ಮೂರು ಪ್ರಮುಖ ರಸ್ತೆಗಳಲ್ಲಿ 2 ತಿಂಗಳು ಸಂಚಾರ ನಿರ್ಬಂಧ

Team Udayavani, Oct 29, 2017, 11:57 AM IST

ಬೆಂಗಳೂರು: ನಗರದ ಮೂರು ಪ್ರಮುಖ ರಸ್ತೆಗಳಲ್ಲಿ ಮುಂದಿನ ಎರಡು ತಿಂಗಳು ವಾಹನ ಸಂಚಾರ ನಿರ್ಬಂಧಿಸಲಾಗಿದ್ದು, ಇದರ ಬಿಸಿ ವಾಹನ ಸವಾರರಿಗೆ ತುಸು ಜೋರಾಗಿಯೇ ತಟ್ಟಲಿದೆ.

ವೈಟ್‌ಟಾಪಿಂಗ್‌ ಕಾಮಗಾರಿ ಕೈಗೆತ್ತಿಕೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಆನೆಪಾಳ್ಯ ಜಂಕ್ಷನ್‌, ಕೋರಮಂಗಲ 20ನೇ ಮುಖ್ಯರಸ್ತೆ, ಗೊರಗುಂಟೆಪಾಳ್ಯ ಮೆಟ್ರೋ ನಿಲ್ದಾಣ ಮಾರ್ಗದಲ್ಲಿ ನಿರ್ದಿಷ್ಟ ಅಂತರದಲ್ಲಿ ಅ. 29ರಿಂದ ಡಿಸೆಂಬರ್‌ 12ರವರೆಗೆ ವಾಹನ ಸಂಚಾರ ನಿರ್ಬಂಧಿಸಲಾಗಿದೆ. ಹಾಗಾಗಿ, ಪೀಕ್‌ ಅವರ್‌ನಲ್ಲಿ ಈ ಮಾರ್ಗದಲ್ಲಿ ವಾಹನ ಸಂಚಾರ ದುರ್ಬರವಾಗಲಿದೆ.

ಅ.29ರಿಂದ ಡಿ.29ರವರೆಗೆ ಹೊಸೂರು ರಸ್ತೆಯ ಆನೆಪಾಳ್ಯ ಜಂಕ್ಷನ್‌ನಿಂದ ಫೋರಂಮಾಲ್‌ ಜಂಕ್ಷನ್‌ ಮತ್ತು ಕೋರಮಂಗಲ 20ನೇ ಮುಖ್ಯರಸ್ತೆಗೆ ಹೋಗುವ ಮೇನ್‌ ಕ್ಯಾರಿಯೇಜ್‌ ವೇ, ಅ. 30ರಿಂದ ಡಿ. 15ರವರೆಗೆ ಹೊರವರ್ತುಲ ರಸ್ತೆಯ ಗೊರಗುಂಟೆಪಾಳ್ಯ ಮೆಟ್ರೋ ನಿಲ್ದಾಣದಿಂದ ಯಶವಂತಪುರ ಮೆಟ್ರೋ ನಿಲ್ದಾಣದ ಮಧ್ಯೆ ವೈಟ್‌ಟಾಪಿಂಗ್‌ ಕಾಮಗಾರಿ ನಡೆಯಲಿದೆ.

ಈ ಅವಧಿಗಳಲ್ಲಿ ಉದ್ದೇಶಿತ ಮಾರ್ಗಗಳಲ್ಲಿ ವಾಹನಗಳ ಸಂಚಾರಕ್ಕೆ ಅವಕಾಶ ಇರುವುದಿಲ್ಲ. ಕಾಮಗಾರಿ ಹಿನ್ನೆಲೆಯಲ್ಲಿ ಈ ಮಾರ್ಗದ ಸರ್ವಿಸ್‌ ರಸ್ತೆಗಳನ್ನು ಬಳಕೆಗೆ ಮಾತ್ರ ಅವಕಾಶ ಇರುತ್ತದೆ ಎಂದು ಬಿಬಿಎಂಪಿ ಪ್ರಕಟಣೆ ತಿಳಿಸಿದೆ.