ಲೋಕಲ್ ಸಮರ: ಶೇ.77.71 ಮತದಾನ

ಸ್ಥಳೀಯ ಸಂಸ್ಥೆಗಳ ಚುನಾವಣೆ ಶಾಂತಿಯುತ • 58,909 ಮತದಾರರ ಪೈಕಿ 45,780 ಮಂದಿ ಹಕ್ಕು ಚಲಾವಣೆ

Team Udayavani, May 30, 2019, 12:08 PM IST

ಶಿಡ್ಲಘಟ್ಟ ನಗರಸಭೆ 31 ವಾರ್ಡ್‌ಗಳಿಗೆ ನಡೆದ ಚುನಾವಣೆ ವೇಳೆ ಮತಗಟ್ಟೆಯೊಂದರಲ್ಲಿ ಮತದಾನಕ್ಕೆ ಸಾಲುಗಟ್ಟಿ ನಿಂತಿರುವ ಮತದಾರರು.

ಚಿಕ್ಕಬಳ್ಳಾಪುರ: ಜಿಲ್ಲೆಯ ಶಿಡ್ಲಘಟ್ಟ ನಗರಸಭೆಯ 31 ಹಾಗೂ ಬಾಗೇಪಲ್ಲಿ ಪುರಸಭೆಯ 23 ವಾರ್ಡ್‌ಗಳಿಗೆ ಬುಧವಾರ ನಡೆದ ಮತದಾನ ಯಾವುದೇ ಅಹಿತಕರ ಘಟನೆಗಳಿಗೆ ಅವಕಾಶ ಇಲ್ಲದಂತೆ ಶಾಂತಿಯುತವಾಗಿದ್ದು ತೆರೆ ಕಂಡಿದ್ದು, ಜಿಲ್ಲೆಯಲ್ಲಿ ಒಟ್ಟಾರೆ ಶೇ.77.71 ರಷ್ಟು ಮತದಾನ ದಾಖಲಾಗಿದೆ.

ಜಿಲ್ಲೆಯ ಶಿಡ್ಲಘಟ್ಟ ನಗರಸಭೆ ಹಾಗೂ ಬಾಗೇಪಲ್ಲಿ ಪುರಸಭೆ ಸೇರಿ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ 29,296 ಮಂದಿ ಪುರುಷರು, 29,604 ಮಹಿಳೆಯರು ಇತರೆ 4 ಸೇರಿ ಒಟ್ಟು 58,909 ಮತದಾರರ ಪೈಕಿ 023,021 ಮಂದಿ ಮಹಿಳೆಯರು, 22,758 ಮಂದಿ ಮಹಿಳೆಯರು ಇತರೆ 1 ಸೇರಿ ಒಟ್ಟು 45,780 ಮಂದಿ ತಮ್ಮ ಹಕ್ಕು ಚಲಾವಣೆ ಮಾಡುವ ಮೂಲಕ ಜಿಲ್ಲೆಯಲ್ಲಿ ಒಟ್ಟು ಶೇ.77.71 ಮತದಾನ ದಾಖಲಾಗಿದೆ.

ಬಾಗೇಪಲ್ಲಿ ಪುರಸಭೆ (ಶೇ.79.28): ಬಾಗೇಪಲ್ಲಿ ಪುರಸಭೆಯ ಒಟ್ಟು 23 ವಾರ್ಡ್‌ಗಳಿಗೆ ಒಟ್ಟು 24 ಮತಗಟ್ಟೆ ಸ್ಥಾಪಿಸಲಾಗಿದ್ದು ಬೆಳಗ್ಗೆ 7 ಗಂಟೆಗೆ ಆರಂಭಗೊಂಡ ಮತದಾನ ಬೆಳಗ್ಗೆ ಸ್ವಲ್ಪ ಬಿರುಸಿನಿಂದ ಸಾಗಿ ಮಧ್ಯಾಹ್ನ 3 ಗಂಟೆಗೆ ಶೇ.60 ರಷ್ಟು ಮತದಾನ ದಾಖಲಾಗಿತ್ತು.

