ ಆಡಲಿರುವ ಬೆಕಂ
Team Udayavani, May 25, 2017, 12:02 PM IST
ಹೊಸದಿಲ್ಲಿ ತನ್ನ ಹೊಸ ಟಿವಿ ಕಾರ್ಯಕ್ರಮ “ಡೇವಿಡ್ ಬೆಕೆಂ-ಫಾರ್ ದ ಲವ್ ಆಫ್ ಗೇಮ್’ಗಾಗಿ ಇಂಗ್ಲೆಂಡಿನ ಫುಟ್ಬಾಲ್ ದಂತಕಥೆ ಡೇವಿಡ್ ಬೆಕಂ 13 ದಿನಗಳ ಅವಧಿಯಲ್ಲಿ ಏಳು ಖಂಡಗಳಲ್ಲಿ ಏಳು ಪಂದ್ಯಗಳನ್ನಾಡುವ ಯೋಜನೆ ಹಾಕಿಕೊಂಡಿದ್ದಾರೆ. ಈ ಟಿವಿ ಕಾರ್ಯಕ್ರಮ ಮೇ 28ರಿಂದ ಪ್ರಸಾರಗೊಳ್ಳಲಿದೆ.
ಈ ವಿಶೇಷ ಕಾರ್ಯಕ್ರಮದಲ್ಲಿ ಬೆಕಂ ಎರಡು ವಾರಗಳ ಅಂತರದಲ್ಲಿ ವಿಶ್ವದಾದ್ಯಂತ ಪ್ರಯಾಣ ಮಾಡಿ ಯುನೈಟೆಡ್ ಕಿಂಗ್ಡಂಗೆ ಮರಳಿ ತನ್ನದೇ ಪ್ರಖ್ಯಾತ ಆಟಗಾರರನ್ನು ಒಳಗೊಂಡ ಯುನಿಸೆಫ್ ನಿಧಿ ಸಂಗ್ರಹ ಪಂದ್ಯದಲ್ಲಿ ಆಡಲಿದ್ದಾರೆ.
ಮ್ಯಾಂಚೆಸ್ಟರ್ ಯುನೈಟೆಡ್ ತಂಡ ಮಾಜಿ ಆಟಗಾರರಾದ ಬೆಕಂ ವಿಶ್ವ ಪರ್ಯಟನೆ ವೇಳೆ ಫುಟ್ಬಾಲ್ ಆಡಲು ತೀರಾ ಗ್ರಾಮೀಣ ಪ್ರದೇಶಕ್ಕೂ ಭೇಟಿ ನೀಡಿದ್ದಾರೆ. ಬಡತನದಲ್ಲಿ ನರಳುತ್ತಿರುವ ಜನರ ಕಥೆ ಮತ್ತು ನರಳಾಟದ ಚಿತ್ರಣವನ್ನು ತೋರಿಸಿದ್ದಾರಲ್ಲದೇ ಅವರೊಂದಿಗೆ ಫುಟ್ಬಾಲ್ ಆಟ ಆಡಿದ್ದಾರೆ. ನೇಪಾಳದಲ್ಲಿ ನಡೆದ ಭೂಕಂಪದಿಂದ ಹಾನಿಗೊಳಗಾದ ಶಾಲೆಯಿಂದ ಹಿಡಿದು ಪಪುವಾ ನ್ಯೂ ಗೈನಿಯದ ಕಾಡಿನ ಬುಡಕಟ್ಟು ಪ್ರದೇಶ, ಮಿಯಾಮಿಯ ವನಿತಾ ಫುಟ್ಬಾಲ್ ತಂಡದ ಜತೆ ಚರ್ಚಿಸಿ ಫುಟ್ಬಾಲ್ ಪ್ರೀತಿ ಯಾವ ರೀತಿ ಜನರನ್ನು ಒಟ್ಟುಗೂಡಿಸುತ್ತಿದೆ ಎಂಬುದನ್ನು ಪತ್ತೆಹಚ್ಚಿದ್ದಾರೆ.