ಭೂತಾನ್ನಿಂದ 17 ಸಾವಿರ ಮೆಟ್ರಿಕ್ ಟನ್ ಅಡಿಕೆ ಆಮದಿಗೆ ಅವಕಾಶ
Team Udayavani, Sep 30, 2022, 7:50 AM IST
ನವದೆಹಲಿ: ಭೂತಾನ್ನಿಂದ ಪ್ರತಿ ವರ್ಷ 17 ಸಾವಿರ ಟನ್ ತಾಜಾ ಅಡಕೆ ಆಮದು ಮಾಡಿಕೊಳ್ಳಲು ಕೇಂದ್ರ ಸರ್ಕಾರ ಬುಧವಾರ ಅನುಮತಿ ನೀಡಿದೆ. ಅದಕ್ಕೆ ಕನಿಷ್ಠ ಆಮದು ಶುಲ್ಕ ವಿಧಿಸದೇ ಇರಲೂ ಸರ್ಕಾರ ನಿರ್ಧರಿಸಿದೆ.
2017ರಲ್ಲಿ ಕೈಗೊಂಡಿದ್ದ ನಿರ್ಧಾರದ ಪ್ರಕಾರ ದೇಶೀಯ ಬೆಳೆಗಾರರ ಹಿತಾಸಕ್ತಿ ಕಾಪಾಡುವ ನಿಟ್ಟಿನಲ್ಲಿ ಪ್ರತಿ ಕೆಜಿ ಅಡಕೆಗೆ 251 ರೂ.ಕನಿಷ್ಠ ಆಮದು ಶುಲ್ಕ (ಮಿನಿಮಮ್ ಇಂಪೋರ್ಟ್ ಪ್ರೈಸ್) ವಿಧಿಸಲಾಗುತ್ತಿತ್ತು. ಈ ಕನಿಷ್ಠ ದರಕ್ಕಿಂತ ಕಡಿಮೆ ಪ್ರಮಾಣದಲ್ಲಿ ಆಮದು ಶುಲ್ಕ ವಿಧಿಸಲಾಗುತ್ತಿದ್ದರೆ, ಪ್ರಕ್ರಿಯೆಯ ಮೇಲೆ ನಿಷೇಧ ಹೇರಲಾಗುತ್ತಿತ್ತು.
ಪ್ರಸಕ್ತ ವಿತ್ತೀಯ ವರ್ಷದಲ್ಲಿ 8,500 ಮೆಟ್ರಿಕ್ ಟನ್ ಅಡಕೆ ಆಮದು ಮಾಡಲು ಅವಕಾಶ ಇದೆ. ಈ ಉದ್ದೇಶಕ್ಕಾಗಿ ವಿದೇಶಿ ವ್ಯಾಪಾರ ಮಹಾನಿರ್ದೇಶನಾಲಯದಿಂದ ನೋಂದಣಿ ಪ್ರಮಾಣ ಪತ್ರವನ್ನೂ ಪಡೆಯಬೇಕಾಗುತ್ತದೆ. ಇಂಥ ಪ್ರಮಾಣ ಪತ್ರ ಪಡೆದ ಸಂಸ್ಥೆಗೆ ಗರಿಷ್ಠವೆಂದರೆ 500 ಮೆಟ್ರಿಕ್ ಟನ್ ತಾಜಾ ಅಡಿಕೆ ಆಮದು ಮಾಡಲು ಅವಕಾಶ ಇದೆ.