PMO ಅಧಿಕಾರಿ ಎಂದು ಹೇಳಿಕೊಂಡು 6 ಮದುವೆಯಾಗಿದ್ದ!- ಕಾಶ್ಮೀರದ ವಂಚಕ ಈಗ ಪೊಲೀಸರ ಬಲೆಗೆ
ಎಟಿಎಂ, ಆಧಾರ್ ಸೇರಿ 100ಕ್ಕೂ ಅಧಿಕ ನಕಲಿ ದಾಖಲೆಗಳು ವಶಕ್ಕೆ- ಪಾಕ್, ಕೇರಳದೊಂದಿಗೆ ನಂಟು
Team Udayavani, Dec 17, 2023, 11:19 PM IST
ನವದೆಹಲಿ: ಪ್ರಧಾನ ಮಂತ್ರಿಗಳ ಕಚೇರಿಯಲ್ಲಿ ಉದ್ಯೋಗಿ, ಎನ್ಐಎ ಅಧಿಕಾರಿಗಳ ಅತ್ಯಂತ ಆಪ್ತ, ನರರೋಗ ತಜ್ಞ ಎಂದೆಲ್ಲ ಹೇಳಿಕೊಂಡು ಎಲ್ಲರನ್ನು ವಂಚಿಸುತ್ತಿದ್ದ ವ್ಯಕ್ತಿಯನ್ನು ಒಡಿಶಾ ಪೊಲೀಸರ ವಿಶೇಷ ತಂಡ ಬಂಧಿಸಿದೆ. ಆತನನ್ನು ಜಮ್ಮು ಮತ್ತು ಕಾಶ್ಮೀರದ ಕುಪ್ವಾರದ ಸಯ್ಯದ್ ಇಶಾನ್ ಬುಖಾರಿ ಅಲಿಯಾಸ್ ಡಾ. ಇಶಾನ್ ಬುಖಾರಿ ಎಂದು ಗುರುತಿಸಲಾಗಿದೆ.
ಉತ್ತರ ಪ್ರದೇಶ, ಮಹಾರಾಷ್ಟ್ರ, ಒಡಿಶಾ, ಜಮ್ಮು ಮತ್ತು ಕಾಶ್ಮೀರ ಸೇರಿದಂತೆ ದೇಶದ ವಿವಿಧ ಭಾಗಗಳಲ್ಲಿ ಕನಿಷ್ಠವೆಂದರೂ 6 ವಿವಾಹವಾಗಿದ್ದ. ಇನ್ನೂ 7 ಮಹಿಳೆಯರೊಂದಿಗೆ ಸಂಬಂಧ ಹೊಂದಿದ್ದ. ಆತನಿಂದ ಅಂತಾರಾಷ್ಟ್ರೀಯ ಶಿಕ್ಷಣ ಸಂಸ್ಥೆಗಳ ನಕಲಿ ಪದವಿ ಪ್ರಮಾಣ ಪತ್ರ, ಎಟಿಎಂ ಕಾರ್ಡ್ಗಳು, ಖಾಲಿ ಚೆಕ್ಗಳು, ಆಧಾರ್ ಕಾರ್ಡ್, ವಿಸಿಟಿಂಗ್ ಕಾರ್ಡ್ಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಈ ಪೈಕಿ ಐವಿ ಲೀಗ್ ವಿವಿಗಳಲ್ಲಿ ಪ್ರಸಿದ್ಧವಾಗಿರುವ ಕಾರ್ನೆಲ್ ವಿವಿಯ ವೈದ್ಯಕೀಯ ಪದವಿ ಪ್ರಮಾಣ ಪತ್ರ, ಕೆನಡಾದ ಆರೋಗ್ಯ ಸೇವಾ ಸಂಸ್ಥೆಯ ಮಾನ್ಯತೆ, ಕ್ರಿಶ್ಚಿಯನ್ ಮೆಡಿಕಲ್ ಕಾಲೇಜು ವೆಲ್ಲೂರಿನ ಪ್ರಮಾಣ ಪತ್ರ ಸೇರಿದಂತೆ 100ಕ್ಕೂ ಅಧಿಕ ನಕಲಿ ದಾಖಲೆಗಳು ಪತ್ತೆಯಾಗಿವೆ.
ಕೇರಳ ಮತ್ತು ಪಾಕಿಸ್ತಾನಗಳಲ್ಲಿನ ಕೆಲ ಸಂಸ್ಥೆಗಳ ಜತೆಗೆ ಲಿಂಕ್ ಇರುವ ಸಾಧ್ಯತೆಯ ಬಗ್ಗೆಯೂ ಆತನನ್ನು ವಿಚಾರಣೆ ನಡೆಸಲಾಗಿದೆ ಎಂದು ಒಡಿಶಾ ವಿಶೇಷ ಪೊಲೀಸ್ ತಂಡದ ಐ.ಜಿ. ಜೆ.ಎನ್.ಪಂಕಜ್ ಹೇಳಿದ್ದಾರೆ.