ಮಗುವಿಗೆ ಪಾಸಿಟಿವ್‌-7 ಜನ ಬಿಡುಗಡೆ

Team Udayavani, May 20, 2020, 5:49 AM IST

ಬೀದರ: ಜಿಲ್ಲೆಯಲ್ಲಿ ತಲ್ಲಣ ಮೂಡಿಸುತ್ತಿರುವ ಕೋವಿಡ್ ಪಾಸಿಟಿವ್‌ ಒಂದು ಪ್ರಕರಣ ವರದಿಯಾಗಿದೆ. ಮಂಗಳವಾರ ಸೋಂಕಿತ ತಾಯಿ ಸಂಪರ್ಕದಿಂದಲೇ ಎರಡೂವರೆ ವರ್ಷದ ಇನ್ನೊಬ್ಬ ಮಗನಿಗೂ ಕೋವಿಡ್ ಒಕ್ಕರಿಸಿದ್ದು, ಈ ಮೂಲಕ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ ಈಗ 58ಕ್ಕೆ ಏರಿಕೆ ಆಗಿದೆ.

ಇನ್ನೂ ಚಿಕಿತ್ಸೆಯಿಂದ ಗುಣಮುಖರಾಗಿರುವ 7 ಜನರು ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ. ಮನಿಯಾರ್‌ ತಾಲೀಮ್‌ನ ನಿವಾಸಿಯಾಗಿರುವ 2.6 ವರ್ಷದ ಬಾಲಕ (ಪಿ-1374)ನಲ್ಲಿ ಸೋಂಕು ಪತ್ತೆಯಾಗಿದೆ. ಇತ ತನ್ನ ತಾಯಿ ಪಿ- 939ರ ಸಂಪರ್ಕಕ್ಕೆ ಬಂದಿದ್ದಾನೆ. ಸೋಮವಾರವಷ್ಟೇ ಇದೇ ತಾಯಿ ಸಂಪರ್ಕದಿಂದ ಇನ್ನೊಬ್ಬ ಮಗನಿಗೆ ಸೋಂಕು ತಗುಲಿತ್ತು. ಜಿಲ್ಲೆಯಲ್ಲಿ ಸೋಮವಾರದಿಂದ ಸತತ ಐದು ದಿನ 32 ಸೋಂಕಿತರ ಸಂಖ್ಯೆ ವರದಿಯಾಗಿದ್ದಲ್ಲದೇ ಎರಡನೇ ವ್ಯಕ್ತಿಯೂ ಬಲಿಯಾಗಿದ್ದ. ನಂತರ ಎರಡು ದಿನ ಒಂದೂ ಪಾಸಿಟಿವ್‌ ಪ್ರಕರಣಗಳು ಪತ್ತೆಯಾಗದೆ ನಿಟ್ಟಿಸಿರು ಬಿಡುವಂತಾಗಿತ್ತು. ಈಗ ಎರಡು ದಿನಗಳಿಂದ ಒಂದೊಂದು ಸೋಂಕು ಪ್ರಕರಣಗಳು ವರದಿಯಾಗಿವೆ.

ಜಿಲ್ಲೆಯಲ್ಲಿ ಈಗ ಒಟ್ಟಾರೆ 58 ಪಾಸಿಟಿವ್‌ ಪ್ರಕರಣಗಳು ವರದಿ ಆದಂತಾಗಿದೆ. ಅದರಲ್ಲಿ ಎರಡು ಸಾವು ಸಂಭವಿಸಿದ್ದರೆ 22 ಜನರು ಡಿಸಾcರ್ಜ್‌ ಆಗಿದ್ದು, ಇನ್ನೂ 34 ಜನ ಚಿಕಿತ್ಸೆ ಪಡೆಯುತ್ತಿದ್ದಾರೆ.