ಹಿಂದೂ ಮಹಾಸಾಗರ ಪ್ರವೇಶಿಸಿದ ಚೀನದ ಬೇಹುಗಾರಿಕಾ ನೌಕೆ

Team Udayavani, Nov 4, 2022, 10:28 PM IST

ನವದೆಹಲಿ: ಭಾರತದ ಯೋಜಿತ ಕ್ಷಿಪಣಿ ಪರೀಕ್ಷೆಯ ದಿನ ಸಮೀಪಿಸುತ್ತಿದ್ದಂತೆ, ಹಿಂದೂ ಮಹಾಸಾಗರಕ್ಕೆ ಚೀನ ಮತ್ತೊಂದು ಬೇಹುಗಾರಿಕಾ ಹಡಗನ್ನು ಕಳುಹಿಸಿಕೊಟ್ಟಿದೆ.

ಶ್ರೀಲಂಕಾದ ಹಂಬಂತೋಟ ಬಂದರಿನಲ್ಲಿ ಚೀನ ಗೂಢಚರ್ಯೆ ನೌಕೆಯೊಂದನ್ನು ನಿಯೋಜಿಸಿದ ಮೂರು ತಿಂಗಳಲ್ಲೇ ಈ ಬೆಳವಣಿಗೆ ನಡೆದಿದೆ.

ಚೀನದ ಈ ಹೊಸ ಬೇಹುಗಾರಿಕಾ ಹಡಗು ಯುವಾನ್‌ ವಾಂಗ್‌ 6ನ ಚಲನವಲನಗಳನ್ನು ಭಾರತೀಯ ನೌಕಾಪಡೆಯು ಸಕ್ರಿಯವಾಗಿ ಟ್ರ್ಯಾಕ್‌ ಮಾಡುತ್ತಿದೆ ಎಂದು ರಕ್ಷಣಾ ಇಲಾಖೆ ಮೂಲಗಳು ತಿಳಿಸಿವೆ.

ಕ್ಷಿಪಣಿ ಪರೀಕ್ಷೆಗಳು ಮತ್ತು ಉಪಗ್ರಹಗಳ ಚಲನವಲನಗಳ ಮೇಲೆ ನಿಗಾ ಇಡುವಂತೆಯೇ ಎರಡೂ ಹಡಗುಗಳನ್ನು ವಿನ್ಯಾಸಗೊಳಿಸಲಾಗಿದೆ.

ಯುವಾನ್‌ ವಾಂಗ್‌ 6 ನೌಕೆ ಈಗಾಗಲೇ ಹಿಂದೂ ಮಹಾಸಾಗರವನ್ನು ಪ್ರವೇಶಿಸಿದ್ದು, ಇಂಡೋನೇಷ್ಯಾದ ಬಾಲಿ ಕರಾವಳಿಯಾಚೆ ತಲುಪಿದೆ.

ಒಡಿಶಾ ಕರಾವಳಿಯಾಚೆ ನ.10-11ರ ವೇಳೆಗೆ 2,200 ಕಿ.ಮೀ. ವ್ಯಾಪ್ತಿಯ ಕ್ಷಿಪಣಿಯೊಂದನ್ನು ಪರೀಕ್ಷಿಸಲು ಭಾರತ ಸಿದ್ಧವಾಗುತ್ತಿರುವಂತೆಯೇ ಚೀನ ಗುಟ್ಟಾಗಿ ಈ ನೌಕೆಯನ್ನು ಕಳುಹಿಸಿದೆ ಎಂದು ಹೇಳಲಾಗಿದೆ.