ಕೃಷ್ಣಾಷ್ಟಮಿ: ಮಕ್ಕಳ ಚಿಕಿತ್ಸೆಗೆ ವೇಷ ಹಾಕಲಿರುವ ರವಿ ಕಟಪಾಡಿ

Team Udayavani, Sep 12, 2017, 7:00 AM IST

ಉಡುಪಿ: ಕಳೆದ 3 ವರ್ಷಗಳಿಂದ ಶ್ರೀಕೃಷ್ಣ ಜನ್ಮಾಷ್ಟಮಿ ಸಂದರ್ಭ ವಿವಿಧ ವೇಷ ಧರಿಸಿ, ಬಡ ಮಕ್ಕಳಿಗೆ ನೆರವಾಗುತ್ತಿರುವ ರವಿ ಕಟಪಾಡಿ ಅವರು ಬಳಗದೊಂದಿಗೆ ಸೇರಿ ಈ ಬಾರಿಯೂ 4 ಮಕ್ಕಳ ಚಿಕಿತ್ಸೆಗೆ ನೆರವಾಗುವ ಮಹಾದಾಸೆ ಹೊಂದಿದ್ದಾರೆ. 

ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ರವಿ ಕೆ. ಅವರು ರವಿ ಮತ್ತು ಫ್ರೆಂಡ್ಸ್‌ ಕಟಪಾಡಿ ಬಳಗವು ಅನಾರೋಗ್ಯದಿಂದ ಬಳಲುತ್ತಿರುವ 4 ಬಡ ಮಕ್ಕಳ ಕುಟುಂಬಕ್ಕೆ ಆರ್ಥಿಕ ಸಹಾಯ ಹಸ್ತ ನೀಡುವ ಉದ್ದೇಶದಿಂದ ಸೆ. 13, 14ರಂದು ಕ್ರಾಂಪಸ್‌ ವೇಷ ತೊಟ್ಟು ಹಣ ಸಂಗ್ರಹಿಸಲು ಮುಂದಾಗಿದೆ. ಸೆ.13, ಬೆಳಗ್ಗೆ 7 ಗಂಟೆಗೆ ಗ್ರಾಂಪಸ್‌ ವೇಷದೊಂದಿಗೆ ಕಟಪಾಡಿಯಿಂದ ಹೊರಡಲಿದ್ದೇವೆ. 

ಕಟಪಾಡಿ, ಮಲ್ಪೆ, ಪಡುಕೆರೆ, ಉದ್ಯಾವರ, ಉಡುಪಿ, ನಿಟ್ಟೂರು, ರಾಜಾಂಗಣದಲ್ಲಿ ಪ್ರದರ್ಶನ ನೀಡಿ, ಸಂಗ್ರಹವಾಗುವ ಹಣವನ್ನು ಮಕ್ಕಳಿಗೆ ನೀಡಲಿದ್ದೇವೆ ಎಂದರು.

ಮೂಡುಬಿದಿರೆಯ ದರೆಗುಡ್ಡೆ – ಪಣಪಿಲ ಪುನಿಕೆಬೆಟ್ಟುವಿನ ಒಂದೂವರೆ ವರ್ಷದ ಲಾವಣ್ಯ, ಶಿವಮೊಗ್ಗದ ಶಾಹೀನಾ ಅವರ ಪುತ್ರಿ ಮೆಹಕ್‌ ಜಿ, ಉಡುಪಿ ದೆಂದೂರುಕಟ್ಟೆಯ ಸುನೀತಾ ಪ್ರಕಾಶ್‌ ಅವರ ಒಂದುವರೆ ತಿಂಗಳಿನ ಮಗು ಹಾಗೂ ಬನ್ನಂಜೆಯ ಎಳೆಯ ಮಗುವಿಗೆ ಆರ್ಥಿಕ ಸಹಾಯ ಹಸ್ತ ನೀಡಲಿದ್ದಾರೆ.

ಈ ವೇಷಕ್ಕಾಗಿ ನನ್ನ 75ಕ್ಕೂ ಅಧಿಕ ಸ್ನೇಹಿತರು ದುಡಿಯುತ್ತಿದ್ದು, ಸಂಗ್ರಹವಾದ ಹಣವನ್ನು ಸಮನಾಗಿ ಹಂಚಿ ನಾಲ್ವರು ಮಕ್ಕಳ ಚಿಕಿತ್ಸೆಗೆ ನೀಡಲಿದ್ದೇವೆ. ಸೆ. 19ರ ಸಂಜೆ 4 ಗಂಟೆಗೆ ಕಟಪಾಡಿ ವಿಜಯ ಬ್ಯಾಂಕಿನ ಬಳಿ ಅರ್ಹ ಫಲಾನುಭವಿಗಳಿಗೆ ವಿತರಿಸಲಾಗುವುದು. ಕಾರ್ಯಕ್ರಮದಲ್ಲಿ ಕೇಮಾರು ಮಠದ ಶ್ರೀ ಈಶ ವಿಠಲದಾಸ ಶ್ರೀಪಾದರು, ಜಿಲ್ಲಾಧಿಕಾರಿ ಪ್ರಿಯಾಂಕಾ ಮೇರಿ ಫ್ರಾನ್ಸಿಸ್‌ ಹಾಗೂ ಎಸ್ಪಿ ಡಾ| ಸಂಜೀವ್‌ ಎಂ. ಪಾಟೀಲ್‌ ಭಾಗವಹಿಸಲಿದ್ದಾರೆ ಎಂದರು.

ನೀವು ನೆರವು ನೀಡಬಹುದು ಆರೋಗ್ಯ ಸಮಸ್ಯೆಯಿಂದ ಬಳಲು ತ್ತಿರುವ ಮಕ್ಕಳ ಚಿಕಿತ್ಸೆ ವೆಚ್ಚಕ್ಕಾಗಿ ವೇಷ ಹಾಕುವ ರವಿ ಕೆ. ಅವರ ಸಾಮಾಜಿಕ ಕಾರ್ಯಕ್ಕೆ ಕೈ ಜೋಡಿಸುವ ದಾನಿಗಳು ಪಾಂಗಾಳ ವಿಜಯ ಬ್ಯಾಂಕಿನ ಎಸ್‌ಬಿ ಖಾತೆ: 117206331000013 (ಐಎಫ್‌ಎಸ್‌ಸಿ ಕೋಡ್‌: VIGB 0001172) ಗೆ ಜಮಾ ಮಾಡಬಹುದು. 
ಸುದ್ದಿಗೋಷ್ಠಿಯಲ್ಲಿ ಪ್ರಾಧ್ಯಾಪಕ ದಯಾನಂದ, ಸುಧೀಶ್‌, ಚರಣ್‌ರಾಜ್‌, ಅರುಣ್‌ ಉಪಸ್ಥಿತರಿದ್ದರು.