ಅರುಣಾಚಲ ಸಂಸ್ಕೃತಿ ನಮ್ಮದೆಂದ ಚೀನ ಪತ್ರಿಕೆ!

Team Udayavani, Aug 22, 2017, 8:40 AM IST

ಬೀಜಿಂಗ್‌: ಅರುಣಾಚಲ ಪ್ರದೇಶವನ್ನು ದಕ್ಷಿಣ ಟಿಬೆಟ್‌ ಎಂದು ಚೀನ ಹೇಳುತ್ತಿರುವುದು ಹೊಸದೇನೂ ಅಲ್ಲ. ಇದೀಗ ಚೀನದ ಸರಕಾರಿ ಪ್ರಾಯೋಜಿತ ಪ್ರವಾಸೋದ್ಯಮ ಕುರಿತ ನಿಯತಕಾಲಿಕೆಯೊಂದು ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿದ್ದು, ಅರುಣಾಚಲದ ವಿವಿಧ ಸಂಸ್ಕೃತಿ ಬಗ್ಗೆ ಹೇಳಿ, ಇದನ್ನು “ನಮ್ಮ ದಕ್ಷಿಣ ಟಿಬೆಟ್‌’ನಲ್ಲಿ ಕಾಣಬಹುದಾಗಿದೆ ಎಂದು ಷರಾ ಬರೆದಿದೆ!

ಈ ಮೂಲಕ ಡೋಕ್ಲಾಂ ವಿವಾದದ ಬಳಿಕ ಸಾಂಸ್ಕೃತಿಕವಾಗಿ, ಮಾನಸಿಕವಾಗಿ ಭಾರತ ವಿರುದ್ಧ ವ್ಯವಸ್ಥಿತ ಅಪಪ್ರಚಾರ ತಂತ್ರಗಳನ್ನು ಹೆಣೆಯುತ್ತಿದೆ. “ಚೈನಾ ಟ್ರಾವೆಲ್‌ ಗೈಡ್‌’ ಹೆಸರಿನ ಪತ್ರಿಕೆ ಇದಾಗಿದ್ದು, ಅರುಣಾಚಲ ಪ್ರದೇಶದ ಲೋಭಾ ಅಪಾಟ್ನಿಸ್‌ ಹೆಸರಿನ ಮೂಲ ನಿವಾಸಿಗಳು ಟಿಬೆಟ್‌ನವರಾಗಿದ್ದು, ಚೀನದ ಮೂಲನಿವಾಸಿಗಳಲ್ಲೇ ಅತ್ಯಂತ ಸುಂದರ ಸಮುದಾಯ ಎಂದಿದೆ. ಆದರೆ ಇದನ್ನು ನಿವೃತ್ತ ಸೇನಾಧಿಕಾರಿ ಜ| ಜೆಜೆ ಸಿಂಗ್‌ ತಿರಸ್ಕರಿಸಿದ್ದು, ಅಪಾಟ್ನಿಸ್‌ ಮೂಲ ನಿವಾಸಿಗಳು ಟಿಬೆಟ್‌ನವರಲ್ಲ. ಅವರಿಗೂ ಟಿಬೆಟ್‌ಗೂ ಎಳ್ಳಷ್ಟು ಸಂಬಂಧವಿಲ್ಲ. ಚೀನ ಅರುಣಾಚಲ ತಮ್ಮದು ಎಂದು ಹೇಳುವುದಕ್ಕೆ ಇಂಥ ಕಥೆ ಕಟ್ಟುತ್ತಿದೆ ಎಂದಿದ್ದಾರೆ.