ಬರ, ಸುನಾಮಿ, ಏಲಿಯನ್‌ ದಾಳಿ! ಇದು ಕಾಲಜ್ಞಾನಿ ಬಾಬಾ ವಂಗಾ ಅವರು ಹೇಳಿರುವ 2022ರ ಭವಿಷ್ಯ

Team Udayavani, Dec 28, 2021, 8:15 AM IST

ಲಂಡನ್‌: “ಕೊರೊನಾಗಿಂತಲೂ ಅಪಾಯಕಾರಿಯಾದ ಮತ್ತೊಂದು ವೈರಸ್‌ ಕಾಟ, ಜಲ ಬಿಕ್ಕಟ್ಟು, ಸುನಾಮಿ, ಅನ್ಯಗ್ರಹ ಜೀವಿಗಳ ಆಕ್ರಮಣ…’

ಇವೆಲ್ಲವೂ 2022ರಲ್ಲಿ ಜಗತ್ತನ್ನು ಕಾಡಲಿರುವ ಸಮಸ್ಯೆಗಳಂತೆ! ಹೀಗೆಂದು ಹೇಳಿರುವುದು ನಾವಲ್ಲ. ಬಲ್ಗೇರಿಯಾದ ಕಾಲಜ್ಞಾನಿ ಎಂದೇ ಪ್ರಖ್ಯಾತರಾಗಿದ್ದ ಬಾಬಾ ವಂಗಾ. ಇವರನ್ನು “ನೋಸ್ಟ್ರಾಡಾಮಸ್‌ ಆಫ್ ದಿ ಬಲ್ಕಾನ್ಸ್‌’ ಎಂದೂ ಕರೆಯುತ್ತಾರೆ. 1996ರಲ್ಲೇ ವಂಗಾ ಅವರು ನಿಧನರಾಗಿದ್ದಾರೆ. ಆದರೆ ತಮ್ಮ ಸಾವಿಗೂ ಮುನ್ನವೇ ಅವರು 5079ನೇ ಇಸವಿಯವರೆಗಿನ ಭವಿಷ್ಯವನ್ನು ಬರೆದಿಟ್ಟು ಹೋಗಿದ್ದಾರೆ ಎನ್ನಲಾಗಿದೆ.

ಬಾಬಾ ವಂಗಾ ಅವರು ಆರಂಭದಲ್ಲಿ ಕಾಲಜ್ಞಾನಿಯಾಗಿರಲಿಲ್ಲ. ಯಾವಾಗ ಅವರು ತಮ್ಮ ಎರಡೂ ಕಣ್ಣುಗಳ ದೃಷ್ಟಿಯನ್ನು ಕಳೆದುಕೊಂಡರೋ, ಅನಂತರ ತಮಗೆ ಭವಿಷ್ಯವನ್ನು ಅರಿಯುವ ವಿಶೇಷ ಶಕ್ತಿ ಬಂತು ಎಂದು ಸ್ವತಃ ವಂಗಾ ಅವರೇ ಹೇಳಿಕೊಂಡಿದ್ದರಂತೆ.

ಯಾವೆಲ್ಲ ಭವಿಷ್ಯ ಸತ್ಯವಾಗಿದೆ?: ವಿಶೇಷವೆಂದರೆ, ವಂಗಾ ಅವರು ಈವರೆಗೆ ನುಡಿದಿರುವ ಯಾವುದೇ ಭವಿಷ್ಯ ಸುಳ್ಳಾಗಿಲ್ವಂತೆ. ಅಮೆರಿಕದಲ್ಲಿ ನಡೆದ 9/11ರ ಉಗ್ರರ ದಾಳಿ, 2004ರ ಸುನಾಮಿ, ಬ್ರೆಕ್ಸಿಟ್‌, ಅರಬ್‌ ಕ್ರಾಂತಿ, ಐಸಿಸ್‌ ಉಗ್ರರ ಹುಟ್ಟು ಸೇರಿದಂತೆ ಹಲವು ವಿಚಾರಗಳ ಬಗ್ಗೆ ವಂಗಾ ಅವರು ಮೊದಲೇ ಹೇಳಿದ್ದರು. 9/11ರ ದಾಳಿ ಬಗ್ಗೆ ಭವಿಷ್ಯ ನುಡಿದಿದ್ದ ಅವರು, “ಉಕ್ಕಿನ ಹಕ್ಕಿ ನಡೆಸುವ ದಾಳಿಗೆ ಅಮೆರಿಕದ ಭಾತೃತ್ವ ಪತನವಾಗಲಿದೆ. ಪೊದೆಗಳಲ್ಲಿ ಅಡಗಿರುವ ತೋಳಗಳು ಅರಚಾಡಲಿವೆ. ಅಮಾಯಕರ ರಕ್ತ ಹರಿಯಲಿದೆ’ ಎಂದು ಬರೆದಿದ್ದರು.

2022ರ ಭವಿಷ್ಯವೇನು?

– ಮತ್ತೂಂದು ಅಪಾಯಕಾರಿ ವೈರಸ್‌ ಅನ್ನು  ಸೈಬೀರಿಯಾದ ಸಂಶೋಧಕರು ಪತ್ತೆ ಹಚ್ಚಲಿದ್ದಾರೆ

– ಜಗತ್ತಿನಾದ್ಯಂತ ಹಲವು ನಗರಗಳಲ್ಲಿ ಕುಡಿಯುವ ನೀರಿನ ಅಭಾವ ಎದುರಾಗುತ್ತದೆ

– ಸುನಾಮಿ ಬರಲಿದ್ದು, ಏಷ್ಯಾ ಮತ್ತು ಆಸ್ಟ್ರೇಲಿಯಾದ ದೇಶ ಗಳಲ್ಲಿ ಭಾರೀ ಪ್ರವಾಹಕ್ಕೆ ನೂರಾರು ಮಂದಿ ಬಲಿಯಾಗುತ್ತಾರೆ.

– ಭಾರತದಲ್ಲಿ ಮಿಡತೆ ದಾಳಿ ಆಗಿ, ಬೆಳೆಹಾನಿ ಸಂಭವಿಸಲಿದೆ. ಬರಗಾಲ ಬರಲಿದೆ. ತಾಪಮಾನ 50 ಡಿ.ಸೆ.ಗೇರಲಿದೆ.

– “ಔಮುವಾಮುವಾ’ ಎಂಬ ಹೆಸರಿನ ಕ್ಷುದ್ರಗ್ರಹವನ್ನು ಅನ್ಯಗ್ರಹಜೀವಿಗಳು ಭೂಮಿಗೆ ಕಳುಹಿಸಲಿದೆ.

– 2022 ವರ್ಚುವಲ್‌ ರಿಯಾಲಿಟಿಯ ವರ್ಷವಾಗಲಿದೆ. ಜನರು ಹೆಚ್ಚಿನ ಸಮಯವನ್ನು ಪರದೆ ಮೇಲೆ ಕಳೆಯಲಿದ್ದಾರೆ.