Mangaluru University; ಆ್ಯತ್ಲೆಟಿಕ್ಸ್‌, ಖೋ ಖೋ ಕ್ರೀಡಾಪಟುಗಳಿಗೆ ಜರ್ಸಿ ವಿತರಣೆ

Team Udayavani, Dec 24, 2023, 11:22 PM IST

ಮೂಡುಬಿದಿರೆ: ಮಹಿಳೆಯರ ಹಾಗೂ ಪುರುಷರ ಅ. ಭಾ. ಅಂತರ್‌ ವಿಶ್ವವಿದ್ಯಾನಿಲಯ ಆ್ಯತ್ಲೆಟಿಕ್ಸ್‌ ಹಾಗೂ ದಕ್ಷಿಣ ವಲಯ ಅಂತರ ವಿ.ವಿ. ಖೋ ಖೋ ಚಾಂಪಿಯನ್‌ಶಿಪ್‌ನಲ್ಲಿ ಮಂಗಳೂರು ವಿ.ವಿ.ಯನ್ನು ಪ್ರತಿನಿಧಿಸುವ 102 ಕ್ರೀಡಾಪಟುಗಳಿಗೆ ಆಳ್ವಾಸ್‌ ಕಾಲೇಜಿನಲ್ಲಿ ಜರ್ಸಿ ವಿತರಿಸಲಾಯಿತು.

ಆ್ಯತ್ಲೆಟಿಕ್ಸ್‌ನಲ್ಲಿ 72 ಮಂದಿಯ ಪೈಕಿ 59 ಹಾಗೂ ಖೋ ಖೋ ಪಂದ್ಯಾಟದ 30 ಮಂದಿಯ ಪೈಕಿ 23 ಸೇರಿದಂತೆ ವಿ.ವಿ.ಯ 102 ಕ್ರೀಡಾಳುಗಳ ಪೈಕಿ 82 ಮಂದಿ ಆಳ್ವಾಸ್‌ ಕಾಲೇಜಿನ ವಿದ್ಯಾರ್ಥಿಗಳು ಆಗಿದ್ದಾರೆ. ತಮಿಳುನಾಡಿನಲ್ಲಿ ನಡೆಯಲಿರುವ ಪುರುಷರ ರಾಷ್ಟ್ರೀಯ ಮಟ್ಟದ ಅಂತರ್‌ ವಿ.ವಿ. ಆ್ಯತ್ಲೆಟಿಕ್ಸ್‌ ಕೂಟದಲ್ಲಿ ಪಾಲ್ಗೊಳ್ಳಲಿರುವ ಮಂಗಳೂರು ವಿ.ವಿ.ಯ 39 ಸ್ಪರ್ಧಿಗಳಲ್ಲಿ 33 ಮಂದಿ ಆಳ್ವಾಸ್‌ ಕಾಲೇಜಿನ ವಿದ್ಯಾರ್ಥಿಗಳು.
ಒಡಿಶಾದಲ್ಲಿ ನಡೆಯಲಿರುವ ಮಹಿಳೆಯರ ಅ.ಭಾ. ಅಂತರ್‌ ವಿ.ವಿ. ಆ್ಯತ್ಲೆಟಿಕ್ಸ್‌ ಕೂಟದ‌ಲ್ಲಿ ಪಾಲ್ಗೊಳ್ಳಲಿರುವ ವಿ.ವಿ.ಯ 33 ಮಂದಿಯಲ್ಲಿ 26 ಮಂದಿ ಆಳ್ವಾಸ್‌ನವರು.

ಕೋಯಿಕ್ಕೋಡ್‌ನ‌ಲ್ಲಿ ನಡೆಯಲಿರುವ ಪುರುಷರ ದ. ವಲಯ ಅಂತರ್‌ವಿ.ವಿ. ಖೋ ಖೋ ಚಾಂಪಿಯನ್‌ಶಿಪ್‌ನಲ್ಲಿ ಪಾಲ್ಗೊಳ್ಳಲಿರುವ ಮಂ.ವಿ.ವಿ. ತಂಡದ 15 ಆಟಗಾರರಲ್ಲಿ 12 ಮಂದಿ ಆಳ್ವಾಸ್‌ನವರು.

ತಿರುವನಂತಪುರದಲ್ಲಿ ನಡೆಯಲಿರುವ ಮಹಿಳೆಯರ ದ.ವ. ಅಂತರ್‌ ವಿ.ವಿ. ಖೋ ಖೋ ಚಾಂಪಿಯನ್‌ಶಿಪ್‌ನಲ್ಲಿ ಪಾಲ್ಗೊಳ್ಳಲಿರುವ ಮಂಗಳೂರು ವಿ.ವಿ. ತಂಡದ 15 ಆಟಗಾರರಲ್ಲಿ 11 ಮಂದಿ ಆಳ್ವಾಸ್‌ನವರು ಎಂದು ಪ್ರಕಟಿಸಲಾಯಿತು.

ಮಂಗಳೂರು ವಿ.ವಿ. ದೈಹಿಕ ಶಿಕ್ಷಣ ವಿಭಾಗದ ನಿರ್ದೇಶಕ ಡಾ| ಜೆರಾಲ್ಡ್‌ ಸಂತೋಷ ಡಿ’ಸೋಜಾ, ಮಂಗಳೂರು ವಿ.ವಿ.ಯ ದೈಹಿಕ ಶಿಕ್ಷಣ ವಿಭಾಗದ ಸಹಾಯಕ ನಿರ್ದೇಶಕ ಡಾ| ಪ್ರಸನ್ನ, ಆಳ್ವಾಸ್‌ ಕಾಲೇಜಿನ ಪ್ರಾಂಶುಪಾಲ ಡಾ| ಕುರಿಯನ್‌, ಆಳ್ವಾಸ್‌ ದೈಹಿಕ ಶಿಕ್ಷಣ ಕಾಲೇಜಿನ ಪ್ರಾಂಶುಪಾಲ ಮಧು ಜಿ.ಆರ್‌., ಆ್ಯತ್ಲೆಟಿಕ್ಸ್‌ ಪುರುಷರ ತಂಡದ ತರಬೇತುದಾರ ಡಾ| ರಾಧಾಕೃಷ್ಣ ಎಚ್‌., ಆಳ್ವಾಸ್‌ ಕಾಲೇಜಿನ ದೈಹಿಕ ಶಿಕ್ಷಣ ಶಿಕ್ಷಕರಾದ ಅವಿನ್‌ ಕುಮಾರ್‌, ತಿಲಕ್‌ ಕುಮಾರ್‌ ಇದ್ದರು.

ಸಾಧನೆಗೈದ ಕ್ರೀಡಾಪಟುಗಳಿಗೆ ಆಳ್ವಾಸ್‌ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷ ಡಾ| ಎಂ. ಮೋಹನ ಆಳ್ವ ಶುಭ ಕೋರಿದ್ದಾರೆ.