ಸುಪ್ರೀಂಕೋರ್ಟ್‌ಗೆ ಇನ್ನೂ ಇಬ್ಬರು ಜಡ್ಜ್ ಗಳು: ಸಿಜೆಐ ಸೇರಿಸಿ ಈಗ 34 ನ್ಯಾಯಮೂರ್ತಿಗಳು

Team Udayavani, Feb 11, 2023, 7:25 AM IST

ನವದೆಹಲಿ:ಸುಪ್ರೀಂಕೋರ್ಟ್‌ನ ನ್ಯಾಯಮೂರ್ತಿಗಳನ್ನಾಗಿ ಕನ್ನಡಿಗ ನ್ಯಾ.ಅರವಿಂದ ಕುಮಾರ್‌ ಮತ್ತು ನ್ಯಾ.ರಾಜೇಶ್‌ ಬಿಂದಾಲ್‌ ಅವರನ್ನು ನೇಮಕ ಮಾಡಲಾಗಿದೆ.

ಇದರಿಂದಾಗಿ ಸುಪ್ರೀಂಕೋರ್ಟ್‌ನಲ್ಲಿ ನ್ಯಾಯಮೂರ್ತಿಗಳ ಗರಿಷ್ಠ ಸಂಖ್ಯೆ 34ನ್ನು ತಲುಪಿದೆ. ಹೊಸ ನೇಮಕದ ಬಗ್ಗೆ ಕೇಂದ್ರ ಕಾನೂನು ಮತ್ತು ನ್ಯಾಯ ಖಾತೆ ಸಚಿವ ಕಿರಣ್‌ ರಿಜಿಜು ಟ್ವೀಟ್‌ ಮಾಡಿದ್ದಾರೆ.

ನ್ಯಾಯಮೂರ್ತಿಗಳ ನೇಮಕದ ಬಗ್ಗೆ ಕೇಂದ್ರ ಸರ್ಕಾರ ಮತ್ತು ಸುಪ್ರೀಂಕೋರ್ಟ್‌ನ ನಡುವೆ ಭಿನ್ನಾಭಿಪ್ರಾಯಗಳ ನಡುವೆಯೂ ಕೂಡ ಕಳೆದ ವಾರ ಐವರು ನ್ಯಾಯಮೂರ್ತಿಗಳನ್ನು ನೇಮಕ ಮಾಡಲಾಗಿತ್ತು. ನ್ಯಾ.ರಾಜೇಶ್‌ ಬಿಂದಾಲ್‌ ಗುಜರಾತ್‌ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿಯಾಗಿದ್ದರೆ, ಅದೇ ಹೈಕೋರ್ಟ್‌ನಲ್ಲಿ ಕನ್ನಡಿಗ ಅರವಿಂದ ಕುಮಾರ್‌ ನ್ಯಾಯಮೂರ್ತಿಯಾಗಿದ್ದರು.

ನೇಮಕಕ್ಕೆ ಶಿಫಾರಸು:
ಮತ್ತೊಂದೆಡೆ, ಮುಖ್ಯ ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್‌ ನೇತೃತ್ವದ ಕೊಲಿಜಿಯಂ ಕಲ್ಕತ್ತಾ ಹೈಕೋರ್ಟ್‌ಗೆ ನ್ಯಾ.ಟಿ.ಎಸ್‌.ಶಿವಗಂಗಂ, ನ್ಯಾ.ಪ್ರೀತೀಂಕರ್‌ ದಿವಾಕರ್‌ ಅವರನ್ನು ಅಲಹಾಬಾದ್‌ ಹೈಕೋರ್ಟ್‌ಗೆ, ನ್ಯಾ.ರಮೇಶ್‌ ಸಿನ್ಹಾ ಅವರನ್ನು ಛತ್ತೀಸ್‌ಗಡ ಹೈಕೋರ್ಟ್‌ಗೆ, ನ್ಯಾ.ಸೋನಿಯಾ ಜಿ. ಸೋಲಂಕಿ ಗುಜರಾತ್‌ ಹೈಕೋರ್ಟ್‌ಗೆ, ನ್ಯಾ.ಧೀರಜ್‌ ಸಿಂಗ್‌ ಠಾಕೂರ್‌ ಅವರನ್ನು ಮಣಿಪುರ ಹೈಕೋರ್ಟ್‌ಗೆ ಮುಖ್ಯ ನ್ಯಾಯಮೂರ್ತಿಗಳನ್ನಾಗಿ ನೇಮಿಸಲು ಶಿಫಾರಸು ಮಾಡಿದೆ.