ಜೋಗ ನಾಳೆಯಿಂದ ಪ್ರವಾಸಿಗರಿಗೆ ಮುಕ್ತ

Team Udayavani, Jun 7, 2020, 8:59 PM IST

ಸಾಗರ: ಕೋವಿಡ್-19 ಲಾಕ್‌ಡೌನ್‌ ಸಡಿಲಿಕೆ ಹಿನ್ನೆಲೆಯಲ್ಲಿ ವಿಶ್ವವಿಖ್ಯಾತ ಜೋಗ ಜಲಪಾತ ಸೋಮವಾರದಿಂದ ಜನ ವೀಕ್ಷಣೆಗೆ ಮುಕ್ತವಾಗಲಿದೆ. ಇದಕ್ಕಾಗಿ ಪ್ರವಾಸೋದ್ಯಮ ಇಲಾಖೆ ವಿವಿಧ ಸಿದ್ಧತೆಗಳನ್ನು ನಡೆಸಿದೆ.

ಲಾಕ್‌ಡೌನ್‌ ಘೋಷಣೆ ನಂತರ ಮಾರ್ಚ್‌ ಕೊನೆಯ ವಾರದಿಂದ ಜೋಗದ ಎಲ್ಲ ಗೇಟ್‌ಗಳಿಗೆ ಬೀಗ ಹಾಕಿ ಜಲಪಾತ ವೀಕ್ಷಣೆಗೆ ಸಂಪೂರ್ಣ ನಿರ್ಬಂಧ ಹೇರಲಾಗಿತ್ತು.ಪ್ರವಾಸಿಗರ ಆಗಮನದ ಹಿನ್ನೆಲೆಯಲ್ಲಿ ಗೇಟ್‌ನಲ್ಲಿಯೇ ಸ್ಯಾನಿಟೈಸರ್‌ ಹಾಗೂ ಥರ್ಮಲ್‌ ಸ್ಕ್ರೀನಿಂಗ್‌ ವ್ಯವಸ್ಥೆ ಮಾಡಲಾಗಿದೆ. ಪ್ರವಾಸಿಗರು ಕಡ್ಡಾಯವಾಗಿ ಮಾಸ್ಕ್ ಧರಿಸಬೇಕು. ಭೌತಿಕ ಅಂತರವನ್ನು ಕಾಯ್ದುಕೊಳ್ಳಬೇಕು.ಜಲಪಾತದ ಪ್ರದೇಶದಲ್ಲಿ ಊಟ-ಉಪಾಹಾರ ಹಾಗೂ ವಸತಿ ಸೌಲಭ್ಯ ಇರುವುದಿಲ್ಲ. ಕೇವಲ ಜಲಪಾತ ವೀಕ್ಷಣೆಗೆ ಮಾತ್ರ ಅವಕಾಶ ಮಾಡಿಕೊಡಲಾಗುವುದು ಎಂದು ಪ್ರವಾಸೋದ್ಯಮ ಇಲಾಖೆ ನಿರ್ದೇಶಕ ರಾಮಕೃಷ್ಣ ತಿಳಿಸಿದರು.

ಈಗಾಗಲೇ ಜಲಪಾತದ ವೀಕ್ಷಣಾ ಪ್ರದೇಶದಲ್ಲಿ ಕಾರ್ಗಲ್‌ ಜೋಗ ಪಟ್ಟಣ ಪಂಚಾಯ್ತಿ ವತಿಯಿಂದ ವೈರಾಣು ನಿರೋಧಕ ಔಷಧ ಸಿಂಪಡಿಸಲಾಗಿದೆ. ಈ ಮಧ್ಯೆ ತಾಲೂಕಿನಾದ್ಯಂತ ಮುಂಗಾರು ಇನ್ನೂ ಆರಂಭವಾಗದಿರುವುದರಿಂದ ಜೋಗ ಜಲಪಾತದ ಜಲಧಾರೆಗಳೆಲ್ಲ ಸೊರಗಿವೆ.