ತಮಿಳುನಾಡಿನಲ್ಲಿ ನಾಪತ್ತೆಯಾಗಿದ್ದ ವಿವಾಹಿತ ಮಹಿಳೆ ಪ್ರಿಯಕರನೊಂದಿಗೆ ಕಾರವಾರದಲ್ಲಿ ಪತ್ತೆ
ಮೊಬೈಲ್ ಟ್ರ್ಯಾಕ್ ಮೂಲಕ ಜೋಡಿಗಳನ್ನು ಪತ್ತೆ ಹಚ್ಚಿದ ತಮಿಳುನಾಡು ಪೊಲೀಸರು
Team Udayavani, Aug 28, 2022, 12:40 PM IST
ಕಾರವಾರ : ಪ್ರಿಯಕರನೊಂದಿಗೆ ನಾಪತ್ತೆಯಾಗಿದ್ದ ವಿವಾಹಿತ ಮಹಿಳೆಯನ್ನು ತಮಿಳುನಾಡು ಪೊಲೀಸರು ಕಾರವಾರದಲ್ಲಿ ಪತ್ತೆ ಹಚ್ಚಿದ್ದಾರೆ.
ತಮಿಳುನಾಡು ಮೂಲದ ಮಹಿಳೆಯನ್ನು ಮೊಬೈಲ್ ಟ್ರ್ಯಾಕಿಂಗ್ ಮೂಲಕ ಪತ್ತೆ ಹಚ್ಚಿದ್ದು ವಿಶೇಷ. ಕಾರವಾರದ ಥಾಮ್ಸೆವಾಡದಲ್ಲಿ ಪ್ರೇಮಿಗಳು ಕಳೆದ ಆರು ತಿಂಗಳಿಂದ ನೆಲಸಿದ್ದರು ಎಂಬುದು ಬೆಳಕಿಗೆ ಬಂದಿದೆ. ತಮಿಳುನಾಡು ಪೊಲೀಸರು ಮಹಿಳೆ ಹಾಗೂ ಆಕೆಯ ಎಂಜಿನಿಯರ್ ಸ್ನೇಹಿತನನ್ನು ಶನಿವಾರ ವಾಪಸ್ ತಮಿಳುನಾಡಿಗೆ ಕರೆದೊಯ್ದಿದ್ದಾರೆ.
ತಮಿಳುನಾಡಿನ ಪುದುಕೋಟೆ ಜಿಲ್ಲೆಯ ಗಣೇಶನಗರದ ಆಯಿಷಾ ಹಾಗೂ ಆಕೆಯ ಪ್ರಿಯಕರ ಬೀರ್ ಮೊಹಿದ್ದೀನ್ ನನ್ನು ಕಾರವಾರದ ಪೊಲೀಸರ ಸಹಕಾರದೊಂದಿಗೆ ಶನಿವಾರ ಪತ್ತೆ ಹಚ್ಚಿದ್ದಾರೆ. ಮಹಿಳೆ ಕಾಣೆಯಾದ ಪ್ರಕರಣ ತಮಿಳುನಾಡು ಪೊಲೀಸ್ ಠಾಣೆಯಲ್ಲಿದ್ದ ಕಾರಣ ಅವರಿಬ್ಬರನ್ನು ತಮಿಳುನಾಡಿಗೆ ಕರೆದೊಯ್ಯಲಾಗಿದೆ.
