Paris; ಉತ್ತರಾಧಿಕಾರಿಯ ಶೋಧದಲ್ಲಿ ವಿಶ್ವ ನಂ.1 ಶ್ರೀಮಂತ?

ಐವರು ಮಕ್ಕಳಿಗೆ ಆಡಿಷನ್ಸ್‌ ನಡೆಸುತ್ತಿರುವ ಬೆರ್ನಾರ್ಡ್‌

Team Udayavani, Apr 25, 2023, 7:45 AM IST

ಉತ್ತರಾಧಿಕಾರಿಯ ಶೋಧದಲ್ಲಿ ವಿಶ್ವ ನಂ.1 ಶ್ರೀಮಂತ?

ಪ್ಯಾರಿಸ್‌: ವಿಶ್ವದಲ್ಲೇ ಅತ್ಯಂತ ಶ್ರೀಮಂತ ವ್ಯಕ್ತಿ, ಎಲ್‌ವಿಎಂಎಚ್‌ ಕಂಪನಿ ಮಾಲಿಕ ಬೆರ್ನಾರ್ಡ್‌ ಅರ್ನಾಲ್ಟ್, ತಮ್ಮ ಕಂಪನಿಗೆ ಉತ್ತರಾಧಿಕಾರಿಯನ್ನು ಹುಡುಕುತ್ತಿದ್ದಾರಾ? ಹೌದು ಎನ್ನುತ್ತವೆ ಮೂಲಗಳು.

74 ವರ್ಷದ ಅರ್ನಾಲ್ಟ್ ಪ್ರತೀ ತಿಂಗಳು ತಮ್ಮ ಐವರು ಮಕ್ಕಳನ್ನು ತಿಂಗಳಿಗೊಮ್ಮೆ ಒಟ್ಟಿಗೆ ಭೇಟಿ ಮಾಡುತ್ತಿದ್ದಾರೆ. ಇತ್ತೀಚೆಗೆ ಎಲ್‌ವಿಎಂಎಚ್‌ ಕೇಂದ್ರ ಕಚೇರಿಯ ಊಟದ ಕೊಠಡಿಯಲ್ಲೇ ಭೇಟಿ ಮಾಡಿ 90 ನಿಮಿಷ ಚರ್ಚಿಸಿದ್ದಾರೆ. ಮೊದಲೇ ಸಿದ್ಧಪಡಿಸಿಕೊಂಡು ಹೋಗಿದ್ದ ಪ್ರಶ್ನೆಗಳನ್ನು ಮಕ್ಕಳಿಗೆ ಕೇಳಿದ್ದಾರೆ.

ಈ ಪ್ರಶ್ನೋತ್ತರಗಳ ಮೂಲಕ ತಮ್ಮ ಉದ್ಯಮ ಸಾಮ್ರಾಜ್ಯದ ಉತ್ತರಾಧಿಕಾರಿ ಯಾರೆಂದು ನಿರ್ಧರಿಸುವುದು ಅವರ ಉದ್ದೇಶ ಎಂದು ಹೇಳಲಾಗಿದೆ. ದಶಕಗಳಿಂದ ಅರ್ನಾಲ್ಟ್ ಇಂತಹ ಪ್ರಯತ್ನದಲ್ಲಿ ತೊಡಗಿದ್ದಾರೆ. ಒಂದು ವೇಳೆ ತಮ್ಮ ಮಕ್ಕಳ ಪೈಕಿ ಒಬ್ಬರಿಗೆ ಅಧಿಕಾರ ಹಸ್ತಾಂತರಿಸಿದರೆ ಕಂಪನಿಯೊಳಕ್ಕೆ ದೊಡ್ಡ ಅಲ್ಲೋಲ ಕಲ್ಲೋಲ ಆಗುವ ನಿರೀಕ್ಷೆಯಿದೆ. ಮಕ್ಕಳೊಳಗೇ ಭಿನ್ನಮತ ಶುರುವಾದರೂ ಅಚ್ಚರಿಯಿಲ್ಲ.

ಬ್ಲೂಮ್‌ಬರ್ಗ್‌ ಬಿಲಿಯನೇರ್‌ಗಳ ಪಟ್ಟಿಯಲ್ಲಿ ಇತ್ತೀಚೆಗೆ ಟೆಸ್ಲಾ ಮಾಲಿಕ ಎಲಾನ್‌ ಮಸ್ಕ್ರನ್ನು ಹಿಂದಿಕ್ಕಿ ಅರ್ನಾಲ್ಟ್ ಬೆರ್ನಾರ್ಡ್‌ ವಿಶ್ವದ ಶ್ರೀಮಂತರ ಪೈಕಿ ಅಗ್ರಸ್ಥಾನಕ್ಕೇರಿದ್ದಾರೆ. ಅವರು 208 ಶತಕೋಟಿ ಡಾಲರ್‌ ಸಂಪತ್ತು ಹೊಂದಿದ್ದಾರೆ.