ಸಂಜೆ ಮತದಾನ ಮುಗಿಯುವ ವೇಳೆ ಒಟ್ಟು 10,430 ಪುರುಷರು, 10.857 ಮಂದಿ ಮಹಿಳೆಯರು ಇತರೆ 3 ಸೇರಿ ಒಟ್ಟು 21,290 ಮಂದಿ ಮತದಾರರು ಪೈಕಿ 8,248 ಪುರುಷರು, 8,631 ಮಹಿಳೆಯರು ಸೇರಿ ಒಟ್ಟು 16,879 ಮಂದಿ ತಮ್ಮ ಹಕ್ಕು ಚಲಾವಣೆ ಮಾಡಿದ್ದು, ಆ ಪೈಕಿ ಪುರುಷರು ಸರಾಸರಿ ಶೇ.79.08 ಹಾಗೂ ಮಹಿಳೆಯರದು ಶೇ.79.50 ಸೇರಿ ಒಟ್ಟು 79.28 ರಷ್ಟು ಮತದಾನ ದಾಖಲಾಗಿದೆ.

ಶಿಡ್ಲಘಟ್ಟ ನಗರಸಭೆ (ಶೇ.77.27): ಜಿಲ್ಲೆಯ ರೇಷ್ಮೆ ನಗರಿ ಶಿಡ್ಲಘಟ್ಟದ ಒಟ್ಟು 31 ವಾರ್ಡ್‌ಗಳಿಗೆ 44 ಮತಗಟ್ಟೆಗಳಲ್ಲಿ ನಡೆದ ಚುನಾವಣೆಯಲ್ಲಿ 18,866 ಪುರುಷರು, 18,747 ಮಹಿಳೆಯರು ಇತರೆ 6 ಸೇರಿ ಒಟ್ಟು 37,619 ಮಂದಿ ಮತದಾರರ ಪೈಕಿ 14,773 ಪುರುಷರು, 14,127 ಮಹಿಳೆಯರು ಇತರೆ 1 ಸೇರಿ ಒಟ್ಟು 28,901 ಮತದಾರರು ತಮ್ಮ ಹಕ್ಕು ಚಲಾವಣೆ ಮಾಡಿದ್ದಾರೆ. ಈ ಪೈಕಿ ಚುನಾವಣೆಯಲ್ಲಿ ಪುರುಷರು ಸರಾಸರಿ ಶೇ.78.47 ಹಾಗೂ ಮಹಿಳೆಯರು ಶೇ.76.08 ರಷ್ಟು ಇತರರು ಶೇ.16.67 ರಷ್ಟು ಸೇರಿ ಒಟ್ಟು 76.83 ರಷ್ಟು ಮತದಾನ ದಾಖಲಾಗಿದೆ ಎಂದು ಜಿಲ್ಲಾಡಳಿತ ತಿಳಿಸಿದೆ.

ಶಾಂತಿಯುತ ಮತದಾನ: ಜಿಲ್ಲೆಯ ಬಾಗೇಪಲ್ಲಿ ಹಾಗೂ ಶಿಡ್ಲಘಟ್ಟ ಸ್ಥಳೀಯ ಸಂಸ್ಥೆಗಳಿಗೆ ನಡೆದ ಚುನಾವಣೆ ಶಾಂತಿಯುತವಾಗಿ ಮುಗಿದಿದ್ದು, ರಾಜಕೀಯ ಪಕ್ಷಗಳ ಅಭ್ಯರ್ಥಿಗಳು, ಕಾರ್ಯಕರ್ತರು ಚುನಾವಣೆಯ ಕೊನೆ ಗಳಿಗೆಯವರೆಗೂ ಕೂಡ ಮತದಾರರನ್ನು ತಮ್ಮತ್ತ ಸೆಳೆಯಲು ವಿವಿಧ ಆಸೆ, ಆಮಿಷ ತೋರುತ್ತಿದ್ದ ದೃಶ್ಯಗಳು ಸಾಮಾನ್ಯವಾಗಿತ್ತು.

ಮತದಾರರು ಅಭ್ಯರ್ಥಿಗಳೇ ಮತಗಟ್ಟೆಗಳಿಗೆ ಕರೆ ತಂದು ಮತದಾನ ಮಾಡಿಸುತ್ತಿದ್ದರು. ವಯೋ ವೃದ್ಧರು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ರೋಗಿಗಳು ಸೇರಿದಂತೆ ವಿಕಲಚೇತನರು, ಮಹಿಳೆಯರು ಮತಗಟ್ಟೆಗಳಿಗೆ ಆಗಮಿಸಿ ಸರದಿ ಸಾಲಿನಲ್ಲಿ ನಿಂತು ಹಕ್ಕು ಚಲಾವಣೆ ಮಾಡಿದರು.ಬಾಗೇಪಲ್ಲಿಯಲ್ಲಿ ಮಾಜಿ ಶಾಸಕ ಜಿ.ವಿ.ಶ್ರೀರಾಮರೆಡ್ಡಿ ಸೇರಿದಂತೆ ಮತ್ತಿತರರು ಮತದಾನ ಮಾಡಿದರು.

