IPL 2024; ಧೋನಿ ಐಪಿಎಲ್ ಭವಿಷ್ಯದ ಬಗ್ಗೆ ಮಹತ್ವದ ಹೇಳಿಕೆ ನೀಡಿದ ಸುರೇಶ್ ರೈನಾ

Team Udayavani, Apr 18, 2024, 12:32 PM IST

ಚೆನ್ನೈ: ಅಸಾಮಾನ್ಯ ನಾಯಕ ಎಂ.ಎಸ್‌.ಧೋನಿ ಮುಂದಿನ ಐಪಿಎಲ್‌ನಲ್ಲೂ ಆಡಬೇಕು ಎನ್ನುವುದು ಅಭಿಮಾನಿಗಳ ಬಲವಾದ ಒತ್ತಾಯ. ಅದಕ್ಕೆ ಸರಿಯಾಗಿ ಸುರೇಶ್‌ ರೈನಾ, ಧೋನಿ ಆಡ್ತಾರೆ ಎನ್ನುವ ಮೂಲಕ ಅಚ್ಚರಿ ಹುಟ್ಟಿಸಿದ್ದಾರೆ. ಈ ಮೂಲಕ ಧೋನಿ ಮುಂದಿನ ಐಪಿಎಲ್‌ನಲ್ಲಿ ಆಡಬಹುದು ಎಂಬ ಚರ್ಚೆಗಳುಜೋರಾಗಿವೆ.

ಜಿಯೋ ಸಿನಿಮಾದ ಕಾರ್ಯಕ್ರಮವೊಂದರಲ್ಲಿ, ಧೋನಿ ಮುಂದಿನ ಐಪಿಎಲ್‌ ನಲ್ಲಿ ಆಡ್ತಾರಾ ಎಂಬ ಪ್ರಶ್ನೆ ಎದುರಾಯಿತು. ಇದಕ್ಕೆ ಒಂದೇ ಪದದಲ್ಲಿ ಉತ್ತರಿಸಿದ ರೈನಾ, ‘ಖೇಲೇಂಗೆ’ ಎಂದಷ್ಟೇ ಹೇಳಿದರು! ಅದೇ ಕಾರ್ಯಕ್ರಮದಲ್ಲಿದ್ದ ಧೋನಿಯ ಆಪ್ತ ಆರ್‌.ಪಿ.ಸಿಂಗ್‌ ಕೂಡ, ಧೋನಿಯದ್ದು ಇದು ಕೊನೇ ಐಪಿಎಲ್‌ ಸೀಸನ್‌ ಎಂದು ಅನ್ನಿಸುತ್ತಿಲ್ಲ ಎಂದರು. ಅಲ್ಲಿಗೆ ಅಭಿಮಾನಿಗಳ ಕನಸಿಗೆ ಮತ್ತೆ ರೆಕ್ಕೆಗಳು ಮೂಡಿವೆ.

ಮೊಣಕಾಲು ನೋವಿನಿಂದ ಬಳಲುತ್ತಿರುವ 42ರ ಹರೆಯದ ಧೋನಿ, ಮುಂದಿನ ಸೀಸನ್‌ನಲ್ಲಿ ಆಡ್ತಾರೋ ಇಲ್ಲವೋ ಎನ್ನುವ ಬಗ್ಗೆ ಅನುಮಾನ ಮೂಡಿತ್ತು. ರೈನಾ ಮಾತನಾಡಿರುವ ವಿಡಿಯೋ ಜಾಲತಾಣದಲ್ಲಿ ವೈರಲ್‌ ಆಗಿದೆ.