ಎಚ್‌1ಬಿ ವೀಸಾ: ಭಾರತೀಯ ಟೆಕ್ಕಿಗಳಿಗೆ ಕಂಟಕವಾದ ಮಸೂದೆ ಮಂಡನೆ

Team Udayavani, Mar 24, 2017, 4:34 PM IST

ವಾಷಿಂಗ್ಟನ್‌ : ಅಮೆರಿಕದ ಕಂಪೆನಿಗಳು ಎಚ್‌1ಬಿ ವೀಸಾ ದುರುಪಯೋಗಿಸಿ ಉದ್ಯೋಗಗಳ ಹೊರಗುತ್ತಿಗೆ ನೀಡುವುದನ್ನು ತಡೆಯುವ ಮಸೂದೆಯನ್ನು ಪ್ರತಿನಿಧಿಗಳ ಸಭೆಯಲ್ಲಿ ಮತ್ತೆ ಮಂಡಿಸಲಾಗಿದೆ. ಈ ಮಸೂದೆ ಪಾಸಾದಲ್ಲಿ  ಭಾರತೀಯ ಐಟಿ ಕಂಪೆನಿಗಳಿಗೆ ಮತ್ತು ವೃತ್ತಿಪರರಿಗೆ ಭಾರೀ ಹೊಡೆತ ಬೀಳುವುದು ನಿಶ್ಚಿತವಿದೆ.

ಡೆಮೋಕ್ರಾಟಿಕ್‌ ಸಂಸದ ಡೆರೆಕ್‌ ಕಿಲ್‌ಮರ್‌ ಮತ್ತು ಅವರ ರಿಪಬ್ಲಿಕನ್‌ ಸಹೋದ್ಯೋಗಿ ಡಫ್ ಕಾಲಿನ್ಸ್‌ ಅವರು ಅಮೆರಿಕ ಸಂಸತ್ತಿನಲ್ಲಿ ಈ ಮಸೂದೆಯನ್ನು ಮಂಡಿಸಿದ್ದಾರೆ.

ಎಚ್‌1ಬಿ ಕಾರ್ಯಕ್ರಮದ ಮೂಲಕ ತಾತ್ಕಾಲಿಕ ವೀಸಾಗಳನ್ನು ಪಡೆದು ಅಮೆರಿಕದಲ್ಲಿ ವಿದೇಶಿ ನೌಕರರಿಗೆ ತರಬೇತಿ ನೀಡಿ ಬಳಿಕ ಆ ಉದ್ಯೋಗಗಳನ್ನು ಬೇರೊಂದು ದೇಶಕ್ಕೆ ವರ್ಗಾಯಿಸುವ ಉದ್ಯಮಪತಿಗಳ ಕುಟಿಲೋಪಾಯವನ್ನು ತಡೆಯುವುದು ಈ ಮೂಸದೆಯ ಉದ್ದೇಶವಾಗಿದೆ. 

ಕೆಲ ದಿನಗಳ ಹಿಂದಷ್ಟೇ ಅಮೆರಿಕದ ಸಾರ್ವಜನಿಕ ಪ್ರಸಾರ ಸೇವೆಯು ಸಾಕ್ಷ್ಯ ಚಿತ್ರವೊಂದನ್ನು ಪ್ರದರ್ಶಿಸಿತ್ತು. ಅದರಲ್ಲಿ ಎಚ್‌1ಬಿ ವೀಸಾ ಕಾರ್ಯಕ್ರಮವು ಭಾರತದಂತಹ ದೇಶಗಳ ಪರಿಣತ ತಂತ್ರಜ್ಞಾನ ನೌಕರರಿಗೆ ಅಮೆರಿಕದಲ್ಲಿನ ಹೈಟೆಕ್‌ ಉದ್ಯೋಗಳನ್ನು ಪಡೆಯುವುದಕ್ಕೆ ಹೇಗೆ ಅನುಕೂಲ ಮಾಡಿಕೊಡುತ್ತದೆ ಎನ್ನುವುದನ್ನು ತೋರಿಸಲಾಗಿತ್ತು.