ಚಳ್ಳಕೆರೆ ಟೊಮೇಟೊಗೆ ಭಾರೀ ಬೇಡಿಕೆ

Team Udayavani, Aug 1, 2023, 6:04 AM IST

 ಹಲವು ದಿನಗಳ ಕಾಲ ಕೊಳೆಯದೇ ಸಂಗ್ರಹಿಸಿಡಬಹುದಾದ ಟೊಮೇಟೊ

ಬೆಂಗಳೂರು: ರಾಜ್ಯದ ಅತಿದೊಡ್ಡ ಟೊಮೇಟೊ ಮಾರುಕಟ್ಟೆ ಎನಿಸಿರುವ ಕೋಲಾರ ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿ ಟೊಮೇಟೊ ಬೆಲೆ ಮತ್ತೆ ಜಿಗಿತ ಕಂಡಿದೆ. ಅದರಲ್ಲೂ ಚಳ್ಳಕೆರೆ ಭಾಗದಿಂದ ಪೂರೈಕೆ ಆಗುತ್ತಿರುವ, ಕೆಲವು ದಿನಗಳ ಕಾಲ ಸಂಗ್ರಹಿಸಿಡಬಹುದಾದ ಶ್ರೇಷ್ಠ ಗುಣಮಟ್ಟದ 15 ಕೆ.ಜಿ. ಬಾಕ್ಸ್‌ನ ಟೊಮೇಟೊ 2,200 ರೂ.ಗೆ ಮಾರಾಟವಾಗಿದೆ.

ಎರಡು ದಿನಗಳ ಹಿಂದೆ ಕೋಲಾರ ಕೃಷಿ ಉತ್ಪನ್ನ ಮಾರುಕಟ್ಟೆಯಲ್ಲಿ 15 ಕೆ.ಜಿ. ಬಾಕ್ಸ್‌ ಟೊಮೇಟೊ 1,600ರಿಂದ 2,000 ರೂ.ಗೆ ಮಾರಾಟವಾಗುತ್ತಿತ್ತು. ಆದರೆ ಮತ್ತೆ ಬಾಂಗ್ಲಾ ಗಡಿ ಪ್ರದೇಶಗಳಿಗೆ ಟೊಮೇಟೊ ಬೇಡಿಕೆ ಹೆಚ್ಚಿದೆ. ಜತೆಗೆ ಛತ್ತೀಸ್‌ಗಢ, ಪಶ್ಚಿಮ ಬಂಗಾಲ, ಉತ್ತರ ಪ್ರದೇಶ, ದಿಲ್ಲಿ ಸಹಿತ ಉತ್ತರ ಭಾರತದ ಹಲವು ರಾಜ್ಯಗಳಲ್ಲಿ ಬೇಡಿಕೆ ಇರುವುದರಿಂದ ಈಗ ರಾಜ್ಯದ ಮಾರುಕಟ್ಟೆಗಳಲ್ಲಿ ಟೊಮೇಟೊ ಬೆಲೆಗಳಲ್ಲಿ ಏರಿಕೆಯಾಗಿದೆ.

ಆಂಧ್ರಪ್ರದೇಶ ಮತ್ತು ತೆಲಂಗಾಣ ಭಾಗದಿಂ ದಲೂ ಕೆಲವು ದಿನಗಳಿಂದ ರಾಜ್ಯದ ಕೋಲಾರ ಮಾರುಕಟ್ಟೆಗೆ ಟೊಮೇಟೊ ಪೂರೈಕೆ ಆಗುತ್ತಿದೆ. ಆದರೆ ಅವು ಉತ್ತಮ ಗುಣಟ್ಟದಲ್ಲ, ಜತೆಗೆ ಬಹಳ ದಿನಗಳ ಕಾಲ ಸಂಗ್ರಹಿಸಿಟ್ಟುಕೊಳ್ಳಲು ಆಗುವುದಿಲ್ಲ. ಹೀಗಾಗಿ ಅವು 1,600ರೂ.ನಿಂದ 2000ರೂ. ವರೆಗೂ ಖರೀದಿ ಆಗುತ್ತಿವೆ ಎಂದು ಕೋಲಾರ ಎಪಿಎಂಸಿ ವ್ಯಾಪಾರಿಗಳು ಹೇಳುತ್ತಾರೆ.

ಬೆಳೆ ಕುಂಠಿತ
ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಭಾಗದಲ್ಲಿ ಟೊಮೇಟೊ ಬೆಳೆಯಲ್ಲಿ ಬಿಳಿನೊಣದ ಹಾವಳಿ ಕಂಡುಬಂದಿದ್ದು ಬೆಳೆ ಕುಂಠಿತವಾಗಿದೆ.

ಬಾಕ್ಸ್‌ಗೆ 2,800ರಿಂದ
3000 ಸಾವಿರ ರೂ.
ಬೆಂಗಳೂರಿನ ಮಾರುಕಟ್ಟೆಗಳಲ್ಲಿ ಟೊಮೇಟೊ ಬೆಲೆ ಈ ಹಿಂದೆ ಪ್ರತಿ ಕೆ.ಜಿಗೆ 120ರಿಂದ 130 ರೂ. ಇದ್ದುದು ಈಗ 150ರಿಂದ 160 ರೂ. ತಲುಪಿದೆ. ನಾಲ್ಕೈದು ದಿನಗಳಿಂದ ಮಾರುಕಟ್ಟೆಗಳಲ್ಲಿ ಬೆಲೆಯಲ್ಲಿ ಜಿಗಿತ ಕಂಡು ಬಂದಿದೆ. ಹೊಸ ಬೆಳೆ ಪೂರೈಕೆ ಆಗುವವರಿಗೂ ಇದೇ ಪರಿಸ್ಥಿತಿ ಇರಲಿದೆ ಎಂದು ವ್ಯಾಪಾರಿಗಳು ತಿಳಿಸುತ್ತಾರೆ.

-ದೇವೇಶ ಸೂರಗುಪ್ಪ