ಬರ್ತ್ ಡೇ ದಿನ ಜ್ಯೂಸ್ ಎಂದು ಆ್ಯಸಿಡ್ ಕುಡಿದು ಬಾಲಕರಿಬ್ಬರ ಸಾವು

Team Udayavani, Sep 28, 2017, 11:09 AM IST

 ಬೆಂಗಳೂರು: ಜನ್ಮದಿನದ ಸಂಭ್ರಮದಲ್ಲಿದ್ದ ಬಾಲಕರಿಬ್ಬರು ಜ್ಯೂ ಸ್ ಎಂದು ಭಾವಿಸಿ ಆ್ಯಸಿಡ್ ಕುಡಿದು ದಾರುಣವಾಗಿ ಸಾವನ್ನಪ್ಪಿರುವ ಘಟನೆ ನಗರದ ಅವೆನ್ಯೂ ರೋಡ್ ನ ಕಿಲಾರೆ ರಸ್ತೆಯಲ್ಲಿ ಬುಧವಾರ ರಾತ್ರಿ ನಡೆದಿದೆ. 

ಹುಟ್ಟು ಹಬ್ಬದ ಆಚರಣೆಯಲ್ಲಿದ್ದ ಆಭರಣ ತಯಾರಕ ಶಂಕರ್ ಸಿಂಗ್ ರ ಪುತ್ರ ಸಾಯಿಲ್ ಸಿಂಗ್(9) ಮತ್ತು ಪಕ್ಕದ ಮನೆಯ ಆರ್ಯನ್ ಸಿಂಗ್(8) ಆಟವಾಡುತ್ತ ಸಾಫ್ಟ್ ಡ್ರಿಂಕ್ಸ್ ಬಾಟಲಿಯಲ್ಲಿದ್ದ ಸಲ್ಫ್ಯೂರಿಕ್  ಆ್ಯಸಿಡನ್ನು ಕುಡಿದೇ  ಬಿಟ್ಟಿದ್ದಾರೆ. ಕೂಡಲೇ ಇಬ್ಬರನ್ನು ಆಸ್ಪತ್ರೆಗೆ ಸಾಗಿಸಲು ಯತ್ನಿಸಲಾಯಿತಾದರೂ ಇಬ್ಬರೂ  ಮಾರ್ಗ ಮಧ್ಯದಲ್ಲೇ ಕೊನೆಯುಸಿರೆಳೆದಿದ್ದಾರೆ . 

ಚಿನ್ನವನ್ನು ಕರಗಿಸಲೆಂದು ಆ್ಯಸಿಡನ್ನು ತಂದಿಡಲಾಗಿತ್ತು ಎಂದು ತಿಳಿದು ಬಂದಿದೆ. ಬಾಲಕರಿಬ್ಬರ ಮನೆಯವರ ಆಕ್ರಂದನ ಮುಗಿಲು ಮುಟ್ಟಿತ್ತು. 

ಸಿಟಿ ಮಾರ್ಕೆಟ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.