Jammu: 12ನೇ ಶತಮಾನದ ಜೋಡಿ ವಿಗ್ರಹ ಜಮ್ಮುವಿನಲ್ಲಿ ಪತ್ತೆ
Team Udayavani, Dec 24, 2023, 12:56 AM IST
ಶ್ರೀನಗರ: ಶಿವ ಮತ್ತು ಇಂದ್ರಾಣಿ ದೇವಿಯರ ಕ್ರಿ.ಶ. 12ನೇ ಶತಮಾನದಷ್ಟು ಹಳೆಯಾದ ಜೋಡಿ ವಿಗ್ರಹವು ಜಮ್ಮುವಿನಲ್ಲಿ ಪತ್ತೆಯಾಗಿದೆ ಎಂದು ಅಧಿಕಾರಿಗಳು ಶನಿವಾರ ಹೇಳಿದ್ದಾರೆ.
ಜಮ್ಮುವಿನ ಹೊರವಲ ಯದಲ್ಲಿರುವ ಭೌರ್ಕ್ಯಾಂಪ್ನಲ್ಲಿ ಭೂ ಉತ್ಖನನದ ವೇಳೆ ವಿಗ್ರಹಗಳು ಪತ್ತೆಯಾಗಿವೆ. ಬಳಿಕ ಪುರಾತತ್ವ ವಸ್ತು ಸಂಗ್ರಹಾಲಯ ಇಲಾಖೆಯ ಸಹಾಯಕ ನಿರ್ದೇಶಕಿ ಸಂಗೀತಾ ಶರ್ಮಾ ಅವರ ನೇತೃತ್ವದ ನಾಲ್ವರು ಸದಸ್ಯರ ತಂಡವು ಸ್ಥಳಕ್ಕೆ ಭೇಟಿ ನೀಡಿ, ಪರಿಶೀಲಿಸಿ ವಿಗ್ರಹಗಳನ್ನು ವಶಕ್ಕೆ ಪಡೆದುಕೊಂಡಿದೆ.
ಪ್ರಾಚೀನವಾದ ಬಹಳ ಅಪರೂಪದ ವಿಗ್ರಹಗಳು 12ನೇ ಶತಮಾನದವೆಂಬುದು ಪ್ರಾಥಮಿಕ ಶೋಧದ ವೇಳೆ ತಿಳಿದುಬಂದಿದೆ. ಇಂದ್ರಾಣಿ ದೇವಿಯ ವಿಗ್ರಹ 28/12.5 ಇಂಚು ಅಳತೆಯದಾಗಿದೆ ಮತ್ತು 55 ಕೆ.ಜಿ. ತೂಕ ಹೊಂದಿದೆ. ಅದೇ ರೀತಿ ಶಿವನ ವಿಗ್ರಹವು 21/14 ಇಂಚಿನ ಅಳತೆಯಲ್ಲಿದ್ದು 40 ಕೆ.ಜಿ. ತೂಕ ಹೊಂದಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.