Egypt; ಭೀಕರ ಸರಣಿ ರಸ್ತೆ ಅವಘಡ : ಕನಿಷ್ಠ 32 ಮಂದಿ ಮೃತ್ಯು
Team Udayavani, Oct 28, 2023, 7:14 PM IST
ಕೈರೋ: ಈಜಿಪ್ಟ್ನ ಬೆಹೈರಾ ಗವರ್ನರೇಟ್ನ ಹೆದ್ದಾರಿಯೊಂದರಲ್ಲಿ ಶನಿವಾರ ನಡೆದ ಹಲವು ಕಾರುಗಳ ನಡುವೆ ಭೀಕರ ಸರಣಿ ಅವಘಡದಲ್ಲಿ ಕನಿಷ್ಠ 32 ಜನರು ಸಾವನ್ನಪ್ಪಿದ್ದಾರೆ.ರಸ್ತೆ ಅಪಘಾತದಲ್ಲಿ 60 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ ಎಂದು ಈಜಿಪ್ಟ್ ಆರೋಗ್ಯ ಸಚಿವಾಲಯ ತಿಳಿಸಿದೆ.
ಕೈರೋದಿಂದ ಉತ್ತರಕ್ಕೆ 160 ಕಿಮೀ ದೂರದಲ್ಲಿರುವ ವಾಡಿ ಅಲ್-ನಾಟ್ರೌನ್ ಬಳಿಯ ಕೈರೋ-ಅಲೆಕ್ಸಾಂಡ್ರಿಯಾ ಮರುಭೂಮಿ ರಸ್ತೆಯಲ್ಲಿ ಭೀಕರ ಅವಘಡ ಸಂಭವಿಸಿದೆ ಎಂದು ಸರ್ಕಾರಿ ಅಲ್-ಅಹ್ರಾಮ್ ಪತ್ರಿಕೆ ಹೇಳಿದೆ.
ಸ್ಥಳೀಯ ಮಾಧ್ಯಮಗಳು ಮತ್ತು ಅಧಿಕಾರಿಗಳ ಪ್ರಕಾರ, ಈಜಿಪ್ಟ್ ರಾಜಧಾನಿ ಕೈರೋ ಮತ್ತು ಮೆಡಿಟರೇನಿಯನ್ ನಗರ ಅಲೆಕ್ಸಾಂಡ್ರಿಯಾವನ್ನು ಸಂಪರ್ಕಿಸುವ ಹೆದ್ದಾರಿಯಲ್ಲಿ ಬೆಳಗಿನ ಮಂಜು ಕವಿದಿದ್ದ ವೇಳೆ ಕೈರೋಗೆ ತೆರಳುತ್ತಿದ್ದ ಪ್ರಯಾಣಿಕರ ಬಸ್ಸೊಂದು ನಿಂತಿದ್ದ ವಾಹನಕ್ಕೆ ಢಿಕ್ಕಿ ಹೊಡೆದಾಗ ಘರ್ಷಣೆ ನಡೆದಿದ್ದು ಈ ವೇಳೆ ಇತರ ಕಾರುಗಳು ಬಸ್ಗೆ ಢಿಕ್ಕಿ ಹೊಡೆದು ಬೆಂಕಿ ಹೊತ್ತಿಕೊಂಡು ಭಸ್ಮವಾಗಿದೆ ಎಂದು ತಿಳಿದು ಬಂದಿದೆ. ಒಂದು ಬಸ್ , ಮಿನಿಬಸ್ ಮತ್ತು ಹಲವು ಕಾರುಗಳು ಬೆಂಕಿಯಿಂದ ಸುಟ್ಟುಹೋಗಿವೆ ಎಂದು ಮಾಹಿತಿ ಲಭ್ಯವಾಗಿದೆ.