ಹಿರಿಯ ಪತ್ರಕರ್ತ ವಿನೋದ್ ದುವಾ ಪತ್ನಿ, ರೆಡಿಯೋಲಾಜಿಸ್ಟ್ ಪದ್ಮಾವತಿ ಕೋವಿಡ್ ನಿಂದ ನಿಧನ

Team Udayavani, Jun 12, 2021, 8:35 AM IST

ನವದೆಹಲಿ:ಹಿರಿಯ ಪತ್ರಕರ್ತ ವಿನೋದ್ ದುವಾ ಪತ್ನಿ, ಖ್ಯಾತ ವಿಕಿರಣಶಾಸ್ತ್ರಜ್ಞೆ ಪದ್ಮಾವತಿ ದುವಾ(61ವರ್ಷ) ಶುಕ್ರವಾರ(ಜೂನ್ 11) ಕೋವಿಡ್ 19 ಸೋಂಕಿನಿಂದ ನಿಧನರಾಗಿರುವುದಾಗಿ ಕುಟುಂಬದ ಮೂಲಗಳು ತಿಳಿಸಿವೆ.

ಚಿನ್ನಾ ದುವಾ ಎಂದೇ ಜನಪ್ರಿಯರಾಗಿದ್ದ ಪದ್ಮಾವತಿ ದುವಾ ಅವರು ಕೋವಿಡ್ 19 ಸೋಂಕು ದೃಢಪಟ್ಟ ನಂತರ ಮೇ 13ರಿಂದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ನಂತರ ಪದ್ಮಾವತಿ ಅವರ ಆರೋಗ್ಯ ಸ್ಥಿತಿ ಸುಧಾರಿಸದ ಹಿನ್ನೆಲೆಯಲ್ಲಿ ಗುರ್ಗಾಂವ್ ನ ಮೇದಾಂತ ಆಸ್ಪತ್ರೆಗೆ ದಾಖಲಿಸಲಾಗಿತ್ತು ಎಂದು ವರದಿ ತಿಳಿಸಿದೆ.

ಪತಿ ವಿನೋದ್ ದುವಾ ಅವರಿಗೂ ಕೋವಿಡ್ 19 ದೃಢಪಟ್ಟಿದ್ದು, ಜೂನ್ 7ರಂದು ಸೋಂಕಿನಿಂದ ಗುಣಮುಖರಾಗಿದ್ದರು. ಆದರೆ ಪತ್ನಿ ಪದ್ಮಾವತಿ ಅವರ ಆರೋಗ್ಯದ ಬಗ್ಗೆ ನಿರಂತರವಾಗಿ ಟ್ವೀಟರ್ ನಲ್ಲಿ ಮಾಹಿತಿ ಹಂಚಿಕೊಳ್ಳುತ್ತಿದ್ದರು. ಇಂದು ಬೆಳಗ್ಗೆ ಚಿನ್ನಾ ವಿಧಿವಶ ಎಂದು ವಿನೋದ್ ದುವಾ ಟ್ವೀಟ್ ಮಾಡಿದ್ದರು.

ಪದ್ಮಾವತಿ ಅವರು ಪತಿ ವಿನೋದ್, ಪುತ್ರಿಯರಾದ ಮಲ್ಲಿಕಾ ದುವಾ ಮತ್ತು ಬಕುಲ್ ದುವಾ ಸೇರಿದಂತೆ ಅಪಾರ ಬಂಧುಬಳಗವನ್ನು ಅಗಲಿದ್ದಾರೆ. ತಮ್ಮಲ್ಲಿನ ಅಪೂರ್ವ ಸೀರೆಗಳ ಸಂಗ್ರಹದಿಂದಾಗಿ ಸಾಮಾಜಿಕ ಜಾಲತಾಣದಲ್ಲಿ ಪದ್ಮಾವತಿ ಅವರು ಜನಪ್ರಿಯರಾಗಿದ್ದರು.