ಹಸೆಮಣೆ ಏರಿದ ಜಾಕಿ ಭಾವನಾ
Team Udayavani, Jan 23, 2018, 10:53 AM IST
ನಟಿ “ಜಾಕಿ’ ಭಾವನಾ ಅವರು ಸೋಮವಾರ ನಿರ್ಮಾಪಕ ನವೀನ್ ಅವರ ಜೊತೆ ಹಸೆಮಣೆ ಏರಿದರು. ಕೇರಳದ ತ್ರಿಶೂರ್ನಲ್ಲಿರುವ ಜವಾಹರ್ಲಾಲ್ ಕನ್ವೆನ್ಷನ್ ಸೆಂಟರ್ನಲ್ಲಿ ಬೆಳಗ್ಗೆ 10.30ಕ್ಕೆ ಅವರಿಬ್ಬರ ಮದುವೆ ನೆರವೇರಿತು.
ಆ ಮದುವೆಯಲ್ಲಿ ಭಾವನಾ ಹಾಗು ನವೀನ್ ಅವರ ಆಪ್ತರು, ಸಂಬಂಧಿಕರು ಮತ್ತು ಗೆಳೆಯರಿಗಷ್ಟೇ ಆಹ್ವಾನ ನೀಡಲಾಗಿತ್ತು. ಸಂಜೆ ಅರತಕ್ಷತೆ ಕೂಡ ನಡೆದಿದ್ದು, ಮಲಯಾಳಂ ಚಿತ್ರರಂಗದ ಅನೇಕ ನಟ,ನಟಿಯರು, ನಿರ್ದೇಶಕರು ಮತ್ತು ನಿರ್ಮಾಪಕರು ಪಾಲ್ಗೊಂಡಿದ್ದರು.
ನಟಿ ಭಾವನಾ ಅವರು ನವೀನ್ ನಿರ್ಮಾಣದ “ರೋಮಿಯೋ’ ಚಿತ್ರದಲ್ಲಿ ನಾಯಕಿಯಾಗಿಯೂ ನಟಿಸಿದ್ದರು. ಆ ಬಳಿಕ ಇಬ್ಬರ ನಡುವೆ ಪ್ರೀತಿ ಚಿಗುರಿತ್ತು. ನಂತರ ಮಾರ್ಚ್ನಲ್ಲಿ ಎಂಗೇಜ್ಮೆಂಟ್ ಆಗಿ ಈಗ ಮದುವೆಯಾಗಿದ್ದಾರೆ. ನವೀನ್ ಕೂಡ “ನಾಯಕ’ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಹೀರೋ ಆಗಿ ಕಾಲಿಟ್ಟಿದ್ದರು.
ಆ ಚಿತ್ರದ ನಿರ್ಮಾಣವನ್ನೂ ಅವರೇ ಮಾಡಿದ್ದರು. ಫೆಬ್ರವರಿ 4 ರಂದು ಬೆಂಗಳೂರಿನಲ್ಲಿ ಭಾವನಾ ಮತ್ತು ನವೀನ್ ಅವರ ಅರತಕ್ಷತೆ ಕಾರ್ಯಕ್ರಮ ನಡೆಯಲಿದ್ದು, ಅಂದು ಕನ್ನಡ ಚಿತ್ರರಂಗದ ಅನೇಕ ನಟ, ನಟಿಯರು ಹಾಗು ಚಿತ್ರರಂಗದ ಗಣ್ಯರನ್ನು ಆಹ್ವಾನಿಸಲಾಗಿದೆ.