ಮೊದಲ ಸುತ್ತಲ್ಲೇ ಸೋತ ಶರಪೋವಾ

Team Udayavani, Jul 5, 2018, 6:00 AM IST

ಲಂಡನ್‌: 2004ರ ಚಾಂಪಿಯನ್‌ ಮರಿಯಾ ಶರಪೋವಾ ಮೊದಲ ಸುತ್ತಿನಲ್ಲೇ ಸೋತು ವಿಂಬಲ್ಡನ್‌ ಕೂಟದಿಂದ ಹೊರಬಿದ್ದಿದ್ದಾರೆ. ರಶ್ಯದವರೇ ಆದ ಅರ್ಹತಾ ಆಟಗಾರ್ತಿ ವಿಟಾಲಿಯಾ ಡಿಯಚೆಂಕೊ ಈ ಪಂದ್ಯವನ್ನು 6-7 (3), 7-6 (3), 6-1 ಅಂತರದಿಂದ ಗೆದ್ದು ದೊಡ್ಡ ಬೇಟೆಯಾಡಿದರು. ಶರಪೋವಾ ವಿಂಬಲ್ಡನ್‌ ಕೂಟದ ಪ್ರಥಮ ಸುತ್ತಿನಲ್ಲೇ ಸೋಲನುಭವಿಸಿದ್ದು ಇದೇ ಮೊದಲು.

ನೆಚ್ಚಿನ ಆಟಗಾರ್ತಿ ಪೆಟ್ರಾ ಕ್ವಿಟೋವಾ ಮೊದಲ ಸುತ್ತಿನಲ್ಲೇ ಪರಾಭವಗೊಂಡ ಬಳಿಕ “ಆಲ್‌ ಇಂಗ್ಲೆಂಡ್‌’ ಕಣದಲ್ಲಿ ಸಂಭವಿಸಿದ ಏರುಪೇರಿನ ಫ‌ಲಿತಾಂಶ ಇದಾಗಿದೆ. 5 ಬಾರಿಯ ಚಾಂಪಿಯನ್‌ ವೀನಸ್‌ ವಿಲಿಯಮ್ಸ್‌ ಗೆಲುವಿನ ಓಟ ಮುಂದುವರಿಸಿದ್ದಾರೆ. ಬುಧವಾರದ 2ನೇ ಸುತ್ತಿನ ಪಂದ್ಯದಲ್ಲಿ ಅವರು ರೊಮೇನಿಯಾದ ಅಲೆಕ್ಸಾಂಡ್ರಾ ಡುಲ್ಗೆರು ವಿರುದ್ಧ ಮೊದಲ ಸೆಟ್‌ ಕಳೆದುಕೊಂಡು 4-6, 6-0, 6-1 ಅಂತರದಿಂದ ಗೆದ್ದು ಬಂದರು.

7ನೇ ಶ್ರೇಯಾಂಕದ ಕ್ಯಾರೋಲಿನಾ ಪ್ಲಿಸ್ಕೋವಾ ಮಾಜಿ ನಂ. 1 ಆಟಗಾರ್ತಿ ವಿಕ್ಟೋರಿಯಾ ಅಜರೆಂಕಾ ವಿರುದ್ಧ 6-3, 6-3 ಅಂತರದಿಂದ ಗೆದ್ದು ಮೊದಲ ಬಾರಿಗೆ ವಿಂಬಲ್ಡನ್‌ ತೃತೀಯ ಸುತ್ತು ಪ್ರವೇಶಿಸಿದರು. ಅಮೆರಿಕದ ಮ್ಯಾಡಿಸನ್‌ ಕೀಸ್‌ ಥಾಯ್ಲೆಂಡಿನ ಲುಕ್ಸಿಕಾ ಕುಮ್‌ಕುಮ್‌ ಅವರನ್ನು 6-4, 6-3ರಿಂದ ಮಣಿಸಿ ಮೂರಕ್ಕೇರಿದರು. ಪುರುಷರ ಸಿಂಗಲ್ಸ್‌ನಲ್ಲಿ ಮಿಲೋಸ್‌ ರಾನಿಕ್‌ ಆಸ್ಟ್ರೇಲಿಯದ ಜಾನ್‌ ಮಿಲ್‌ಮಾನ್‌ ಅವರನ್ನು 7-6 (4), 7-6 (4), 7-6 (4) ಅಂತರದಿಂದ ಸೋಲಿಸಿ 3ನೇ ಸುತ್ತು ತಲುಪಿದರು.