ಬಾಂಬ್‌ ನಾಗನ ಮನೆಗೆ ಪೊಲೀಸ್‌ ದಾಳಿ: 50 ಕೋಟಿ ರೂ ಹಳೆ ನೋಟು ಪತ್ತೆ!

Team Udayavani, Apr 14, 2017, 10:13 AM IST

ಬೆಂಗಳೂರು: ಶ್ರೀರಾಂಪುರದಲ್ಲಿರುವ ಮಾಜಿ ಕಾರ್ಪೋರೇಟರ್‌ , ರೌಡಿ ಶೀಟರ್‌ ಆಗಿರುವ ಬಾಂಬ್‌ ನಾಗನ ಮನೆಗೆ ಶುಕ್ರವಾರ ಬೆಳ್ಳಂಳೆಳಗ್ಗೆ  ಪೊಲೀಸರು ದಾಳಿ ನಡೆಸಿದ್ದು , ಬಾಗಿಲು ಒಡೆದು ಒಳ ನುಗ್ಗಿದ ವೇಳೆ 50 ರೂಪಾಯಿಗೂ ಹೆಚ್ಚು ಮೌಲ್ಯದ ಅಪನಗದೀಕರಣಗೊಂಡ ನೋಟುಗಳು ಪತ್ತೆಯಾಗಿರುವ ಬಗ್ಗೆ ವರದಿಯಾಗಿದೆ. 

ಉದ್ಯಮಿಗಳ ಕಿಡ್ನಾಪ್‌ ಮತ್ತು 50 ಲಕ್ಷ ರೂಪಾಯಿ ಹಫ್ತಾ ಪಡೆದ ಪ್ರಕರಣದಲ್ಲಿ 
ಕೋರ್ಟ್‌ನಿಂದ ಸರ್ಚ್‌ ವಾರಂಟ್‌ ಪಡೆದು ಹೆಣ್ಣೂರು ಪೊಲೀಸರು ದಾಳಿ ನಡೆಸಿದ್ದಾರೆ. 

ದಾಳಿ ನಡೆಸಿದ ವೇಳೆ ಯಾರೂ ಮನೆಯ ಬಾಗಿಲು ತೆಗೆಯಲಿಲ್ಲ, ಕೆಲ ಹೊತ್ತು ಕಾದರೂ ಬಾಗಿಲು ತೆರೆಯಲು ಸಾಧ್ಯವಾಗಲಿಲ್ಲ. ಕಿಟಕಿ ಗ್ರಿಲ್ಸ್‌ ಕತ್ತರಿಸಿ , ಬಾಗಿಲು ಒಡೆದು 40 ಕ್ಕೂ ಹೆಚ್ಚು ಪೊಲೀಸರು ಒಳ ಪ್ರವೇಶಿಸಿ ಸಂಪೂರ್ಣ  ಮನೆಯನ್ನು ಜಾಲಾಡುತ್ತಿದ್ದಾರೆ.

ಸ್ಥಳಕ್ಕೆ  ಪೊಲೀಸ್‌ ಅಧಿಕಾರಿಗಳು , ಹೆಚ್ಚುವರಿ ಪೊಲೀಸರು ದೌಡಾಯಿಸಿದ್ದಾರೆ. ಪರಿಶೀಲನೆ ವೇಳೆ ಮಾರಾಕಾಸ್ತ್ರಗಳು ಮತ್ತು ಪರವಾನಿಗೆ ಇಲ್ಲದ ಶಸ್ತ್ರಾಸ್ತ್ರಗಳೂ ಪತ್ತೆಯಾಗಿರುವ ಬಗ್ಗೆ ವರದಿಯಾಗಿದೆ. 

ಮನೆಯಿಂದ ಅನತಿ ದೂರದಲ್ಲಿ ಸ್ನೇಹಾ ಸೇವಾ ಸಮಿತಿ ಎಂಬ ಕಚೇರಿಯಿದ್ದು ಪೊಲೀಸರು ಪರಿಶೀಲನೆ ನಡೆಸುತ್ತಿದ್ದಾರೆ.

ಮಂಚದಲ್ಲಿ ಹಣ !
 ಬಾಕ್ಸ್‌ ರೀತಿಯ ಮಂಚದಲ್ಲಿ ಕೋಟಿಗಳಷ್ಟು ಹಣವನ್ನು ಕೂಡಿಟ್ಟಿದ್ದಿರುವುದನ್ನು ಕಂಡು ಪೊಲೀಸರೇ ಬೆಚ್ಚಿ ಬಿದ್ದರು. ಮನೆಯಲ್ಲಿದ್ದ ನಾಗನ ಪತ್ನಿ ಲಕ್ಷ್ಮಿ  ಮತ್ತು ಪುತ್ರಿಯನ್ನೂ ಈ ಬಗ್ಗೆ ತೀವ್ರವಾಗಿ ವಿಚಾರಣೆ ನಡೆಸುತ್ತಿದ್ದಾರೆ. 

ಮನೆಯ ಟೆರೇಸ್‌ ಬಾಗಿಲಿನಿಂದ ಪರಾರಿ ? 

ದಾಳಿ ವೇಳೆ ಬಾಂಬ್‌ ನಾಗ ಮನೆಯಲ್ಲಿದ್ದ ಎನ್ನಲಾಗಿದ್ದು, ಮನೆಯ ಟೆರೇಸ್‌ ಮೂಲಕ ಹಾರಿ ಪರಾರಿಯಾಗಿರುವ ಸಾಧ್ಯತಗಳಿವೆ ಎಂದು ಪೊಲೀಸರು ಹೇಳಿದ್ದಾರೆ. ಮನೆಯ ಮೇಲ್‌ ಛಾವಣಿಯ ಬಾಗಿಲು ತೆರೆದಿರುವುದು ಪೊಲೀಸರ ಈ ಅನುಮಾನಕ್ಕೆ ಕಾರಣವಾಗಿದೆ.

ವ್ಯಾಪಕ ಶೋಧ 

ಪೊಲೀಸರು ನಾಗನಿಗಾಗಿ ಭಾರೀ ಶೋಧ ಕಾರ್ಯಾಚರಣೆ ನಡೆಸುತ್ತಿದ್ದು , ಸುತ್ತಮುತ್ತಲೂ ಪರಿಶೀಲನೆ ನಡೆಸುತ್ತಿದ್ದಾರೆ. 

ಹೆಚ್ಚಿನ ಮಾಹಿತಿ ನಿರೀಕ್ಷಿಸಲಾಗುತ್ತಿದೆ.