ನಮ್ಮ ಮೆಟ್ರೋ: ಆಗಮನ, ನಿರ್ಗಮನಕ್ಕೆ ಒಂದೇ ಪ್ಲಾಟ್ಫಾರಂ!
Team Udayavani, Feb 26, 2022, 8:10 AM IST
ಬೆಂಗಳೂರು: “ನಮ್ಮ ಮೆಟ್ರೋ’ ಬೈಯಪ್ಪನಹಳ್ಳಿ ನಿಲ್ದಾಣದಲ್ಲಿ ಮುಂದಿನ ಆರು ತಿಂಗಳು ಆಗಮನ ಮತ್ತು ನಿರ್ಗಮನಕ್ಕೆ ಒಂದೇ ಪ್ಲಾರ್ಟ್ಫಾರಂ!
ಹೌದು, ಉದ್ದೇಶಿತ ನಿಲ್ದಾಣದಿಂದ ಎರಡನೇ ಹಂತದ ಮೆಟ್ರೋ ಯೋಜನೆ ಅಡಿ ವಿಸ್ತರಿತ ಮಾರ್ಗದ ಕಾಮಗಾರಿ ಕೈಗೆತ್ತಿಕೊಳ್ಳಲಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಅಲ್ಲಿ ಮಾರ್ಚ್ 2ರಿಂದ ಮುಂದಿನ ಆರು ತಿಂಗಳು ಒಂದೇ ಪ್ಲಾಟ್ಫಾರಂ ಸೇವೆಗೆ ಲಭ್ಯ ಇರಲಿದೆ.
ಹಾಗಾಗಿ, ಬೈಯಪ್ಪನಹಳ್ಳಿಗೆ ಬರುವ ಎಲ್ಲ ರೈಲುಗಳು ಪ್ಲಾಟ್ಫಾರಂ 3ರಲ್ಲಿ ಬಂದು ನಿಲ್ಲುತ್ತವೆ. ಬೇರೆ ಬೇರೆ ಕಡೆ ಹೊರಡುವ ರೈಲುಗಳು ಕೂಡ ಇದೇ ಪ್ಲಾಟ್ಫಾರಂನಿಂದ ತೆರಳುತ್ತವೆ. ಆರಂಭದಲ್ಲಿ ಈ ಬಗ್ಗೆ ಪ್ರಯಾಣಿಕರಿಗೆ ಗೊಂದಲ ಆಗಬಹುದು. ಈ ಹಿನ್ನೆಲೆಯಲ್ಲಿ ಅಲ್ಲಲ್ಲಿ ಸೂಚನಾ ಫಲಕಗಳನ್ನು ಅಳವಡಿಸಲಾಗಿರುತ್ತದೆ. ಜತೆಗೆ ಭದ್ರತಾ ಸಿಬ್ಬಂದಿ ಮಾರ್ಗದರ್ಶನ ನೀಡಲಿದ್ದಾರೆ ಎಂದು ಬಿಎಂಆರ್ಸಿಎಲ್ ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಮಾರ್ಪಾಡಿನಿಂದ ಮೆಟ್ರೋ ರೈಲುಗಳ ಕಾರ್ಯಾಚರಣೆಯಲ್ಲಿ ಯಾವುದೇ ಬದಲಾವಣೆಗಳು ಇರುವುದಿಲ್ಲ. ಎಂದಿನಂತೆ ಸೇವೆಗಳು ಇರಲಿವೆ ಎಂದೂ ಪ್ರಕಟಣೆಯಲ್ಲಿ ನಿಗಮವು ಸ್ಪಷ್ಟಪಡಿಸಿದೆ.