ಉಕ್ರೇನ್‌ ಕೈಬಿಟ್ಟ ನ್ಯಾಟೋ

Team Udayavani, Feb 26, 2022, 7:35 AM IST

ಇದು ಉಕ್ರೇನ್‌ ಅಧ್ಯಕ್ಷ ವೋಲೋಡಿಮಿರ್‌ ಝೇಲೆನ್‌ಸ್ಕಿ ಅವರ ಅಳಲು. ವಿಶೇಷವೆಂದರೆ, 30 ವರ್ಷಗಳ ಹಿಂದೆ ಇದೇ ಉಕ್ರೇನ್‌, ಅಮೆರಿಕ, ಇಂಗ್ಲೆಂಡ್‌ ಮತ್ತು ರಷ್ಯಾವನ್ನು ನಂಬಿ ತನ್ನ ಬಳಿ ಇದ್ದ ಎಲ್ಲಾ ಅಣ್ವಸ್ತ್ರಗಳನ್ನು ತ್ಯಜಿಸಿತ್ತು. ಅಂದು ಬುಡಾಫೆಸ್ಟ್‌ನಲ್ಲಿ ಒಪ್ಪಂದವಾಗಿದ್ದು, ಅಮೆರಿಕ, ಇಂಗ್ಲೆಂಡ್‌ ಮತ್ತು ರಷ್ಯಾ ದೇಶಗಳು ಸಹಿ ಹಾಕಿದ್ದವು. ನೆರೆಹೊರೆಯಲ್ಲಿರುವ ನಾಟೋ ಗುಂಪಿನ ದೇಶಗಳೂ ಉಕ್ರೇನ್‌ ಬೆಂಬಲಕ್ಕೆ ಬರಲೇ ಇಲ್ಲ.

ಆದರೆ, ಈಗ ಎಲ್ಲವೂ ಬದಲಾಗಿದೆ. 2014ರಲ್ಲೇ ರಷ್ಯಾ, ಉಕ್ರೇನ್‌ಗೆ ತಾನು ಕೊಟ್ಟಿದ್ದ ಮಾತನ್ನು ಮುರಿದುಕೊಂಡಿದೆ. ಈಗ ರಷ್ಯಾ ಯುದ್ಧ ಸಾರಿದ ಮೇಲೆ ಅಮೆರಿಕ, ಇಂಗ್ಲೆಂಡ್‌ ದೇಶಗಳು ಉಕ್ರೇನ್‌ ಸಹಾಯಕ್ಕೆ ಬಂದಿಲ್ಲ. ಇದಕ್ಕೆ ಬದಲಾಗಿ ರಷ್ಯಾ ಮೇಲೆ ದಿಗ್ಬಂಧನದಂಥ ಕ್ರಮ ಜರುಗಿಸುತ್ತಿವೆಯೇ ಹೊರತು, ಉಕ್ರೇನ್‌ ಸಹಾಯಕ್ಕಾಗಿ ಸೇನೆ ಅಥವಾ ಶಸ್ತ್ರಾಸ್ತ್ರ ಒದಗಿಸುವ ಕೆಲಸ ಮಾಡಿಲ್ಲ.

ಹೀಗಾಗಿಯೇ ಉಕ್ರೇನ್‌ ಅಧ್ಯಕ್ಷರು, ಶುಕ್ರವಾರ ಜಗತ್ತಿನಲ್ಲಿ ನಾವೀಗ ಒಂಟಿಯಾಗಿದ್ದೇವೆ ಎಂದಿದ್ದು. ಇಡೀ ವಿವಾದ ಆರಂಭವಾಗಿದ್ದೇ ಉಕ್ರೇನ್‌, ನ್ಯಾಟೋಗೆ ಸೇರುವ ವಿಚಾರದಿಂದಾಗಿ. ಆರಂಭದಿಂದಲೂ ಉಕ್ರೇನ್‌ ಬೆನ್ನಿಗೆ ನಿಂತಿದ್ದ ನ್ಯಾಟೋ ದೇಶಗಳು, ಈಗ ದಿಢೀರನೇ ಸುಮ್ಮನಾಗಿವೆ. ಕಡೇ ಪಕ್ಷ ಉಕ್ರೇನ್‌ಗೆ ಸೇನಾ ಸಹಾಯವನ್ನಾದರೂ ಮಾಡಬಹುದಿತ್ತು. ಅದನ್ನೂ ಮಾಡಿಲ್ಲ. ಒಂದು ವೇಳೆ ಉಕ್ರೇನ್‌ ತನ್ನಲ್ಲಿದ್ದ ಅಣ್ವಸ್ತ್ರಗಳನ್ನು ಕಳೆದುಕೊಳ್ಳದಿದ್ದರೆ, ಇಂದು ರಷ್ಯಾ ದಾಳಿ ಮಾಡುವ ಪರಿಸ್ಥಿತಿಯೇ ಉದ್ಭವಿಸುತ್ತಿರಲಿಲ್ಲ.