ಸೆ.23ಕ್ಕೆ ಜೀಯಲ್ಲಿ ಲಿಟ್ಲ್ ಮಾಸ್ಟರ್ಸ್ ಗ್ರ್ಯಾಂಡ್‌ ಫಿನಾಲೆ 

Team Udayavani, Sep 22, 2018, 12:05 PM IST

ಜೀ ಕನ್ನಡ ವಾಹಿನಿಯಲ್ಲಿ ಲಿಟ್ಲ್ ಮಾಸ್ಟರ್ ಅನೇಕರ ಮನಗೆದ್ದ ಯಶಸ್ವಿ ಪ್ರದರ್ಶನ. ಈಗ ಅದು ಅಂತಿಮ ಹಂತ ತಲುಪಿದ್ದು, ಇತ್ತೀಚೆಗೆ ಚನ್ನರಾಯಪಟ್ಟಣದಲ್ಲಿ ಅದ್ಧೂರಿಯಾಗಿ ಲಿಟ್ಲ್ ಮಾಸ್ಟರ್ ಗ್ರ್ಯಾಂಡ್‌ ಫಿನಾಲೆ ನಡೆದಿದೆ. ಈ ತೀವ್ರ ಹಣಾಹಣಿಗೆ 35 ಸಾವಿರಕ್ಕೂ ಹೆಚ್ಚು ಜನ ಸಾಕ್ಷಿಯಾದರು. ಈಗ ರೋಚಕ ಸ್ಪರ್ಧೆಯನ್ನು ವೀಕ್ಷಕರು ಕಣ್ತುಂಬಿಕೊಳ್ಳುವ ಸಮಯ. ಹೌದು, ಲಿಟ್ಲ್ ಮಾಸ್ಟರ್ ಗ್ರ್ಯಾಂಡ್‌ ಫಿನಾಲೆ ಸೆ. 23 ರಂದು ಸಂಜೆ 7.30ಕ್ಕೆ ಜೀ ಕನ್ನಡದಲ್ಲಿ ಪ್ರಸಾರವಾಗಲಿದೆ.

ಈ ಮೂಲಕ ಯಾರು ಲಿಟ್ಲ್ ಮಾಸ್ಟರ್‌ ಆಗುತ್ತಾರೆಂಬ ಕುತೂಹಲಕ್ಕೆ ತೆರೆಬೀಳಲಿದೆ. ನಟಿ ರಕ್ಷಿತಾ, ಸಂಗೀತ ನಿರ್ದೇಶಕ ಅರ್ಜುನ್‌ ಜನ್ಯಾ ಹಾಗೂ ನಟ ವಿಜಯ ರಾಘವೇಂದ್ರ ಈ ಶೋನ ತೀರ್ಪುಗಾರರಾಗಿದ್ದರು. ಜ್ಯೂರಿಗಳಲ್ಲಿ “ನಾಗಿಣಿ’ ಧಾರಾವಾಹಿಯ ದೀಕ್ಷಿತ್‌ ಶೆಟ್ಟಿ, ಕಾಮಿಡಿ ಕಿಲಾಡಿಗಳು ಹಿತೇಶ್‌ ಕುಮಾರ್‌, “ಜನುಮದ ಜೋಡಿ’ ಧಾರಾವಾಹಿಯ ಸಿಂಹ, “ಶ್ರೀಮಾನ್‌ ಶ್ರೀಮತಿ’ಯ ಅಪಾರ್ಟ್‌ಮೆಂಟ್‌ ಗೌಡ್ರು ಮತ್ತು ಅನುಷಾ ಮತ್ತು ಸ ರೆ ಗ ಮ ಪ ದಿಂದ ಸುನಿಲ್‌ ಗುಜಗೊಂಡ ಅಂತಿಮ ಸ್ಪರ್ಧಿಗಳ ನೃತ್ಯ ಪ್ರದರ್ಶನಕ್ಕೆ ಸಾಕ್ಷಿಯಾದರು.

ಡ್ರಾಮಾ ಜೂನಿಯರ್, ಸ ರೆ ಗ ಮ ಪ ಲಿಟ್ಲ್ಚಾಂಪ್ಸ್‌  ಹಾಗೂ ಇತರ ಧಾರಾವಾಹಿಗಳ ಮೂಲಕ ಪರಿಚಿತವಾಗಿರುವ  12 ಪುಟ್ಟ ಸೆಲೆಬ್ರೆಟಿಗಳು ಈ ಸೀಸನ್‌ನ ಪ್ರಮುಖ ಸ್ಪರ್ಧಿಗಳಾಗಿದ್ದರು. 15 ವಾರಗಳ ಈ ಶೋನಲ್ಲಿ ಜ್ಞಾನೇಶ್ವರ್‌-ಲಹರಿ, ಸೃಜನ್‌-ಐಶ್ವರ್ಯ, ಪ್ರೀತಂ-ಅನ್ಷಿಕಾ ಮತ್ತು ಸೂರಜ್‌-ಶ್ರಾವ್ಯ ಲಿಟ್ಲ್ ಮಾಸ್ಟರ್ ಸೀಸನ್‌ 3ರ ಅಂತಿಮಘಟ್ಟವನ್ನು ತಲುಪಿದರು. ಪ್ರತಿ ಸ್ಪರ್ಧಿಗಳು ಅಂತಿಮ ಸುತ್ತಿನಲ್ಲಿ ವಿಶೇಷವಾದ ನೃತ್ಯ ಪ್ರದರ್ಶಿಸಿ ಎಲ್ಲರ ಮೆಚ್ಚುಗೆಗೆ ಪಾತ್ರರಾದರು. ಅವೆಲ್ಲವನ್ನು ನೀವು ಸೆ.23 ರಂದು ಕಣ್ತುಂಬಿಕೊಳ್ಳಬಹುದು. ಅನುಶ್ರೀ ನಿರೂಪಣೆಯಲ್ಲಿ ಈ ಶೋ ಮೂಡಿಬಂದಿದೆ.