ಕಾಸರಗೋಡು: ಸಾಮೂಹಿಕ ಅತ್ಯಾಚಾರ; ಮಹಿಳೆ ಸಹಿತ ನಾಲ್ವರ ಬಂಧನ
Team Udayavani, Nov 20, 2022, 12:22 AM IST
ಕಾಸರಗೋಡು: ಸಂಚರಿಸುತ್ತಿದ್ದ ಕಾರಿನಲ್ಲಿ 19ರ ಹರೆಯದ ಯುವತಿ ಮೇಲೆ ಸಾಮೂಹಿಕ ಲೈಂಗಿಕ ಅತ್ಯಾಚಾರ ನಡೆಸಿದ ಘಟನೆ ಸಂಬಂಧ ಮಹಿಳೆ ಸಹಿತ ನಾಲ್ವರನ್ನು ಪೊಲೀಸರು ಬಂಧಿಸಿದ್ದಾರೆ.
ಮೂಲತಃ ಕಾಸರಗೋಡು ಚೆಮ್ನಾಡ್ ಪಂಚಾಯತ್ ವ್ಯಾಪ್ತಿಯ ನಿವಾಸಿ ಎಂದು ಹೇಳಲಾಗುತ್ತಿರುವ ಹಾಗೂ ಈಗ ಕೊಚ್ಚಿ ಕಾಕನ್ನಾಡಿನಲ್ಲಿ ವಾಸಿಸುತ್ತಿರುವ ಮಾಡೆಲ್ ಆಗಿರುವ ಯುವತಿಯನ್ನು ಸಾಮೂಹಿಕ ಅತ್ಯಾಚಾರಗೈದ ಪ್ರಕರಣಕ್ಕೆ ಸಂಬಂಧಿಸಿ ಕೊಡುಂಙಲ್ಲೂರು ನಿವಾಸಿಗಳಾದ ನಿತಿನ್, ವಿವೇಕ್, ಸುದೀಪ್ ಹಾಗೂ ಮೂಲತಃ ರಾಜಸ್ಥಾನ ನಿವಾಸಿಯಾದ ಡಿಂಪಲ್ ಲಾಂಬಳನ್ನು ಕೊಚ್ಚಿ ಸಿಟಿ ಸೌತ್ ಪೊಲೀಸರು ಬಂಧಿಸಿದ್ದಾರೆ.
ಕಳೆದ ಗುರುವಾರ ರಾತ್ರಿ ಕೊಚ್ಚಿ ಶಿಪ್ಯಾರ್ಡ್ ಸಮೀಪದ ಬಾರ್ಗೆ ರಾಜಸ್ಥಾನ ನಿವಾಸಿ ಮಹಿಳೆಯ ಜತೆ ಯುವತಿ ಬಂದಿದ್ದಳು. ರಾತ್ರಿ 10 ಗಂಟೆಗೆ ಆಕೆ ಬಾರ್ನೊಳಗೆ ಕುಸಿದು ಬಿದ್ದಳು. ಆಗ ಆಕೆಯನ್ನು ವಾಸ್ತವ್ಯ ಸ್ಥಳಕ್ಕೆ ತಲುಪಿಸುವುದಾಗಿ ಹೇಳಿ ಕಾರಿಗೆ ಹತ್ತಿಸಿ ಕರೆದೊಯ್ದರು.
ಈ ಯುವಕರು ಕೊಚ್ಚಿ ನಗರದಾದ್ಯಂತ ಸುತ್ತಾಡಿ ಯುವತಿಯ ಮೇಲೆ ಒಬ್ಬರ ಹಿಂದೆ ಒಬ್ಬರಂತೆ ಅತ್ಯಾಚಾರಗೈದಿದ್ದಾರೆ. ಕೊನೆಯಲ್ಲಿ ಆಕೆಯನ್ನು ಕಾಕನಾಡಿನಲ್ಲಿರುವ ವಾಸ್ತವ್ಯ ಸ್ಥಳಕ್ಕೆ ತಲುಪಿಸಿ ಪರಾರಿಯಾಗಿದ್ದರು. ಈ ಬಗ್ಗೆ ಪೊಲೀಸರಿಗೆ ನೀಡಿದ ದೂರಿನಂತೆ ಆರೋಪಿಗಳನ್ನು ಬಂಧಿಸಲಾಗಿದೆ.