ಜಾನಪದ ಆಟಗಳನ್ನು ಮುನ್ನೆಲೆಗೆ ತಂದ ಲಾಕ್‌ ಡೌನ್‌

Team Udayavani, Jun 13, 2020, 2:39 PM IST

ಕೋವಿಡ್‌ ತಡೆಗಟ್ಟಲು ಜಾರಿಗೊಳಿಸಲಾದ ಲಾಕ್‌ಡೌನ್‌ ಕ್ರಮಗಳು ಹಲವು ಬದಲಾವಣೆಗಳಿಗೆ ಕಾರಣವಾಗಿವೆ. ಮನೆಯಲ್ಲಿಯೇ ಕುಳಿತು ಸುಸ್ತಾಗಿರುವ ಜನರು ಆಟಗಳ ಮೊರೆ ಹೋಗುತ್ತಿದ್ದಾರೆ. ಜಾನಪದ ಆಟಗಳು ಜನರ ನಡುವೆ ಹಾಸುಹೊಕ್ಕಾಗಿರುವ ಆಟಗಳು. ಗ್ರಾಮೀಣ ಜನರು ಮನೋರಂಜನೆಗಾಗಿ ಹಾಗೂ ದೈಹಿಕ ವ್ಯಾಯಾಮಕ್ಕಾಗಿ ಕಂಡುಕೊಂಡ ಆಟಗಳಾಗಿವೆ. ಕಡಿಮೆ ಹಾಗೂ ಸುಲಭದಲ್ಲಿ ದೊರಕುವ ಸಾಮಗ್ರಿ-ವಸ್ತುಗಳನ್ನು ಬಳಸಿಕೊಂಡು ಆಟವಾಡಬಹುದು. ಈ ಮೂಲಕ ತಾವು ಮತ್ತು ತಮ್ಮ ಕುಟುಂಬದವರನ್ನು ರಂಜಿಸಿಕೊಳ್ಳಲು ಬಹಳ ಹಿಂದಿನಿಂದಲೂ ಇದರ ಮೊರೆ ಹೋಗಿದ್ದಾರೆ. ಈಗ ಅದೇ ಕ್ರೀಡೆಯನ್ನೇ ನಮ್ಮ ನಗರ ವಾಸಿಗಳು ಸಹ ಅಳವಡಿಸಿಕೊಂಡಿದ್ದಾರೆ.
ನಗರವಾಸಿಗಳು ಆರಿಸಿಕೊಂಡ ಆಟಗಳು ಒಳಾಂಗಣ ಕ್ರೀಡೆಗಳು. ನಮ್ಮ ಜನರು ಈ ಆಟಗಳನ್ನು ಮನೆಯ ಮಂದಿಯ ಜತೆ ಆಟವಾಡುತ್ತಾ, ಮಾನಸಿಕವಾದ ನೆಮ್ಮದಿ ಹಾಗೂ ಸಂತಸವನ್ನು ಪಡೆಯುತ್ತಿದ್ದಾರೆ. ಒಬ್ಬರನೊಬ್ಬರು ಅರ್ಥೈಸಿಕೊಳ್ಳುತ್ತಿದ್ದಾರೆ. ಈ ಹಿಂದೆ ಎಲ್ಲಾ ಹಳ್ಳಿಗಳಿಗೆ ಸೀಮಿತವಾಗಿದ್ದ ಆಟಗಳು ಇಂದು ನಗರ ಪ್ರದೇಶಗಳ ಮಕ್ಕಳಲ್ಲಿ ಕಂಡುಬರುತ್ತಿವೆ.

ನಮ್ಮ ನಗರ ವಾಸಿ ಮಕ್ಕಳಿಗೆ ಈ ಆಟ ಪರಿಚಯವಾಗುತ್ತಿದೆ ಎಂಬ ಖುಷಿ ಇದೆ. ಮಕ್ಕಳಿಗೆ ನೀಡುತ್ತಿದ್ದ ದುಬಾರಿ ವಸ್ತುಗಳು ಮನೆಯ ಮೂಲೆ ಸೇರಿವೆ. ಮೂಲೆಯಲ್ಲಿದ್ದ ಸಾಮಾನ್ಯ ವಸ್ತುಗಳು ಮಕ್ಕಳ ಆಟಿಕೆಯಾಗಿವೆ. ಜನರಿಗೆ ಇಷ್ಟು ದಿನಗಳ ಕಾಲ ಅವರದೇ ಕೆಲಸದ ಜವಾಬ್ದಾರಿಗಳಿಂದ ಮನೆಯವರ ಜತೆ ಸಮಯ ಕಳೆಯಲು ಸಾಧ್ಯವಾಗುತ್ತಿರಲಿಲ್ಲ. ಅದೇ ಈಗ ಲಾಕ್‌ಡೌನ್‌ ಮೂಲಕ ಜನರು ತಮ್ಮ ಮನೆಯವರನ್ನು , ತಮ್ಮ ಮಕ್ಕಳನ್ನು ಸಂತೋಷದಿಂದ ಅರ್ಥಮಾಡಿಕೊಂಡು ಆಡುತ್ತಿದ್ದಾರೆ. ಲಾಕ್‌ಡೌನ್‌ ಅನಂತರವೇ ಈ ಜನಪದ ಆಟಗಳು ನೆನಪಾಗಿವೆ. ಮಕ್ಕಳಿಗೆ ಒಂದು ರೀತಿಯ ಹೊಸ ಅನುಭವ ಮನೆಯಲ್ಲೇ ಇದ್ದು ಇಷ್ಟು ರೀತಿಯ ಆಟಗಳನ್ನು ಆಡಬಹುದು ಎಂಬುವುದನ್ನು ಅರಿತುಕೊಂಡಿದ್ದಾರೆ. ಮಕ್ಕಳನ್ನು ಚುರುಕಾಗಿಡಲು ಅಳಿಗುಳಿ, ಚೌಕಾಬಾರದಂತಹ ಕೆಲವು ಆಟಗಳಿವೆ. ಇವುಗಳು ಮನೋರಂಜನೆಯ ಜತೆಗೆ ಮನಸ್ಸಿಗೆ ನೆಮ್ಮದಿಯನ್ನು ನೀಡುತ್ತವೆ.

ಐಶ್ವರ್ಯ ಕೆ.ಆರ್‌. ಸಂತ ಫಿಲೋಮಿನಾ ಕಾಲೇಜ್‌, ಮೈಸೂರು