ಎರಡು ಮಕ್ಕಳ ತಾಯಿಯೂ ಆಗಿರುವ ಆಯಿಷಾ ನಾಪತ್ತೆಯಾಗಿರುವ ಬಗ್ಗೆ ಅವರ ಕುಟುಂಬಸ್ಥರು ಇದೇ ಫೆ.21 ರಂದು ತಮಿಳುನಾಡಿನ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ತನಿಖೆ ಆರಂಭಿಸಿದ ಪೊಲೀಸರು ಮೊಬೈಲ್ ಟ್ರ್ಯಾಕಿಂಗ್ ಮಾಡಿದ ವೇಳೆ ಅವರು ಕಾರವಾರದಲ್ಲಿರುವುದು ಪತ್ತೆಯಾಗಿದೆ. ಆದರೆ ಕಾರವಾರದಲ್ಲಿ ಎಲ್ಲಿದ್ದಾರೆಂಬುದನ್ನು ಹುಡುಕಲು ಸಾಧ್ಯವಾಗಿರಲಿಲ್ಲ. ಎರಡು ಬಾರಿ ಕಾರವಾರಕ್ಕೆ ಬಂದ ತಮಿಳುನಾಡಿನ ಪೊಲೀಸರ ತಂಡಕ್ಕೆ ಇಬ್ಬರು ಪತ್ತೆಯಾಗದೆ ವಾಪಸ್ ತೆರಳಿದ್ದರು.
ಇದನ್ನೂ ಓದಿ : ರಾಜ್ಯಾಧ್ಯಕ್ಷ ಸ್ಥಾನ ಮುಂದುವರಿಕೆ ರಾಷ್ಟ್ರೀಯ ನಾಯಕರ ನಿರ್ಧಾರ: ಈಶ್ವರಪ್ಪ
ಆದರೆ ಶುಕ್ರವಾರ ನಗರ ಠಾಣೆ ಸಿಪಿಐ ಸಿದ್ದಪ್ಪ ಬಿಳಗಿ ಹಾಗೂ ಇತರ ಪೊಲೀಸರ ಸಹಕಾರದಲ್ಲಿ ತಮಿಳುನಾಡು ಪೊಲೀಸರು ಮೊಬೈಲ್ ಟ್ರ್ಯಾಕಿಂಗ್ ಮಾಡಿ ಆಯಿಷಾನನ್ನು ಪತ್ತೆ ಮಾಡಿದ್ದಾರೆ. ಆಕೆಯ ದೂರದ ಸಂಬಂಧಿಯೂ ಆಗಿದ್ದ ಬೀರ್ ಮೊಹಿದ್ದೀನ್ ನೊಂದಿಗೆ ಗೋವಾಗೆ ಓಡಿ ಬಂದಿದ್ದ ಈಕೆ, ಕಳೆದ ಆರು ತಿಂಗಳಿನಿಂದ ನಗರದ ಥಾಮ್ಸೇವಾಡದಲ್ಲಿ ಜೊತೆಯಾಗಿ ವಾಸವಾಗಿರುವುದು ಪೊಲೀಸ್ ತನಿಖೆ ವೇಳೆ ತಿಳಿದುಬಂದಿದೆ.
ಬೀರ್ ಮೊಹಿದ್ದೀನ್ ಎಂಜಿನಿಯರಿಂಗ್ ಮುಗಿಸಿದ್ದು, ಆಯಿಷಾಳನ್ನು ಪ್ರೀತಿಸಿ, ಕಾರವಾರಕ್ಕೆ ಬಂದಿದ್ದರು. ಥಾಮ್ಸೆವಾಡದಲ್ಲಿ ಬಾಡಿಗೆ ಮನೆಯಲ್ಲಿ ಉಳಿದಿದ್ದರು. ಬೀರ್ ಮೊಹಿದ್ದೀನ್ ಕಾರವಾರದಲ್ಲಿ ಗಾರೆ ಕೆಲಸ ಮಾಡಿಕೊಂಡಿದ್ದ ಎನ್ನಲಾಗಿದೆ. ಇಬ್ಬರು ಸೇರಿ ಇಲ್ಲಿಯೇ ವಾಸ ಮಾಡತೊಡಗಿದ್ದರು. ಆದರೆ ಮೊಬೈಲ್ ಟ್ರ್ಯಾಕಿಂಗ್ ಮಾಡಿ ಇಬ್ಬರನ್ನು ಹುಡುಕಿದ ಪೊಲೀಸರು ತಮಿಳುನಾಡಿಗೆ ಕರೆದೊಯ್ದಿದ್ದಾರೆ.