ಮಿಥಾಲಿ ಜಾಗಕ್ಕೆ 15ರ ಹರೆಯದ ಶಫಾಲಿ ವರ್ಮ
Team Udayavani, Sep 6, 2019, 5:45 AM IST
ಹೊಸದಿಲ್ಲಿ: ಹರ್ಯಾಣದ 15ರ ಹರೆಯದ ಬ್ಯಾಟ್ಸ್ ಮನ್ ಶಫಾಲಿ ವರ್ಮ ಭಾರತದ ವನಿತಾ ಟಿ20 ತಂಡಕ್ಕೆ ಸೇರ್ಪಡೆಗೊಂಡಿದ್ದಾರೆ. ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧದ 5 ಪಂದ್ಯಗಳ ಸರಣಿಯ ಮೊದಲ 3 ಮುಖಾಮುಖೀಗೆ ಗುರುವಾರ ತಂಡ ಪ್ರಕಟಗೊಂಡಿದ್ದು, ಇದರಲ್ಲಿ ಶಫಾಲಿಗೆ ಅವಕಾಶ ನೀಡಲಾಗಿದೆ.
ಇತ್ತೀಚೆಗೆ ಅನುಭವಿ ಆಟಗಾರ್ತಿ ಮಿಥಾಲಿ ರಾಜ್ ಟಿ20 ಕ್ರಿಕೆಟಿಗೆ ವಿದಾಯ ಘೋಷಿಸಿದ ಬಳಿಕ ಯುವ ಆಟಗಾರ್ತಿಗೆ ಆಯ್ಕೆ ಸಮಿತಿ ಮಣೆ ಹಾಕಿರುವುದು ವಿಶೇಷ. ವನಿತಾ ಟಿ20 ಚಾಲೆಂಜ್ ಸರಣಿಯಲ್ಲಿ ಶಫಾಲಿ ಅಮೋಘ ಪ್ರದರ್ಶನ ನೀಡಿದ್ದರು. ಐಪಿಎಲ್ ವೇಳೆ ನಡೆದ ಸರಣಿಯಲ್ಲಿ ಅವರು ಮಿಥಾಲಿ ರಾಜ್ ನಾಯಕತ್ವದ “ವೆಲಾಸಿಟಿ’ ತಂಡದ ಪರ ಆಡಿದ್ದರು.
ಶಫಾಲಿ ವರ್ಮ ಭಾರತದ ಪರ ಆಡಿದ ಅತೀ ಕಿರಿಯ ಆಟಗಾರ್ತಿಯರಲ್ಲಿ ಒಬ್ಬರಾಗಲಿದ್ದಾರೆ. ದಾಖಲೆ ಗಾರ್ಗಿ ಬ್ಯಾನರ್ಜಿ ಹೆಸರಲ್ಲಿದೆ. ಅವರು 14 ವರ್ಷ, 165ನೇ ದಿನದಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದರು.
ಟಿ20 ತಂಡವನ್ನು ಹರ್ಮನ್ಪ್ರೀತ್ ಕೌರ್ ಮುನ್ನಡೆಸಿದರೆ, ಏಕದಿನಕ್ಕೆ ಮಿಥಾಲಿ ರಾಜ್ ಅವರದೇ ಸಾರಥ್ಯ ಇರಲಿದೆ. ಟಿ20 ಸರಣಿ ಸೆ. 24ರಿಂದ ಸೂರತ್ನಲ್ಲಿ, ಏಕದಿನ ಮುಖಾಮುಖೀ ಅ. 9ರಿಂದ ವಡೋದರಾದಲ್ಲಿ ಆರಂಭವಾಗಲಿದೆ.