ರಾಷ್ಟ್ರಪತಿಗಳ ಭಾಷಣ: ಪಕ್ಷಬೇಧವಿಲ್ಲದೆ ಕೋವಿಡ್ ನಿಯಮಗಳನ್ನು ಉಲ್ಲಂಘಿಸಿದ ಸಂಸದರು

Team Udayavani, Jan 31, 2022, 12:08 PM IST

ನವದೆಹಲಿ : ಸೋಮವಾರ ಸಂಸತ್ತಿನ ಉಭಯ ಸದನಗಳ ಜಂಟಿ ಅಧಿವೇಶನವನ್ನುದ್ದೇಶಿಸಿ ರಾಷ್ಟ್ರಪತಿ ರಾಮ್ ನಾಥ್ ಕೋವಿಂದ್ ಅವರು ಮಾಡಿದ ಭಾಷಣದ ವೇಳೆ ಹೆಚ್ಚಿನ ಸಂಸದರು ಸಾಮಾಜಿಕ ಅಂತರದ ನಿಯಮಗಳನ್ನು ಸ್ಪಷ್ಟವಾಗಿ ಉಲ್ಲಂಘಿಸುತ್ತಿರುವುದು ಕಂಡುಬಂದಿದೆ ಎಂದು ಪಿಟಿಐ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಮೊದಲ ಎರಡು ಸಾಲುಗಳಲ್ಲಿ ಸಂಸದರು, ಪ್ರಧಾನಿ ನರೇಂದ್ರ ಮೋದಿ, ರಾಜ್ಯಸಭೆಯ ವಿರೋಧ ಪಕ್ಷದ ನಾಯಕ ಮಲ್ಲಿಕಾರ್ಜುನ ಖರ್ಗೆ, ಕೇಂದ್ರದ ಉನ್ನತ ಸಚಿವರು ಮತ್ತು ವಿವಿಧ ಪಕ್ಷಗಳ ನಾಯಕರು ಸಾಮಾಜಿಕವಾಗಿ ದೂರವಿದ್ದರು ಆದರೆ, ನಂತರ  ಸಂಸದರು ಯಾವುದೇ ಅಂತರ ಪಾಲಿಸಿಲ್ಲ.

ಮೂರನೇ ಸಾಲಿನಿಂದ, ಅನೇಕ ಸಂಸದರು ಕೋವಿಡ್ ಪ್ರೋಟೋಕಾಲ್ ಅನ್ನು ಅನುಸರಿಸಲಿಲ್ಲ. ಇದರಲ್ಲಿ ಹಲವಾರು ಕೇಂದ್ರ ಸಚಿವರೂ ಸೇರಿದ್ದಾರೆ. ಸೆಂಟ್ರಲ್ ಹಾಲ್‌ನ ಕೆಲವು ಬೆಂಚ್‌ಗಳಲ್ಲಿ ಐವರು, ಏಳು ಸಂಸದರು ಒಟ್ಟಿಗೆ ಕುಳಿತಿದ್ದರು. ಹಲವಾರು ಸಂಸದರು ಅವರಲ್ಲಿ ಕೆಲವರು ತಮ್ಮ ಮಾಸ್ಕ್ ಗಳನ್ನು ತೆಗೆದು ಪರಸ್ಪರ ಚಾಟ್ ಮಾಡುತ್ತಿರುವುದು ಕಂಡುಬಂದಿದೆ.

ಮೂರನೇ ಅಲೆಯ ಸಮಯದಲ್ಲಿ ಕೋವಿಡ್ ಪ್ರಕರಣಗಳ ಹೆಚ್ಚಳದ ನಂತರ, ಸಂಸದರಿಗೆ ಸೆಂಟ್ರಲ್ ಹಾಲ್ ಗ್ಯಾಲರಿಯಲ್ಲಿ ಮತ್ತು ಲೋಕಸಭೆ ಮತ್ತು ರಾಜ್ಯಸಭಾ ಚೇಂಬರ್‌ಗಳಲ್ಲಿ ಕುಳಿತುಕೊಳ್ಳಲು ವ್ಯವಸ್ಥೆ ಮಾಡಲಾಗಿದೆ.

ಸೋಮವಾರದಿಂದ ಪ್ರಾರಂಭವಾಗುವ ಬಜೆಟ್ ಅಧಿವೇಶನದಲ್ಲಿ ಸಂಸತ್ತಿನ ಕಲಾಪಗಳು ಎರಡು ಪಾಳಿಯಲ್ಲಿ ನಡೆಯಲಿದ್ದು, ಬೆಳಿಗ್ಗೆ ರಾಜ್ಯಸಭೆ ಮತ್ತು ಸಂಜೆ ಲೋಕಸಭೆ ಕಲಾಪ ಗಳು ನಡೆಯಲಿವೆ.