ಒಲಿಂಪಿಕ್ಸ್‌ ಮುಂದೂಡುವುದೇ ಒಳ್ಳೆಯದು : ಗೋಪಿಚಂದ್‌

Team Udayavani, Mar 20, 2020, 11:36 AM IST

ನವದೆಹಲಿ: ಸದ್ಯದ ಪರಿಸ್ಥಿತಿಯಲ್ಲಿ ಟೋಕಿಯೋ ಒಲಿಂಪಿಕ್ಸ್‌ ಕ್ರೀಡಾಕೂಟವನ್ನು ಮುಂದೂಡುವುದೇ ಒಳ್ಳೆಯದು ಎಂದು ಭಾರತೀಯ ಬ್ಯಾಡ್ಮಿಂಟನ್‌ ತಂಡದ ಕೋಚ್‌ ಪುಲ್ಲೇಲ ಗೋಪಿಚಂದ್‌ ಹೇಳಿ ದ್ದಾರೆ.

ಈ ಬಾರಿಯ ಒಲಿಂಪಿಕ್ಸ್‌  ನಲ್ಲಿ ಬರೋಬ್ಬರಿ 200 ರಾಷ್ಟ್ರಗಳು ಮತ್ತು 11,000 ಸಾವಿರ ಕ್ರೀಡಾಪಟುಗಳು ಪಾಲ್ಗೊಳಲಿ ದ್ದಾರೆ ಎಂದು ಅಂತಾ ರಾಷ್ಟ್ರೀಯ ಒಲಿಂಪಿಕ್ಸ್‌ ಸಮಿತಿ ತಿಳಿಸಿದೆ. ಉಳಿದಂತೆ ಇನ್ನೂ ಕೆಲವು ಕ್ರೀಡಾ ಪಟುಗಳು ಒಲಿಂಪಿಕ್ಸ್‌ ಅರ್ಹತೆಗಾಗಿ ಎದುರು ನೋಡುತ್ತಿದ್ದಾರೆ. ಈಗಾಗಲೇ ಎಲ್ಲ ಕ್ರೀಡಾಕೂಟಗಳನ್ನು ರದ್ದುಗೊಳಿಸಿದ ಕಾರಣ ಅನೇಕ ಕ್ರೀಡಾಪಟುಗಳಿಗೆ ಈ ಕೂಟದಲ್ಲಿ ಪಾಲ್ಗೊಳ್ಳಲು ಸಾಧ್ಯವಾಗದು.

ಇನ್ನೊಂದೆಡೆ ಕೆಲವು ರಾಷ್ಟ್ರಗಳ ಕ್ರೀಡಾಳುಗಳು ಕೊರೊನಾ ಭಯದಿಂದ ಹಿಂದೆಸರಿಯಬಹುದು. ಇದನ್ನೆಲ್ಲ ಗಮನಿಸಿದಾಗ ಒಲಿಂಪಿಕ್ಸ್‌ ಕೂಟವನ್ನು ಮುಂದೂಡುವುದೇ ಸೂಕ್ತ…’ ಎಂದು ಗೋಪಿಚಂದ್‌ ಹೇಳಿದ್ದಾರೆ.

ಕೊರೊನಾ ಭೀತಿಯಲ್ಲೂ ಆಲ್‌ ಇಂಗ್ಲೆಂಡ್‌ ಬ್ಯಾಡ್ಮಿಂಟನ್‌ ಪಂದ್ಯಾವಳಿಯನ್ನು ಮುಂದು ವರಿಸಿದ್ದು ಸರಿಯಲ್ಲ ಎಂದೂ ಗೋಪಿಚಂದ್‌ ಹೇಳಿದ್ದರು. ಈ ಕೂಟದ ಬಗ್ಗೆ ಸೈನಾ ನೆಹ್ವಾಲ್‌ ಎತ್ತಿದ್ದ ಆಕ್ಷೇಪವನ್ನು ಗೋಪಿಚಂದ್‌ ಸಮರ್ಥಿಸಿದ್ದಾರೆ. ಕೊರೊನಾ ಕಾರಣದಿಂದ ಹೈದರಾಬಾದ್‌ನಲ್ಲಿರುವ ತಮ್ಮ ಬ್ಯಾಡ್ಮಿಂಟನ್‌ ಅಲಾಡೆಮಿಯನ್ನು ಗೋಪಿಚಂದ್‌ ಈಗಾಗಲೇ ಬಂದ್‌ ಮಾಡಿದ್ದಾರೆ.