ಸಹ ಜೀವನಕ್ಕೆ ಇಲ್ಲ ನಿರ್ಬಂಧ : ಸುಪ್ರೀಂಕೋರ್ಟ್‌ ಮಹತ್ವದ ಆದೇಶ

Team Udayavani, May 7, 2018, 8:10 AM IST

ಹೊಸದಿಲ್ಲಿ : ವಿವಾಹ ವಯಸ್ಸು 21 ಪೂರೈಸದಿರುವ ಪುರುಷನ ಜತೆಗೆ 20ರ ಯುವತಿ ಸಹ ಜೀವನ (ಲಿವ್‌- ಇನ್‌- ರಿಲೇಷನ್‌ಶಿಪ್‌) ನಡೆಸಲು ಅವಕಾಶ ಇದೆ ಎಂದು ಸುಪ್ರೀಂಕೋರ್ಟ್‌ ಅಭಿಪ್ರಾಯಪಟ್ಟಿದೆ. ಕೇರಳದ ಯುವ ಜೋಡಿಗೆ ಸಂಬಂಧಿಸಿದ ಪ್ರಕರಣ ಇದಾಗಿದ್ದು, ಕಳೆದ ವರ್ಷ ನಡೆದಿದ್ದ ಅವರ ವಿವಾಹ ರದ್ದು ಮಾಡಿದ್ದ ಹೈಕೋರ್ಟ್‌ ತೀರ್ಪನ್ನೂ ಸುಪ್ರೀಂ ಕೋರ್ಟ್‌ ಒಪ್ಪಿಲ್ಲ.

ಕೇರಳದ ತುಷಾರ (20) ಎಂಬ ಯುವತಿಯ ತಂದೆಯು, ‘ನಂದಕುಮಾರ್‌ ಎಂಬ ಯುವಕ ಪುತ್ರಿಯನ್ನು ಅಪಹರಿಸಿಕೊಂಡು ಹೋಗಿ ಮದುವೆಯಾಗಿದ್ದಾನೆ. ಹೀಗಾಗಿ ಅವರ ವಿವಾಹವನ್ನು ರದ್ದು ಮಾಡಬೇಕು’ ಎಂದು ಹೈಕೋರ್ಟ್‌ಗೆ ಮನವಿ ಮಾಡಿದ್ದರು. ಮದುವೆ ವೇಳೆ ನಂದಕುಮಾರ್‌ ಗೆ ವಯಸ್ಸು 20 ಆಗಿರಲಿಲ್ಲ ಎಂದು ಯುವತಿ ತಂದೆ ವಾದಿಸಿದ್ದರು. ಹೀಗಾಗಿ ಕೇರಳ ಹೈಕೋರ್ಟ್‌ ಮದುವೆ ಅಸಿಂಧುಗೊಳಿಸಿ, ಯುವತಿಯನ್ನು ತಂದೆಯ ವಶಕ್ಕೆ ಒಪ್ಪಿಸಿತ್ತು.

ಈ ಕುರಿತ ಮೇಲ್ಮನವಿ ವಿಚಾರಣೆ ನಡೆಸಿದ ಸುಪ್ರೀಂಕೋರ್ಟ್‌ ನ್ಯಾ| ಎ.ಕೆ.ಸಿಕ್ರಿ ಮತ್ತು ನ್ಯಾ| ಅಶೋಕ್‌ ಭೂಷಣ್‌ ಅವರನ್ನೊಳಗೊಂಡ ನ್ಯಾಯಪೀಠ, ‘ಅವರು ವೈವಾಹಿಕ ಜೀವನ ನಡೆಸಲು ಸಾಧ್ಯವಿಲ್ಲದಿದ್ದರೂ, ಸಹ ಜೀವನ (ಲಿವ್‌- ಇನ್‌- ರಿಲೇಷನ್‌ಶಿಪ್‌) ನಡೆಸಲು ಅವಕಾಶ ಇದೆ. ಸಹ ಜೀವನಕ್ಕೆ ನಮ್ಮ ಕಾನೂನಿನಲ್ಲೂ ಮಾನ್ಯತೆ ನೀಡಲಾಗಿದೆ. ಅದು ಕೌಟುಂಬಿಕ ದೌರ್ಜನ್ಯ ತಡೆ ಕಾಯ್ದೆಯ ವ್ಯಾಪ್ತಿಗೆ ಬರುತ್ತದೆ. ಹಾಗಾಗಿ ಯುವಕ ತನಗಿಂತ ಕಿರಿಯ ವಯಸ್ಸಿನವನಾಗಿದ್ದರೂ ಅವನೊಂದಿಗೆ ಬದುಕುವುದು ಯುವತಿಯ ಆಯ್ಕೆಗೆ ಬಿಟ್ಟಿದ್ದು ಎಂದು ಹೇಳಿದೆ. ಪ್ರಾಪ್ತ ವಯಸ್ಕರು ತಮ್ಮ ತಮ್ಮನ್ನು ತಾವು ರಕ್ಷಿಸಿಕೊಳ್ಳಲು ಅಸಾಧ್ಯವಾದಾಗ ಸರಕಾರವೇ ಅವರ ನೆರವಿಗೆ ಬರಬೇಕು ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.