ಸೌದಿಯ ತೈಲ ಪೈಪ್‌ಲೈನ್‌ ಮೇಲೆ ಡ್ರೋನ್‌ ದಾಳಿ

Team Udayavani, May 15, 2019, 6:00 AM IST

ರಿಯಾದ್‌: ತೈಲ ಟ್ಯಾಂಕರ್‌ಗಳನ್ನು ಧ್ವಂಸಗೊಳಿಸಿದ ಘಟನೆ ಬೆನ್ನಲ್ಲೇ ಗಲ್ಫ್ ರಾಷ್ಟ್ರಗಳ ನಡುವಿನ ಪ್ರಕ್ಷುಬ್ಧತೆಯನ್ನು ಇನ್ನಷ್ಟು ತೀವ್ರಗೊಳಿಸುವಂಥ ಘಟನೆ ಸೌದಿ ಅರೇಬಿಯಾದಲ್ಲಿ ನಡೆದಿದೆ. ಇರಾನ್‌ ಜತೆ ಸ್ನೇಹವಿರುವ ಯೆಮೆನ್‌ ಬಂಡುಕೋರರು ಮಂಗಳವಾರ ಸೌದಿ ಅರೇಬಿಯಾದ ಪ್ರಮುಖ ಎರಡು ತೈಲ ಪಂಪಿಂಗ್‌ ಸ್ಟೇಷನ್‌ಗಳನ್ನು ಗುರಿಯಾಗಿಸಿ ಡ್ರೋನ್‌ ದಾಳಿ ನಡೆಸಿದ್ದಾರೆ. ಪರಿಣಾಮ, ಸೌದಿ ಅರೇಬಿಯಾವು ತನ್ನ ಪ್ರಮುಖ ಆಯಿಲ್ ಪೈಪ್‌ಲೈನ್‌ನ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಿದೆ.

ಈಸ್ಟ್‌ ವೆಸ್ಟ್‌ ಪೈಪ್‌ಲೈನ್‌ನಲ್ಲಿ ದಿನಕ್ಕೆ 50 ಲಕ್ಷ ಬ್ಯಾರೆಲ್ ತೈಲವನ್ನು ಪಂಪ್‌ ಮಾಡಲಾಗುತ್ತದೆ. ಈಗ ಈ ಪೈಪ್‌ಲೈನ್‌ನ ಕಾರ್ಯಾಚರಣೆ ನಿಲ್ಲಿಸಲಾಗಿದೆ ಎಂದು ಸೌದಿ ಇಂಧನ ಸಚಿವ ಖಾಲಿದ್‌ ಅಲ್-ಫಾಲಿಹ್‌ ತಿಳಿಸಿದ್ದಾರೆ. ಆದರೆ, ಇದು ತಾತ್ಕಾಲಿಕವಾಗಿದ್ದು, ಸದ್ಯದಲ್ಲೇ ಎಲ್ಲರೂ ಸರಿಯಾಗಲಿದೆ. ಅಲ್ಲದೆ, ಇದರಿಂದ ತೈಲ ಉತ್ಪಾದನೆ ಮತ್ತು ರಫ್ತಿನ ಮೇಲೆ ಯಾವುದೇ ಪ್ರತಿಕೂಲ ಪರಿಣಾಮ ಉಂಟಾ ಗಿಲ್ಲ ಎಂದೂ ಅವರು ಸ್ಪಷ್ಟಪಡಿಸಿದ್ದಾರೆ.

ಯೆಮೆನ್‌ನ ಹುಥಿ ಬಂಡುಕೋರರೇ ಮಂಗಳ ವಾರ ಬೆಳಗ್ಗೆ ನಾವು ಸೌದಿರ ಅರೇಬಿಯಾದ ಪ್ರಮುಖ ತೈಲ ಪೈಪ್‌ಲೈನ್‌ ಮೇಲೆ ದಾಳಿ ನಡೆಸಿದ್ದೇವೆ ಎಂದು ಘೋಷಿಸಿದ್ದರು. ರಿಯಾದ್‌ನ ಪಶ್ಚಿಮ ಭಾಗದಲ್ಲಿ ಈ ಪೈಪ್‌ಲೈನ್‌ ಇದೆ. ಸೌದಿ ಅರೇಬಿಯಾ ಮತ್ತು ಅಮೆರಿಕವು ಯೆಮೆನ್‌ ಯುದ್ಧದಲ್ಲಿ ಹಸ್ತಕ್ಷೇಪ ಮಾಡಿದ್ದು, ಯೆಮೆನ್‌ನ ನಾಗರಿಕರ ಹತ್ಯಾಕಾಂಡ ನಡೆಸುತ್ತಿದೆ. ಅದಕ್ಕೆ ನಾವು ಪ್ರತೀಕಾರ ತೀರಿಸುತ್ತಿದ್ದೇವೆ ಎಂದು ಬಂಡುಕೋರರು ಟ್ವೀಟ್ ಮಾಡಿದ್ದಾರೆ.