ಆಂಬುಲೆನ್ಸ್ ನಲ್ಲೆ ಹೆರಿಗೆ : 108 ಸಿಬ್ಬಂದಿಯ ಸಾಧನೆಗೆ ಪ್ರಶಂಸೆ

Team Udayavani, Oct 20, 2018, 2:21 PM IST

ಬೆಳ್ತಂಗಡಿ : ತುಂಬು ಗರ್ಭಿಣಿ ಒಬ್ಬರನ್ನು  ಆಂಬುಲೆನ್ಸ್ (108)ನಲ್ಲಿ ಆಸ್ಪತ್ರೆಗೆ ಕರೆದುಕೊಂಡು ಹೋಗುವ ಸಂದರ್ಭದಲ್ಲಿ ತೀವ್ರತರದ ನೋವು ಕಾಣಿಸಿಕೊಂಡ ಪರಿಣಾಮ ಆಂಬುಲೆನ್ಸ್ ಸಿಬ್ಬಂದಿಯೇ ಮಹಿಳೆಗೆ ಹೆರಿಗೆ ಮಾಡಿಸಿದ ಘಟನೆ ಶನಿವಾರ ನಡೆದಿದೆ. 

ಪುಂಜಾಲಕಟ್ಟೆ ವ್ಯಾಪ್ತಿಯ ಮಾಲಾಡಿ ಗ್ರಾಮದ ನಿವಾಸಿ ವಿನುತಾ ವೇಗಸ್ ಆಂಬುಲೆನ್ಸ್ ನಲ್ಲಿ ಹೆಣ್ಣು ಮಗುವಿಗೆ ಜನ್ಮ ನೀಡಿದರು. ಶನಿವಾರ ಬೆಳಗಿನ ಜಾವ ವಿನುತಾ ಅವರಿಗೆ ಹೆರಿಗೆ ನೋವು ಕಾಣಿಸಿಕೊಂಡ ಕಾರಣ ಉಜಿರೆಯ 108  ಆಂಬುಲೆನ್ಸ್ ನಲ್ಲಿ ಮಂಗಳೂರಿನ ಆಸ್ಪತ್ರೆಗೆ ಕರೆದೊಯ್ಯಲಾಗುತ್ತಿತ್ತು.

ದಾರಿ ಮಧ್ಯೆ ನೋವು ವಿಪರೀತವಾದಾಗ ಪರಿಸ್ಥಿತಿ ಅರಿತ ಆಂಬುಲೆನ್ಸ್ ಸಿಬ್ಬಂದಿ ಡೆನ್ನಿಸ್ ಅವರು ವಿನುತಾ ಅವರಿಗೆ ಯಶಸ್ವಿಯಾಗಿ  ಹೆರಿಗೆ ನಡೆಸಿದರು. ತಾಯಿ ಮತ್ತು ಹೆಣ್ಣು ಮಗು ಆರೋಗ್ಯವಾಗಿದ್ದು ಸೂಕ್ತ ಸಮಯಕ್ಕೆ ಬಂಟ್ವಾಳ ಸರಕಾರಿ ಆಸ್ಪತ್ರೆಗೆ ಸೇರಿಸಲಾಗಿದೆ. ಆಂಬುಲೆನ್ಸ್ ಸಿಬ್ಬಂದಿಯ ಸಾಧನೆಗೆ ಸಾರ್ವಜನಿಕರಿಂದ ಪ್ರಶಂಸೆ ವ್ಯಕ್ತವಾಗಿದೆ.