ಬಿಜೆಪಿಗೆ ಸೋಲಿನ ಭಯ,ಐಟಿ ದಾಳಿ ತಿರುಗು ಬಾಣ ಆಗ್ತದೆ; ಸಿಎಂ ಕಿಡಿ

Team Udayavani, May 8, 2018, 12:14 PM IST

ಮೈಸೂರು: ‘ಬಿಜೆಪಿಯವರಿಗೆ ಸೋಲಿನ ಭಯ ಇದ್ದು, ರಾಜಕೀಯವಾಗಿ ತೊಂದರೆ ಕೊಡಲು ದುರುದ್ದೇಶ ಮತ್ತು ದ್ವೇಷ ದಿಂದ ಐಟಿ ದಾಳಿ ಮಾಡುತ್ತಿದ್ದಾರೆ’ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಮಂಗಳವಾರ ಕಿಡಿ ಕಾರಿದ್ದಾರೆ. 

ಬಾದಾಮಿಯಲ್ಲಿ  ಕೃಷ್ಣ ಹೆರಿಟೇಜ್‌ ಮತ್ತು ಮಯೂರ ಹೊಟೇಲ್‌ ಮೇಲೆ ಐಟಿ ದಾಳಿ ಬಗ್ಗೆ ಸುದ್ದಿಗಾರರಿಗೆ ಪ್ರತಿಕ್ರಿಯೆ ನೀಡಿದ ಸಿಎಂ ಬಿಜೆಪಿ ವಿರುದ್ದ ಕಿಡಿ ಕಾರಿದರು. 

‘ಐಟಿ ದಾಳಿ ಬೇರೆ ಕಡೆ ಯಾಕೆ ಮಾಡುತ್ತಿಲ್ಲ, ಅಮಿತ್‌ ಶಾ ಉಳಿದುಕೊಂಡಲ್ಲಿ ಯಾಕೆ ಮಾಡಿಲ್ಲ? ಯಡಿಯೂರಪ್ಪ ಮೇಲೆ ಯಾಕೆ ಮಾಡಿಲ್ಲ, ಜಗದೀಶ್‌ ಶೆಟ್ಟರ್‌ ಮೇಲೆ ಯಾಕೆ ಮಾಡಿಲ್ಲ?’ ಎಂದರು. 

‘ಎಲ್ಲಾ ನರೇಂದ್ರ ಮೋದಿ ಮತ್ತು ಅಮಿತ್‌ ಶಾ ಮಾಡಿಸುತ್ತಿದ್ದಾರೆ. ಇದರಿಂದ ಅನುಕೂಲ ಆಗುತ್ತದೆ ಅಂತ ತಿಳಿದುಕೊಂಡಿದ್ದರೆ ಅವರಷ್ಟು ಮೂರ್ಖರು ಬೇರೆ ಯಾರಿಲ್ಲ’ ಎಂದರು. 

‘ನಾನು ರೂಂ ಖಾಲಿ ಮಾಡಿಕೊಂಡು ಬಂದ ಮೇಲೆ ದಾಳಿ ಮಾಡಿದರೆ ಏನು ಸಿಗುತ್ತದೆ. ಹಿಂದಿನ ಯಾವ ಸರ್ಕಾರವೂ ಈ ರೀತಿ ಮಾಡಿಲ್ಲ,ಚುನಾವಣೆ ವೇಳೆ ಈ ರೀತಿ ಮಾಡುತ್ತಾರಾ? ನಾನು ಯಾರಿಗೂ ಹೆದರಿಕೊಳ್ಳುವುದಿಲ್ಲ. ಯಾಕೆ ಹೆದರಿಕೆ, ತಪ್ಪು ಮಾಡಿದರೆ ಅಲ್ವಾ ಹೆದರಿಕೆ’ ಎಂದರು.