ಮನೆ-ದ್ವಿಚಕ್ರ ವಾಹನ ಕಳ್ಳನ ಬಂಧನ 

Team Udayavani, Apr 18, 2018, 4:32 PM IST

ಹುಬ್ಬಳ್ಳಿ: ಮನೆ ಹಾಗೂ ದ್ವಿಚಕ್ರ ವಾಹನಗಳನ್ನು ಕಳ್ಳತನ ಮಾಡುವುದನ್ನೆ ದಂಧೆ ಮಾಡಿಕೊಂಡಿದ್ದ ಓರ್ವನನ್ನು ಗೋಕುಲ ರಸ್ತೆ ಪೊಲೀಸರು ಬಂಧಿಸಿ, ಆತನಿಂದ 36 ಗ್ರಾಂ ಚಿನ್ನಾಭರಣ, 170 ಗ್ರಾಂ ಬೆಳ್ಳಿ ಸಾಮಗ್ರಿ, ಟಿವಿ, ಬೈಕ್‌ ಸೇರಿದಂತೆ ಒಟ್ಟು 3.25ಲಕ್ಷ ರೂ. ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.

ಇಲ್ಲಿನ ಹಳೇಹುಬ್ಬಳ್ಳಿ ಆನಂದನಗರದ ರಫೀಕ್‌ ಊರ್ಫ್‌ ಗಬ್ಬರ ಐ. ಮುಲ್ಲಾ ಎಂಬಾತನೆ ಸಿಕ್ಕಿಬಿದ್ದಿದ್ದಾನೆ. ಮಂಗಳವಾರ ಸಂಶಯಾಸ್ಪದವಾಗಿ ತಿರುಗಾಡುತ್ತಿದ್ದ ಈತನನ್ನು ಪೊಲೀಸರು ಹಿಡಿದು ವಿಚಾರಿಸಿದಾಗ, ಗೋಕುಲ ರಸ್ತೆ ಪೊಲೀಸ್‌ ಠಾಣೆ ಸಮೀಪದ ಮಿನರ್ವಾ ಬಾರ್‌ ಬಳಿ ವೀರೇಶ ಸುತಗಟ್ಟಿ ಅವರು ಇಟ್ಟಿದ್ದ ರಾಯಲ್‌ ಎನ್‌ಫೀಲ್ಡ್‌, ಹಳೇಹುಬ್ಬಳ್ಳಿ ಏಕತಾ ಕಾಲೋನಿಯಲ್ಲಿ ಮಂಜುನಾಥ ಸರಳಾ ಹಾಗೂ ರೆಹಮತನಗರದ ಹುಸೇನ ಮುಜಾವರ ಅವರ ಮನೆ ಕೀಲಿ ಮುರಿದು 36 ಗ್ರಾಂ ಚಿನ್ನಾಭರಣ, 170ಗ್ರಾಂ ಬೆಳ್ಳಿ ಸಾಮಗ್ರಿ, ಒಂದು ಟಿವಿ ಹಾಗೂ ಕಲಘಟಗಿಯಲ್ಲಿ ಬೈಕ್‌ ಕಳುವು ಮಾಡಿದ್ದಾಗಿ ಒಪ್ಪಿಕೊಂಡಿದ್ದ.

ನಂತರ ಠಾಣಾಧಿಕಾರಿ ಮಲ್ಲಯ್ಯ ಮಠಪತಿ, ಪಿಎಸ್‌ಐ ಎಸ್‌.ಎಚ್‌. ಹೊಸಮನಿ ಹಾಗೂ ಸಿಬ್ಬಂದಿಯು ಹಿರಿಯ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ ಬಂಧಿತನಿಂದ ಕಳುವು ಮಾಡಿದ್ದ ಅಂದಾಜು 3,25,400 ರೂ. ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಕಾರ್ಯಾಚರಣೆ ಕೈಗೊಂಡ ತಂಡಕ್ಕೆ ಆಯುಕ್ತರು ನಗದು ಬಹುಮಾನ ಘೋಷಿಸಿದ್ದಾರೆ.