ಈಗ ತತ್ಕಾಲ್‌ ಟಿಕೆಟ್‌ ಬುಕ್ಕಿಂಗ್‌ ಮೊದಲು; IRCTCಗೆ ಹಣ ಪಾವತಿ ಅನಂತರ

Team Udayavani, Aug 3, 2017, 11:42 AM IST

ಹೊಸದಿಲ್ಲಿ : ಕೊನೇ ಕ್ಷಣದಲ್ಲಿ ರೈಲು ಟಿಕೆಟ್‌ ಬುಕ್‌ ಮಾಡುವುದು ಈಗ ಇನ್ನೂ ಸುಲಭವಾಗಿದೆ. ಕೊನೇ ಕ್ಷಣದ ರೈಲು ಪ್ರಯಾಣಿಕರು ಈಗಿನ್ನು ರೈಲ್ವೇ ಕೇಟರಿಂಗ್‌ ಮತ್ತು  ಟೂರಿಸಂ ಕಾರ್ಪೊರೇಶನ್‌ (IRCTC) ವೆಬ್‌ಸೈಟಿನಲ್ಲಿ ತತ್ಕಾಲ್‌ ಕೋಟಾ ದಡಿ ಟಿಕೆಟ್‌ ಬುಕ್‌ ಮಾಡಿ ಹಣವನ್ನು ಅನಂತರ ಪಾವತಿಸಬಹುದಾಗಿದೆ. 

ಈ ತನಕ ಈ ಸೇವೆಯು ಜನರಲ್‌ ರಿಸರ್ವೇಶನ್‌ಗೆ ಮಾತ್ರವೇ ಲಭ್ಯವಿತ್ತು. ಈ ವರೆಗೆ IRCTC ವೆಬ್‌ಸೈಟ್‌, ಟಿಕೆಟ್‌ ದೃಢೀಕರಣ ಮಾಡುವ ಮುನ್ನ ಪ್ರಯಾಣಿಕರು ತತ್ಕಾಲ್‌ ಟಿಕೆಟನ್ನು  ಮೊದಲು ಆನ್‌ಲೈನ್‌ ಪೇಮೆಂಟ್‌ ಗೇಟ್‌ವೇ ಗಳ ಮೂಲಕ ಬುಕ್‌ ಮಾಡಬೇಕಾಗಿತ್ತು. 

IRCTC ಬಳಕೆದಾರರು ಈಗಿನ್ನು ತತ್ಕಾಲ್‌ ಟಿಕೆಟ್‌ಗಳನ್ನು ನಗದು, ಡೆಬಿಟ್‌ ಅಥವಾ ಕ್ರೆಡಿಟ್‌ ಕಾರ್ಡ್‌ ಮೂಲಕ ಪಾವತಿಸಿ ಆ ಟಿಕೆಟ್‌ಗಳು ತಮ್ಮ ಮನೆ ಬಾಗಿಲಿಗೇ ಡೆಲಿವರಿ ಮಾಡಿಸಿಕೊಳ್ಳುವ ಸೇವೆಯನ್ನು ಪಡೆಯಬಹುದಾಗಿದೆ ಎಂದು IRCTC ಪಾವತಿ ಪೂರೈಕೆದಾರ ಆ್ಯಂಡ್ಯುರಿಲ್‌ ಟೆಕ್ನಾಲಜೀಸ್‌ ಹೇಳಿದೆ. 

ಈ ಹೊಸ ಸೌಕರ್ಯದಿಂದಾಗಿ ಈ ಹಿಂದೆ ಆನ್‌ಲೈನ್‌ನಲ್ಲಿ ಸಾಮಾನ್ಯವಾಗಿದ್ದ “ವಹಿವಾಟು ವೈಫ‌ಲ್ಯ’ವನ್ನು ನಿವಾರಿಸುವುದಲ್ಲದೆ ಟಿಕೆಟ್‌ ಹಣ ಬಳಕೆದಾರರ ಖಾತೆಗೆ ಡೆಬಿಟ್‌ ಆಗಿಯೂ ಟಿಕೆಟ್‌ ಜಾರಿಯಾಗದ (ಬಹುಬಗೆಯ ಕಾರಣಗಳಿಂದ) ಪರಿಸ್ಥಿತಿಯನ್ನು ತಪ್ಪಿಸುತ್ತದೆ. ಈಗ ಹಣ ಮರುಪಾವತಿಯ ಅವಧಿಯು ಏಳದಿಂದ ಹದಿನೈದು ದಿನಗಳದ್ದಾಗಿರುತ್ತದೆ.