70 ನಾಮಪತ್ರ ತಿರಸ್ಕೃತ,681 ನಾಮಪತ್ರಗಳು ಅಂಗೀಕಾರ

Team Udayavani, Apr 26, 2018, 12:33 PM IST

 ಬೆಂಗಳೂರು: ಬೆಂಗಳೂರು ನಗರದ ಜಿಲ್ಲೆ ವ್ಯಾಪ್ತಿಗೆ ಬರುವ 28 ವಿಧಾನಸಭಾ ಕ್ಷೇತ್ರಗಳ ಚುನಾವಣಾ ಕಣದಲ್ಲಿ ಅಂತಿಮವಾಗಿ 515 ಅಭ್ಯರ್ಥಿಗಳಿದ್ದು, ಒಟ್ಟು 681 ನಾಮಪತ್ರಗಳು ಅಂಗೀಕಾರವಾಗಿವೆ.

ಬುಧವಾರದಿಂದ ನಾಮಪತ್ರಗಳ ಪರಿಶೀಲನಾ ಕಾರ್ಯವನ್ನು ಆರಂಭಿಸಿರುವ ಚುನಾವಣಾಧಿಕಾರಿಗಳು 28 ವಿಧಾನಸಭಾ ಕ್ಷೇತ್ರಗಳಿಗೆ ಸಲ್ಲಿಕೆಯಾಗಿದ್ದ ಒಟ್ಟು 751 ನಾಮಪತ್ರಗಳ ಪೈಕಿ 70 ನಾಮಪತ್ರಗಳನ್ನು ತಿರಸ್ಕರಿಸಿದ್ದು, 681 ನಾಮಪತ್ರಗಳನ್ನು ಅಂಗೀಕಾರಿಸಿದೆ. ಬಿಬಿಎಂಪಿ ಕೇಂದ್ರ ಭಾಗದಲ್ಲಿ ಒಟ್ಟು 142 ಅಭ್ಯರ್ಥಿಗಳಿಂದ 204 ನಾಮಪತ್ರಗಳು ಸಲ್ಲಿಕೆಯಾಗಿವೆ. ಆ ಪೈಕಿ 182 ನಾಮಪತ್ರಗಳು ಅಂಗೀಕಾರವಾಗಿದ್ದು, 22 ನಾಮಪತ್ರಗಳನ್ನು ತಿರಸ್ಕರಿಸಲಾಗಿದೆ. ಅದೇ ರೀತಿ ಬೆಂಗಳೂರು ಉತ್ತರ ಭಾಗದಲ್ಲಿ 125 ಅಭ್ಯರ್ಥಿಗಳಿಂದ ಒಟ್ಟು 163 ನಾಮಪತ್ರಗಳು ಸಲ್ಲಿಕೆಯಾಗಿದ್ದು, ಆ ಪೈಕಿ 156 ಅಂಗೀಕಾರವಾಗಿದ್ದು, 7 ನಾಮಪತ್ರಗಳು ತಿರಸ್ಕೃತಗೊಂಡಿವೆ. ಇನ್ನು ಬಿಬಿಎಂಪಿ ದಕ್ಷಿಣ ಭಾಗದಲ್ಲಿ 122 ಅಭ್ಯರ್ಥಿಗಳಿಂದ 195 ನಾಮಪತ್ರಗಳು ಸಲ್ಲಿಕೆಯಾಗಿವೆ. ಆ ಪೈಕಿ 172 ಸ್ವೀಕಾರವಾಗಿದ್ದು, 23 ತಿರಸ್ಕೃತಗೊಂಡಿವೆ. ಉಳಿದಂತೆ ಬಿಬಿಎಂಪಿ ನಗರ ಭಾಗದಲ್ಲಿ 126 ಅಭ್ಯರ್ಥಿಗಳಿಂದ 189 ನಾಮಪತ್ರಗಳು ಸಲ್ಲಿಕೆಯಾಗಿದ್ದು, 171 ಸ್ವೀಕಾರವಾಗಿ 18 ತಿರಸ್ಕೃತಗೊಂಡಿವೆ