ರೀಲ್ v/s ರಿಯಲ್ ಲೈಫ್ ಕಥಾಹಂದರದ “ಗಂಟುಮೂಟೆ” ಸಿನಿಮಾ ಟ್ರೇಲರ್ ಬಿಡುಗಡೆ
Team Udayavani, Sep 28, 2019, 4:57 PM IST
ಬೆಂಗಳೂರು: ಹೊಸಬರೇ ಸೇರಿ ಮಾಡಿದ “ಗಂಟುಮೂಟೆ” ಕನ್ನಡ ಸಿನಿಮಾದ ಟ್ರೇಲರ್ ಬಿಡುಗಡೆಯಾಗಿದ್ದು, ಒಂದೇ ದಿನದಲ್ಲಿ ಯೂಟ್ಯೂಬ್ ನಲ್ಲಿ 23ಸಾವಿರ ಮಂದಿ ವೀಕ್ಷಿಸಿದ್ದಾರೆ.
ಈ ಚಿತ್ರ ಬಿಡುಗಡೆಗೆ ಮುನ್ನವೇ ನ್ಯೂಯಾರ್ಕ್ ಇಂಡಿಯನ್ ಚಿತ್ರೋತ್ಸವದಲ್ಲಿ “ಬೆಸ್ಟ್ ಸ್ಕ್ರೀನ್ ಪ್ಲೇ” ಪ್ರಶಸ್ತಿಗೆ ಭಾಜನವಾಗಿತ್ತು. ಅಲ್ಲದೇ ಕೆನಡಾದ ಒಟ್ಟಾವಾ ಇಂಡಿಯನ್ ಫಿಲ್ಮ್ ಫೆಸ್ಟಿವಲ್ ಗೂ ಗಂಟೂಮೂಟೆ ಆಯ್ಕೆಯಾಗಿರುವುದು ಚಿತ್ರತಂಡಕ್ಕೆ ಡಬಲ್ ಸಂತಸ ತಂದಿದೆ.
ಇದು 90ರ ದಶಕದ ಕಥೆ. ಎಸ್ಸೆಸ್ಸೆಲ್ಸಿ ಹುಡುಗ, ಹುಡುಗಿ ನಡುವಿನ ಮಾತುಕತೆ, ಸಿನಿಮಾ ಲೈಫ್ ನಂತೆಯೇ ರಿಯಲ್ ಬದುಕು ಕೂಡಾ ಇರುತ್ತೆ ಎಂಬ ಭ್ರಮೆಯಲ್ಲಿರುವ ಹುಡುಗಿಯ ಪಯಣ ಇಲ್ಲಿದೆ. ಸಿನಿಮಾ ಹಾಗೂ ಬದುಕು ಬೇರೆ ಎಂಬ ಅರ್ಥದ ನಡುವೆ ನಡೆಯುವ ಕಥಾ ಹಂದರ ಗಂಟುಮೂಟೆ ಚಿತ್ರದಲ್ಲಿದೆ.
ಗಂಟು ಮೂಟೆ ಚಿತ್ರದಲ್ಲಿ ತೇಜು ಬೆಳವಾಡಿ, ನಿಶ್ಚಿತಾ ಕೊರೋಡಿ ಮುಖ್ಯಭೂಮಿಕೆಯಲ್ಲಿದ್ದಾರೆ. ಚಿತ್ರಕ್ಕೆ ರೂಪರಾವ್ ನಿರ್ದೇಶನ, ಸಹದೇವ್ ಛಾಯಾಗ್ರಹಣ. ಚಿತ್ರದಲ್ಲಿ ಭಾರ್ಗವ್ ರಾಜು, ಸೂರ್ಯ ವಸಿಷ್ಠ, ಶರತ್ ಗೌಡ, ಶ್ರೀರಂಗ, ಮಂಜುನಾಥ್ ಇತರರು ನಟಿಸಿದ್ದಾರೆ. ಬಿಡುಗಡೆಗೆ ಸಿದ್ದವಾಗಿರುವ ಸಿನಿಮಾದ ಟ್ರೇಲರ್ ಬಿಡುಗಡೆಯಾಗಿದ್ದು, ಸಿನಿ ಪ್ರೇಕ್ಷಕರಲ್ಲಿ ಕುತೂಹಲ ಹುಟ್ಟಿಸಿದೆ ಎಂದು ಚಿತ್ರತಂಡ ಹೇಳಿದೆ.