ಕೆಸರುಮಯವಾದ ನಯನಾಡು – ಊರ್ಲ ಸಂಪರ್ಕ ರಸ್ತೆ

Team Udayavani, Jul 24, 2018, 11:32 AM IST

ಪುಂಜಾಲಕಟ್ಟೆ: ಬಂಟ್ವಾಳ ತಾಲೂಕು ಪಿಲಾತಬೆಟ್ಟು ಗ್ರಾಮದ ನಯನಾಡು ಜಂಕ್ಷನ್‌ನಿಂದ ಊರ್ಲ ಸಂಪರ್ಕ ರಸ್ತೆ ಕೆಸರುಮಯವಾಗಿದ್ದು ಜನ ಮತ್ತು ವಾಹನ ಸಂಚಾರಕ್ಕೆ ತೊಡಕನ್ನುಂಟು ಮಾಡಿದೆ. ಮಣ್ಣಿನ ಈ ಕಚ್ಛಾ ರಸ್ತೆಯನ್ನು ಅಭಿವೃದ್ಧಿಗೊಳಿಸಿ ಡಾಮರು ರಸ್ತೆಯಾಗಿ ಪರಿವರ್ತಿಸಬೇಕೆಂದು ಗ್ರಾಮಸ್ಥರು ಬಹಳ ಸಮಯದಿಂದ ಕೇಳುತ್ತಿದ್ದರೂ ಅವರ ಬೇಡಿಕೆ ಕೈಗೂಡಿಲ್ಲ. ನೆರೆಯ ಕುಕ್ಕೇಡಿ ಗ್ರಾಮ ಹಾಗೂ ಕೊಳಕ್ಕೆಬೈಲು ಮೂಲಕ ಮೂರ್ಜೆಗೆ ಸಾಗಲು ಇದು ಹತ್ತಿರದ ದಾರಿಯಾಗಿದೆ. ಆ ಭಾಗದ ಜನರು ನಯನಾಡಿಗೆ ವ್ಯವಹಾರ ಮತ್ತಿತರ ಕಾರ್ಯಗಳಿಗೆ ಅಂಗನವಾಡಿ, ಪ್ರಾಥಮಿಕ, ಪ್ರೌಢಶಾಲೆ, ಪ.ಪೂ. ಕಾಲೇಜಿಗೆ ಮತ್ತು ಹಾಲಿನ ಡಿಪೋಗೆ ಬರುವವರಿಗೆ ಕೆಸರಿಂದಾಗಿ ತೊಂದರೆಯಾಗಿದೆ. ದ್ವಿಚಕ್ರ ಸಹಿತ ಯಾವುದೇ ವಾಹನಗಳು ಸಂಚರಿಸುವಂತಿಲ್ಲ.

ಈ ಬಗ್ಗೆ ಪಿಲಾತಬೆಟ್ಟು ಗ್ರಾ.ಪಂ.ಗೆ ಮನವಿ ನೀಡಿದ್ದು ಸಂಬಂಧಿತರು ಸೂಕ್ತ ಕ್ರಮ ಕೈಗೊಳ್ಳುವಂತೆ ಸರಕಾರಿ ಪದವಿಪೂರ್ವ ಕಾಲೇಜಿನ ಮೇಲುಸ್ತುವಾರಿ ಮತ್ತು ಕಾಲೇಜು ಅಭಿವೃದ್ಧಿ ಸಮಿತಿ ಉಪಾಧ್ಯಕ್ಷ ನೆಲ್ವಿಸ್ಟರ್‌ ಪಿಂಟೋ ಹಾಗೂ ಸ್ಥಳೀಯರು ಆಗ್ರಹಿಸಿದ್ದಾರೆ.