ನಕಲಿ ವೀಸಾ: ಮೂವರು ಬಾಂಗ್ಲಾ ಪ್ರಜೆಗಳ ಬಂಧನ

Team Udayavani, Mar 18, 2019, 6:35 AM IST

ಬೆಂಗಳೂರು: ನಕಲಿ ವೀಸಾ ಬಳಸಿ ಮಲೇಶಿಯಾಗೆ ಪ್ರಯಾಣಿಸಲು ಆಗಮಿಸಿದ್ದ ಮೂವರು ಬಾಂಗ್ಲಾಪ್ರಜೆಗಳನ್ನು ವಲಸೆ ಅಧಿಕಾರಿಗಳು ಬಂಧಿಸಿದ್ದಾರೆ. ಮಿಲಾನ್‌ ಮಂಡಲ್‌, ರಸುಲ್‌ ಸತ್ತರ್‌ ಶೇಖ್‌, ಹೈದರ್‌ ಯೂನಾಶ್‌ ಅಲಿ ಬಂಧಿತರು.

ಆರೋಪಿಗಳ ವಿರುದ್ಧ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ತನಿಖೆ ಮುಂದುವರಿದಿದೆ. ಮಾ. 15ರಂದು ಮಲೇಷ್ಯಾಗೆ ತೆರಳಲು ಮೂವರು ಆರೋಪಿಗಳು ಆಗಮಿಸಿದ್ದರು. ಚೆಕ್‌ ಇನ್‌ ಸಂದರ್ಭದಲ್ಲಿ ಇವರ ನಡವಳಿಕೆ ಮೇಲೆ ಅನುಮಾನ ಬಂದು ವಲಸೆ ಅಧಿಕಾರಿಗಳು ವಶಕ್ಕೆ ಪಡೆದು ಪರಿಶೀಲನೆ ನಡೆಸಿದಾಗ ನಕಲಿ ವೀಸಾಗಳನ್ನು ಹೊಂದಿರುವುದು ಪತ್ತೆಯಾಗಿದೆ.

ಆರೋಪಿಗಳು ಕೆಲವರ್ಷಗಳ ಹಿಂದೆ ಬಾಂಗ್ಲಾ ಮೂಲಕ ಅಕ್ರಮವಾಗಿ ದೇಶದೊಳಕ್ಕೆ ನುಸುಳಿರುವುದು ಮೇಲ್ನೋಟಕ್ಕೆ ಕಂಡು ಬಂದಿದ್ದು, ತನಿಖೆ ಮುಂದುವರಿಸಲಾಗಿದೆ ಎಂದು ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದರು.