ಸಿಲೆಬೆಸ್ ಗೊಂದಲ: ಪರೀಕ್ಷೆ ಬರೆಯದೇ ಕಣ್ಣೀರಿಟ್ಟ ವಿದ್ಯಾರ್ಥಿನಿ
Team Udayavani, Mar 2, 2018, 4:13 PM IST
ದೇವದುರ್ಗ: 2012ನೇ ಸಾಲಿನಲ್ಲಿ ಪಿಯು ಪ್ರವೇಶ ಪಡೆದಿದ್ದ ವಿದ್ಯಾರ್ಥಿನಿ ಹೊಸ ಸಿಲೆಬೆಸ್ ಓದಿ ಅರ್ಥಶಾಸ್ತ್ರ ಪರೀಕ್ಷೆ ಬರೆಯಲು ಆಗಮಿಸಿದ್ದಳು. ಆದರೆ, ಹಳೇ ಸಿಲೆಬೆಸ್ ಪ್ರಶ್ನೆ ಪತ್ರಿಕೆ ನೀಡಿದ್ದರಿಂದ ಕಣ್ಣೀರಿಟ್ಟ ವಿದ್ಯಾರ್ಥಿನಿಯೂ ಪರೀಕ್ಷೆ ಬರೆಯದೇ ಮನೆಗೆ ತೆರಳಿದ ಘಟನೆ ಗುರುವಾರ ನಡೆದಿದೆ.
ಆಗಿದ್ದೇನು?: ಜಾಲಹಳ್ಳಿ ಸರಕಾರಿ ಪದವಿ ಪೂರ್ವ ಕಾಲೇಜಿನಲ್ಲಿ 2012ನೇ ಸಾಲಿನಲ್ಲಿ ಸೋಮನಮರಡಿ ಗ್ರಾಮದ ಸುನೀತಾ ಎಂಬ ವಿದ್ಯಾರ್ಥಿನಿ ವಾಣಿಜ್ಯ ವಿಭಾಗದಲ್ಲಿ ಪ್ರವೇಶ ಪಡೆದಿದ್ದಳು.
ಆದರೆ ಅನಾರೋಗ್ಯದ ನಿಮಿತ್ತ ಕಾಲೇಜಿಗೆ ಹೋಗಿರಲಿಲ್ಲ. 2018ರಲ್ಲಿ ದ್ವಿತೀಯ ಪಿಯು ಅರ್ಥಶಾಸ್ತ್ರ ಪರೀಕ್ಷೆ ಬರೆಯಲು ನೋಂದಣಿ ಮಾಡಿದ್ದಳು. ಗುರುವಾರ ಪಟ್ಟಣದ ಬಾಲಕರ ಪದವಿ ಪೂರ್ವ ಕಾಲೇಜಿಗೆ ಆಗಮಿಸಿದ ಸುನೀತಾ, ಅರ್ಥಶಾಸ್ತ್ರ ಪರೀಕ್ಷೆ ಆರಂಭವಾಗುತ್ತಿದ್ದಂತೆ ಪ್ರಶ್ನೆ ಪತ್ರಿಕೆ ನೋಡಿ ಆಶ್ಚರ್ಯವಾಗಿದೆ.
ಕಾರಣ ವರ್ಷವೀಡಿ ಪರೀಕ್ಷೆ ತಯಾರಿಗೆ ಓದಿದ್ದು ಹೊಸ ಸಿಲೆಬೆಸ್. ಪ್ರಶ್ನೆ ಪತ್ರಿಕೆ ನೀಡಿದ್ದು ಹಳೇ ಸಿಲೆಬೆಸ್. ಇದರಿಂದ ಗೊಂದಲಕ್ಕೀಡಾದ ವಿದ್ಯಾರ್ಥಿನಿ, ಅಧಿಕಾರಿಗಳಿಗೆ ಎಷ್ಟೇ ಮನವಿ ಮಾಡಿಕೊಂಡರು ಹಳೇ ಸಿಲೆಬೆಸ್ ನಲ್ಲಿಯೇ ಪರೀಕ್ಷೆ ಬರೆಯಬೇಕು ಎಂದು ಹೇಳಿದರು. ಗೊಂದಲ ಮಧ್ಯೆ ವಿದ್ಯಾರ್ಥಿನಿ ಪರೀಕ್ಷೆ ಬರೆಯದೇ ಕಣ್ಣೀರಿಟು ಸ್ವಗ್ರಾಮಕ್ಕೆ ತೆರಳಿದಳು.