ಶುಕ್ರವಾರ 210 ಅಭ್ಯರ್ಥಿಗಳ ಭವಿಷ್ಯ ಪ್ರಕಟ
ಜಿಲ್ಲೆಯ ಶಿಡ್ಲಘಟ್ಟ ನಗರಸಭೆಯ 31 ವಾರ್ಡ್‌ಗಳಿಗೂ ಸೇರಿ ಒಟ್ಟು 115 ಅಭ್ಯರ್ಥಿಗಳು ಕಣದಲ್ಲಿದ್ದರೆ ಬಾಗೇಪಲ್ಲಿ ಪುರಸಭೆಯ ಒಟ್ಟು 23 ವಾರ್ಡ್‌ಗಳಿಗೆ 95 ಅಭ್ಯರ್ಥಿಗಳು ಅಖಾಡದಲ್ಲಿದ್ದು, ಒಟ್ಟಾರೆ ಜಿಲ್ಲೆಯಲ್ಲಿ ನಡೆದಿರುವ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ 210 ಮಂದಿ ಅಭ್ಯರ್ಥಿಗಳು ತಮ್ಮ ರಾಜಕೀಯ ಅದೃಷ್ಟ ಪರೀಕ್ಷೆಗೆ ಮುಂದಾಗಿದ್ದಾರೆ. ಆಯಾ ತಾಲೂಕು ಕೇಂದ್ರದಲ್ಲಿಯೇ ಮೇ 31 ರಂದು ಬೆಳಗ್ಗೆ 8 ಗಂಟೆಗೆ ಮತ ಎಣಿಕೆ ಕಾರ್ಯ ನಡೆದು ಮಧ್ಯಾಹ್ನ 12ಕ್ಕೆ ಫ‌ಲಿತಾಂಶ ಹೊರ ಬೀಳಲಿದೆ. ಮತ ಎಣಿಕೆ ಕಾರ್ಯಕ್ಕೆ ತಾಲೂಕು ಆಡಳಿತಗಳು ಸಕಲ ಸಿದ್ಧತೆ ಮಾಡಿಕೊಂಡಿವೆ.

ಕುತೂಹಲ ಕೆರಳಿಸಿದ ಫ‌ಲಿತಾಂಶ
ಸ್ಥಳೀಯ ಸಂಸ್ಥೆಗಳ ಚುನಾವಣೆಯ ಮತ ಎಣಿಕೆಗೆ ಕೇವಲ ಒಂದು ದಿನ ಮಾತ್ರ ಬಾಕಿಯಿದ್ದು ರಾಜಕೀಯ ಪಕ್ಷಗಳಿಗೆ ಚುನಾವಣೆ ಫ‌ಲಿತಾಂಶ ಸಾಕಷ್ಟು ಮಹತ್ವ ಪಡೆದುಕೊಂಡಿದೆ. ಕಳೆದ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ವಿರುದ್ಧ ಸೋತಿರುವ ಕಾಂಗ್ರೆಸ್‌, ಜೆಡಿಎಸ್‌ ಪಕ್ಷಗಳಿಗೆ ಲೋಕಲ್ ಕದನದ ಫ‌ಲಿತಾಂಶ ಪ್ರತಿಷ್ಠೆಯಾಗಿದೆ. ಶಿಡ್ಲಘಟ್ಟ ನಗರಸಭೆ ವ್ಯಾಪ್ತಿಯಲ್ಲಿ ಕಾಂಗ್ರೆಸ್‌ 31, ಬಿಜೆಪಿ 12, ಜೆಡಿಎಸ್‌ 31, ಬಿಎಸ್‌ಪಿ 6, ಸಮಾಜವಾದಿ ಪಕ್ಷ 1, ಕೆಜೆಪಿ 1, ಎಸ್‌ಡಿಪಿಐ 1, ಪಕ್ಷೇತರರು 32 ಮಂದಿ ಸೇರಿ ಒಟ್ಟು ಕಣದಲ್ಲಿ 115 ಮಂದಿ ಇದ್ದರೆ ಬಾಗೇಪಲ್ಲಿ ಪುರಸಭೆಯಲ್ಲಿ ಕಾಂಗ್ರೆಸ್‌ 23, ಬಿಜೆಪಿ 14, ಸಿಪಿಎಂ 20, 30 ಪಕ್ಷೇತರರು ಸೇರಿ ಒಟ್ಟು 95 ಮಂದಿ ಅಭ್ಯರ್ಥಿಗಳಿದ್ದಾರೆ.