“ನೆನಪಿನ ಬುತ್ತಿ’ಯಲ್ಲಿ ತೇಲಿಬಂದ ಮಲೆನಾಡಿಗರ ನೆನಪು

Team Udayavani, Apr 17, 2017, 12:26 PM IST

ಬೆಂಗಳೂರು: ಕರೆಂಟೇ ಇಲ್ಲದಂತಹ ಊರಿಂದ ಸಿಟಿಗೆ ಬಂದಾಗ, ಲೈಟ್‌ ಹಚ್ಚಲಿಕ್ಕೂ ಬರುತ್ತಿರಲಿಲ್ಲ. ನೆನೆಸಿಕೊಂಡರೆ ಈಗಲೂ ನಗು ಬರುತ್ತದೆ. ಮಲೆನಾಡು ದಿನಾಚರಣೆ ಅಂಗವಾಗಿ ಹಮ್ಮಿಕೊಂಡಿದ್ದ “ನೆನಪಿನ ಬುತ್ತಿ’ಯಿಂದ ತೇಲಿಬಂದ ನೆನಪು ಇದು. 

ನಗರದ ಡಾ.ರಾಜ್‌ಕುಮಾರ್‌ ರಸ್ತೆಯಲ್ಲಿರುವ ಅಭಿಮಾನಿ ವಸತಿಯಲ್ಲಿ ಮಲೆನಾಡ ಮಿತ್ರ ವೃಂದ ಭಾನುವಾರ “ಮಲೆನಾಡು ದಿನ’ದ ಅಂಗವಾಗಿ ನೆನಪಿನ ಬುತ್ತಿ ಕಾರ್ಯಕ್ರಮ ಏರ್ಪಡಿಸಿತ್ತು. ತೀರ್ಥಹಳ್ಳಿ, ಕೊಪ್ಪ, ಎನ್‌.ಆರ್‌. ಪುರ, ಶೃಂಗೇರಿ ಸೇರಿದಂತೆ ನೂರಾರು ಮಲೆನಾಡಿನ ಜನ ಅಲ್ಲಿ ನೆರೆದಿದ್ದರು. 20-30 ವರ್ಷಗಳಿಂದ ನಗರದಲ್ಲೇ ಜೀವನ ನಡೆಸುತ್ತಿರುವ ಅವರೆಲ್ಲಾ ತಮ್ಮ ಸಿಹಿ-ಕಹಿ ಘಟನೆಗಳನ್ನು ಹಂಚಿಕೊಂಡರು. 

“ನಮ್ಮೂರಲ್ಲಿ ಕರೆಂಟೇ ಇರಲಿಲ್ಲ. ಅಂತಹ ಊರಲ್ಲಿ ಇದ್ದ ನನಗೆ ಸಿಟಿಗೆ ಬಂದಾಗ ಬೆಂಗಳೂರು ಝಗಮಗಿಸುತ್ತಿತ್ತು. ನಾನಿದ್ದ ರೂಮಿನಲ್ಲಿಯ ಲೈಟ್‌ ಹಾಕಲಿಕ್ಕೂ ನನಗೆ ಬರುತ್ತಿರಲಿಲ್ಲ’ ಎಂದು ಚಿಕ್ಕಮಗಳೂರು ಮೂಲದವರೊಬ್ಬರು ಮೆಲುಕುಹಾಕಿದರು. ಇದಕ್ಕೆ ಇತರ ಮಲೆನಾಡಿಗರೂ ದನಿಗೂಡಿಸಿದರು. 

ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ನಟಿ ಹಾಗೂ ವಿಧಾನ ಪರಿಷತ್‌ ಸದಸ್ಯೆ ತಾರಾ ಅನುರಾಧ, ತಮ್ಮ ಕಾನೂರು ಸುಬ್ಬಮ್ಮ ಹೆಗ್ಗಡತಿಯ ಪಾತ್ರವನ್ನು ಮೆಲುಕು ಹಾಕಿದರು. “ಚಿತ್ರದ ಶೂಟಿಂಗ್‌ ಹಿನ್ನೆಲೆಯಲ್ಲಿ ಸ್ಥಳಕ್ಕೆ ಭೇಟಿ ನೀಡುವವರೆಗೂ ನನಗೆ ಯಾವ ಪಾತ್ರ ಕೊಡುತ್ತಿದ್ದಾರೆ ಎಂಬುದೇ ಗೊತ್ತಿರಲಿಲ್ಲ. ಆಮೇಲೆ ಅಲ್ಲಿಯೇ ಒಂದು ವಾರ ಠಿಕಾಣಿ ಹೂಡಿ ಮಲೆನಾಡಿನ ಪರಿಸರ, ಅಲ್ಲಿನ ಸಂಸ್ಕೃತಿ, ಅಡಿಗೆ ಮಾಡುವುದು ಸೇರಿದಂತೆ ಪ್ರತಿಯೊಂದು ನೋಡಿ ಕಲಿತೆ’ ಎಂದು ಸ್ಮರಿಸಿದರು. 

ಅಲ್ಲದೆ, ದೇಹದ ತೂಕವನ್ನು 20 ಕೆ.ಜಿ ಕರಿಗಸಬೇಕು ಎಂದು ನಿರ್ದೇಶಕರಿಂದ ಸೂಚನೆ ಬಂತು. ಇದಕ್ಕಾಗಿ ಆರು ತಿಂಗಳು ಅವಕಾಶವೂ ಸಿಕ್ಕಿತು. 50 ದಿನಗಳ ಶೂಟಿಂಗ್‌ ಮುಗಿಸಿಕೊಂಡು ಬರುವಾಗ ದುಃಖ ಉಮ್ಮಳಿಸಿತು. ಅಷ್ಟರಮಟ್ಟಿಗೆ ಅಲ್ಲಿನ ಜನ, ಪರಿಸರದೊಂದಿಗೆ ಬೆರೆತುಹೋಗಿದ್ದೆ ಎಂದರು. ಕಾರ್ಯಕ್ರಮದಲ್ಲಿ ಮಲೆನಾಡ ಮಿತ್ರ ವೃಂದದ ಅಧ್ಯಕ್ಷ ಅನಿಲ್‌ ಹೊಸಕೊಪ್ಪ ಮತ್ತಿತರರು ಉಪಸ್ಥಿತರಿದ್ದರು.