ಗಂಟೆಗೆ 532.93 ಕಿ.ಮಿ ಚಲಿಸಿದ ಟುವಾಟೆರಾ; ಇದು ಜಗತ್ತಿನ ಅತಿವೇಗದ ಕಾರು
Team Udayavani, Oct 21, 2020, 12:32 AM IST
ಲಾಸ್ವೇಗಾಸ್: ಅಮೆರಿಕದ “ಎಸ್ಎಸ್ಸಿ ನಾರ್ತ್ಅಮೆರಿಕ ಕಂಪನಿ ಅಭಿವೃದ್ಧಿಪಡಿಸಿರುವ “ಟುವಾಟೆರಾ’ ಕಾರು ಜಗತ್ತಿನ ಅತಿವೇಗದ ಹೈಪರ್ಕಾರ್ ಎಂಬ ಗರಿಮೆಗೆ ಪಾತ್ರವಾಗಿದೆ. ಗಂಟೆಗೆ 532.93 ಕಿ.ಮೀ. ವೇಗದಲ್ಲಿ ಸಾಗಬಲ್ಲ ಈ ಕಾರು 2017ರಲ್ಲಿ ಅಗೇರಾ ಕಾರು ನಿರ್ಮಿಸಿದ್ದ ದಾಖಲೆಯನ್ನು ಅಳಿಸಿಹಾಕಿದೆ. ಈ ಹಿಂದೆ ಅಗೆರಾ ಕಾರು ಗಂಟೆಗೆ 447.23 ಕಿ.ಮಿ. ವೇಗದಲ್ಲಿ ಚಲಿಸಿ ವಿಶ್ವದಾಖಲೆ ನಿರ್ಮಿಸಿತ್ತು. ಈಗ ಟುವಾಟೆರಾ ಜಗತ್ತಿನಲ್ಲೇ ಅತಿ ವೇಗದ ಕಾರೆಂದು ಗುರುತಿಸಿಕೊಳ್ಳುವ ಮೂಲಕ ಗಿನ್ನೆಸ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್ ಲ್ಲೂ ತನ್ನ ಹೆಸರು ದಾಖಲಿಸಿದೆ.
ಪ್ರಸಕ್ತ ಪರೀಕ್ಷೆಯು ಲಾಸ್ವೇಗಾಸ್ನ ಹೊರವಲಯದಲ್ಲಿ 11.26 ಕಿಲೋಮೀಟರ್ ಉದ್ದದ ರಸ್ತೆಯಲ್ಲಿ ನಡೆದಿದ್ದು, ಗಿನ್ನೆಸ್ ಬುಕ್ಸ್ನ ಅಧಿಕಾರಿಗಳು, 15 ಉಪಗ್ರಹಗಳನ್ನು ಆಧರಿಸಿದ ಜಿಪಿಎಸ್ ಹಾಗೂ ಅತ್ಯಾಧುನಿಕ ವೇಗ ಮಾಪನ ಉಪಕರಣಗಳನ್ನು ಬಳಸಿ ವೇಗ ಪರೀಕ್ಷಿಸಿದ್ದಾರೆ.