‘ಬಾಂಧವ್ಯ’ದ ಮಾತ್ರೆ ಮಾರಾಟ
Team Udayavani, Aug 24, 2018, 8:05 AM IST
ಹೊಸದಿಲ್ಲಿ: ಸೆ.1ರಿಂದ ದೇಶದ ಎಲ್ಲಾ ಖಾಸಗಿ ಮೆಡಿಕಲ್ಗಳಲ್ಲೂ ‘ಜೀವ ಉಳಿಸುವ ಹಾರ್ಮೋನ್ ಮತ್ತು ಲವ್ ಹಾರ್ಮೋನ್’ ಎಂದೇ ಪರಿಗಣಿತವಾಗಿರುವ ಆಕ್ಸಿಟೋಸಿನ್ ಅನ್ನು ಮಾರಾಟ ಮಾಡಲು ಕೇಂದ್ರ ಆರೋಗ್ಯ ಸಚಿವಾಲಯ ಒಪ್ಪಿಗೆ ನೀಡಿದೆ. ಜು.1 ರಿಂದ ಜಾರಿಯಾಗುವಂತೆ ಈ ಔಷಧ ಮಾರಾಟ ನಿಷೇಧಿಸಿದ್ದ ಕೇಂದ್ರ ಸರಕಾರ, ಇದೀಗ ಆದೇಶ ಮಾರ್ಪಾಡು ಮಾಡಿದೆ. ಆದರೆ, ಈ ಔಷಧ ಕರ್ನಾಟಕ ಆ್ಯಂಟಿಬಯಾಟಿಕ್ಸ್ ಪ್ರೈವೇಟ್ ಲಿಮಿಟೆಡ್ನಲ್ಲಷ್ಟೇ (ಕೆಎಪಿಎಲ್) ಉತ್ಪಾದನೆ ಮಾಡಬೇಕು. ಕೇಂದ್ರ ಮತ್ತು ಎಲ್ಲ ರಾಜ್ಯ ಸರಕಾರಗಳು ಬೇಕಾದಷ್ಟು ಔಷಧಕ್ಕೆ ಬೇಡಿಕೆ ಸಲ್ಲಿಸಬೇಕು ಎಂದೂ ಸೂಚಿಸಲಾಗಿದೆ.
ಏತಕ್ಕಾಗಿ ಇದು ಬಳಕೆ?: ಹೆರಿಗೆ ಸಂದರ್ಭದಲ್ಲಿ ಇದು ಬಳಕೆ ಆಗುತ್ತದೆ. ಗರ್ಭಿಣಿಯೊಬ್ಬರಿಗೆ ಪ್ರಸವ ದಿನ ಬಂದರೂ ಹೆರಿಗೆ ನೋವು ಕಾಣಿಸಿಕೊಳ್ಳದಿದ್ದರೆ ಇದನ್ನು ನೀಡಲಾಗುತ್ತದೆ. ಇದು ದೇಹ ಮತ್ತು ಜನನಾಂಗದ ನಡುವೆ ಸಂಪರ್ಕವೇರ್ಪಡಿಸಿ, ಹೆರಿಗೆಯಲ್ಲಿ ಸಹಾಯ ಮಾಡುತ್ತದೆ. ಅಷ್ಟೇ ಅಲ್ಲ, ಹೆರಿಗೆ ಅನಂತರ ತಾಯಿಯಲ್ಲಿ ಹಾಲು ಉತ್ಪತ್ತಿಯಾಗಲೂ ಈ ಹಾರ್ಮೋನ್ ಪ್ರಮುಖ ಪಾತ್ರ ವಹಿಸುತ್ತದೆ.
ದುರ್ಬಳಕೆಯಿಂದಾಗಿ ನಿಷೇಧ: ಆದರೆ, ಇದನ್ನು ಪಶುಸಂಗೋಪನೆ ಉದ್ದಿಮೆಯಲ್ಲಿ ಬಳಸಿಕೊಳ್ಳಲಾಗುತ್ತಿತ್ತು. ರೈತರಿಗೆ ಯಾವಾಗ ಬೇಕೋ ಆ ಸಮಯದಲ್ಲಿ ಹಾಲು ಹಿಂಡಲು ಹಸುಗಳಿಗೆ ಇದನ್ನು ಹಾಕಲಾಗುತ್ತಿತ್ತು. ತರಕಾರಿಗಳ ಗಾತ್ರ ಹೆಚ್ಚಿಸಲೂ ಇದನ್ನು ರೈತರು ಬಳಸುತ್ತಿದ್ದರು. ತರಕಾರಿಗಳನ್ನು ಇನ್ನಷ್ಟು ದಪ್ಪ ಮಾಡುವ ಸಲುವಾಗಿ ಹಾಕಲಾಗುತ್ತಿತ್ತು.