ಗೂರ್ಖಾಗಳಿಗೆ ವರವಾಯ್ತು ನಿವಾಸ ದೃಢೀಕರಣ ಪತ್ರ

Team Udayavani, Jul 7, 2020, 6:49 AM IST

ಜಮ್ಮು- ಕಾಶ್ಮೀರ ಆಡಳಿತವು ನಿವಾಸ ದೃಢೀಕರಣ ಪತ್ರ (ಡೊಮಿಸೈಲ್‌ ಸರ್ಟಿ­ಫಿಕೇಟ್‌) ವಿತರಣೆ ಪ್ರಕ್ರಿಯೆ ಆರಂಭಿಸಿರುವುದು, ಎಷ್ಟೋ ವರ್ಷಗಳಿಂದ ಕಣಿವೆ ರಾಜ್ಯದಲ್ಲಿ ಪರದೇಸಿಗಳಂತೆ ಬದುಕುತ್ತಿದ್ದ ಗೂರ್ಖಾ ಸಮುದಾಯಕ್ಕೆ ವರವಾಗಿ ಪರಿಣಮಿಸಿದೆ.

ಅದರಲ್ಲೂ ಈ ಸಮುದಾಯದ ನಿವೃತ್ತ ಸೇನಾಧಿಕಾರಿಗಳು, ಯೋಧರು ಹಾಗೂ ವಾಲ್ಮೀಕಿ ಸಮುದಾಯದವರು ಈಗ ನಿವಾಸ ದೃಢೀಕರಣ ಪತ್ರ ಪಡೆಯುತ್ತಿದ್ದು, ಕೇಂದ್ರಾಡಳಿತ ಪ್ರದೇಶದಲ್ಲಿ ಸ್ವಂತ ಭೂಮಿ ಖರೀದಿಸಲು ಮತ್ತು ಉದ್ಯೋಗಕ್ಕೆ ಅರ್ಜಿ ಹಾಕಲು ಅವಕಾಶ ಸಿಕ್ಕಿದೆ.

ಜಮ್ಮುವಿನಲ್ಲೇ 6600 ಮಂದಿಗೆ ದೃಢೀಕರಣ ಪತ್ರ ದೊರೆತಿದ್ದು, ಈ ಪೈಕಿ ಬಹುತೇಕ ಮಂದಿ ಗೂರ್ಖಾ ಸಮುದಾಯದವರು.

ಯಾರಿಗೆಲ್ಲ ಸಿಗುತ್ತೆ ಸರ್ಟಿಫಿಕೇಟ್‌?
– ಖಾಯಂ ವಾಸ ಪ್ರಮಾಣಪತ್ರ ಹೊಂದಿದ್ದೂ ಜಮ್ಮು-ಕಾಶ್ಮೀರದ ಹೊರಗೆ ವಾಸಿಸುತ್ತಿರುವವರು, ಅವರ ಮಕ್ಕಳು
– ಜಮ್ಮು-ಕಾಶ್ಮೀರದ ಹೊರಗೆ ವಾಸಿಸುತ್ತಿರುವ ಕಾಶ್ಮೀರಿ ವಲಸಿಗರು
– ಜಮ್ಮು-ಕಾಶ್ಮೀರದಲ್ಲಿ 15 ವರ್ಷ ವಾಸಿಸಿದವರು, ಅವರ ಮಕ್ಕಳು
– ರಾಜ್ಯದಲ್ಲಿ 10 ವರ್ಷ ಸೇವೆ ಸಲ್ಲಿಸಿರುವ ಕೇಂದ್ರ ಸರಕಾರ, ಪಿಎಸ್‌ಯು, ಕೇಂದ್ರ ಸ್ವಾಯತ್ತ ಸಂಸ್ಥೆಗಳು, ಪಿಎಸ್‌ಬಿ, ಕೇಂದ್ರೀಯ ವಿವಿಗಳು, ಕೇಂದ್ರ ಸಂಶೋಧನಾ ಸಂಸ್ಥೆಗಳ ಅಧಿಕಾರಿಗಳು
– 7 ವರ್ಷ ಜಮ್ಮು-ಕಾಶ್ಮೀರದಲ್ಲಿ ವಿದ್ಯಾಭ್ಯಾಸ ಮಾಡಿದವರು, 10 – 12ನೇ ತರಗತಿ ಪರೀಕ್ಷೆಯನ್ನು ಕೇಂದ್ರಾಡಳಿತ ಪ್ರದೇಶದಲ್ಲೇ ಬರೆದವರು

ಗೂರ್ಖಾ ಸಮುದಾಯ
– 19ನೇ ಶತಮಾನದ ಮಧ್ಯಭಾಗದಲ್ಲಿ ತಮ್ಮ ಜತೆ ಕೈಜೋಡಿಸಿ ಹೋರಾಡಲು ಡೋಗ್ರಾ ಆಡಳಿತದ ಆಹ್ವಾನದ ಮೇರೆಗೆ ನೇಪಾಲದಿಂದ ಜಮ್ಮು- ಕಾಶ್ಮೀರಕ್ಕೆ ಬಂದವರು

– ಪ್ರಸ್ತುತ 1 ಲಕ್ಷ ಗೂರ್ಖಾಗಳು ಕಣಿವೆ ರಾಜ್ಯದಲ್ಲಿದ್ದಾರೆ. ಸ್ಥಳೀ ಯ – ವಿಧಾನಸಭೆ ಚುನಾವಣೆ­ಗಳಲ್ಲಿ ಮತದಾನ ಮಾಡುವ ಅವಕಾಶ ಅವರಿಗಿದೆ. ಆದರೆ ಸರಕಾರ ಒದಗಿಸಿರುವ ಭೂಮಿಯ ಹೊರತಾಗಿ ಬೇರೆಡೆ ಜಮೀನು ಖರೀ­ದಿ­ಸುವ ಅವಕಾಶ ಇವರಿಗಿರಲಿಲ್ಲ.