ವಿಕಾಸ್ ಸೂಪರ್ ರೈಡ್ ಬೆಂಗಳೂರು ಬುಲ್ಸ್ ಅಗ್ರಸ್ಥಾನ ಗಟ್ಟಿ
Team Udayavani, Oct 30, 2022, 11:02 PM IST
ಪುಣೆ: ವಿಕಾಸ್ ಕಂಡೋಲ ಅವರ ಅಮೋಘ ಸೂಪರ್ ರೈಡ್ ಪರಾಕ್ರಮದಿಂದ ಬೆಂಗಳೂರು ಬುಲ್ಸ್ 9ನೇ ಪ್ರೊ ಕಬಡ್ಡಿ ಸೀಸನ್ನಲ್ಲಿ 6ನೇ ವಿಜಯೋತ್ಸವ ಆಚರಿಸಿದೆ. ರವಿವಾರದ ಮೊದಲ ಪಂದ್ಯದಲ್ಲಿ ಜೈಪುರ್ ಪಿಂಕ್ ಪ್ಯಾಂಥರ್ ವಿರುದ್ಧ 37-31 ಅಂತರದ ಗೆಲುವು ಸಾಧಿಸಿ ತನ್ನ ಅಗ್ರಸ್ಥಾನವನ್ನು ಇನ್ನಷ್ಟು ಗಟ್ಟಿಗೊಳಿಸಿದೆ.
ಕೊನೆಯ ಹಂತದಲ್ಲಿ ಎರಡೂ ತಂಡಗಳು 30-30 ಸಮಬಲದಲ್ಲಿದ್ದವು. ಪಂದ್ಯ ಟೈಗೊಳ್ಳುವ ಹಂತದಲ್ಲಿ ವಿಕಾಸ್ ಕಂಡೋಲ ಸೂಪರ್ ರೈಡ್ ಮೂಲಕ ಜೈಪುರವನ್ನು ಆಲೌಟ್ ಮಾಡಿ 5 ಅಂಕ ಗಳಿಸಿಕೊಟ್ಟರು. ಇದರೊಂದಿಗೆ ಬೆಂಗಳೂರು ರೋಚಕ ಗೆಲುವು ಸಾಧಿಸಿತು. ಕಂಡೋಲ ಗಳಿಕೆ 9 ಅಂಕ.
ಬುಲ್ಸ್ ಪರ ಭರತ್ ಅತ್ಯಧಿಕ 10 ಅಂಕ ತಂದಿತ್ತರು. ಇದರೊಂದಿಗೆ ಪ್ರಸಕ್ತ ಸೀಸನ್ನಲ್ಲಿ 100 ಅಂಕಗಳ ಗಡಿ ದಾಟಿದ ಹೆಗ್ಗಳಿಕೆಗೆ ಪಾತ್ರರಾದರು. ರೈಡರ್ ನೀರಜ್ ನರ್ವಾಲ್ ಕೂಡ ಅತ್ಯುತ್ತಮ ಪ್ರದರ್ಶನವಿತ್ತರು (5 ಅಂಕ). ಇದರಲ್ಲಿ 3 ಅಂಕ ಟ್ಯಾಕಲ್ ಮೂಲಕ ಬಂದದ್ದು ವಿಶೇಷ.
17ನೇ ನಿಮಿಷದಲ್ಲಿ ಜೈಪುರ್ ತಂಡದ ಭವಾನಿ ರಜಪೂತ್ ಸೂಪರ್ ರೈಡ್ ಮೂಲಕ ಅಂಕಗಳ ಅಂತರವನ್ನು ಕಡಿಮೆ ಮಾಡಿದರೂ ಲಾಭವಾಗಲಿಲ್ಲ. ಜೈಪುರ್ ಪರ ಅರ್ಜುನ್ ದೇಶ್ವಾಲ್ ಅತ್ಯಧಿಕ 10 ಅಂಕ, ನಾಯಕ ಸುನೀಲ್ ಕುಮಾರ್ 5 ಅಂಕ ಗಳಿಸಿದರು.