ಟೆಕ್ಸಾಸ್‌ ನೆರೆ‌: ಭಾರತೀಯ ವಿದ್ಯಾರ್ಥಿನಿ ಸಾವು

Team Udayavani, Sep 5, 2017, 7:20 AM IST

ಹೂಸ್ಟನ್‌: ಅಮೆರಿಕದ ಟೆಕ್ಸಾಸ್‌ ರಾಜ್ಯವನ್ನು ಅಕ್ಷರಶಃ ಮುಳುಗಿಸಿದ ಹಾರ್ವೆ ಚಂಡಮಾರುತಕ್ಕೆ ಸಿಲುಕಿ, ಸಾವು ಬದುಕಿನ ಮಧ್ಯೆ ಹೋರಾಡುತ್ತಿದ್ದ ಭಾರತೀಯ ಮೂಲದ ವಿದ್ಯಾರ್ಥಿನಿ ಶಾಲಿನಿ ಸಿಂಗ್‌ ಕಡೆಗೂ ಈ ಹೋರಾಟದಲ್ಲಿ ಸೋಲನ್ನಪ್ಪಿದ್ದಾರೆ. ಚಿಕಿತ್ಸೆಗೆ ಸ್ಪಂದಿಸದೇ ಅವರು ಭಾನುವಾರ ರಾತ್ರಿ ಕೊನೆಯುಸಿರೆಳೆದಿದ್ದಾರೆ.

ದೆಹಲಿಯಲ್ಲಿ ದಂತ ವೈದ್ಯಕೀಯ ಪದವಿ ಪಡೆದಿದ್ದ ಶಾಲಿನಿ, ಟೆಕ್ಸಾಸ್‌ನ ಎ ಆ್ಯಂಡ್‌ ಎಂ ವಿವಿಯಲ್ಲಿ ಸ್ನಾತಕೋತ್ತರ ಪದವಿಗಾಗಿ 2 ತಿಂಗಳ ಹಿಂದಷ್ಟೇ ಇಲ್ಲಿಗೆ ಆಗಮಿಸಿದ್ದರು. ಕಳೆದ ಶನಿವಾರ ಭಾರತೀಯ ವಿದ್ಯಾರ್ಥಿ ನಿಖೀಲ್‌ ಭಾಟಿಯಾ ಜೊತೆ ಬ್ರ್ಯಾನ್‌ ಸರೋವರದಲ್ಲಿ ಈಜಲು ತೆರಳಿದ್ದರು. ಒಮ್ಮೆಲೇ ಚಂಡಮಾರುತ ಅಪ್ಪಳಿಸಿ, ಇಬ್ಬರೂ ನೀರಿನಲ್ಲಿ ಮುಳುಗಿದ್ದರು. ಇಬ್ಬರನ್ನೂ ಕೂಡಲೇ ರಕ್ಷಿಸಿ ಚಿಕಿತ್ಸೆ ಕೊಡಿಸ ಲಾಗಿತ್ತು. ನಿಖೀಲ್‌ ಮರುದಿನವೇ ಮೃತರಾದರು. ಶಾಲಿನಿ ವೈದ್ಯೆಯಾಗುವ ಕನಸು ಕಂಡಿದ್ದಳು. ಪರಿಶ್ರಮದಿಂದ ಟೆಕ್ಸಾಸ್‌ನಲ್ಲಿ ಪದವಿಗೆ ಪ್ರವೇಶ ಪಡೆದಿದ್ದಳು. ಆದರೆ ಅವಳು ಭಾರತದಿಂದ ಹೊರಟ  2 ತಿಂಗಳಲ್ಲಿ ಈ ಲೋಕವನ್ನೇ ಬಿಟ್ಟು ಹೋಗಿದ್ದಾಳೆ ಎಂದು ಅವರ ತಂದೆ ಕಣ್ಣೀರು ಹರಿಸಿದ್ದಾರೆ.